រថយន្តដឹកជ័រកៅស៊ូ គេចពីរថយន្តដឹកទឹកកក ទៅបុកតូបអ្នកលក់បង្អែមខ្ទេចទាំងព្រលឹម
ខេត្តកំពង់ឆ្នាំង៖ តូបលក់បង្អែមមួយកន្លែង ត្រូវបានរថយន្តស៊ីទែនដឹកជ័រកៅស៊ូ មួយគ្រឿងបុកទាំងព្រឹក ព្រលឹម បន្ទាប់ពីបានវាក់អើគេចនឹងរថយន្តដឹកទឹកកកមួយគ្រឿង។ ឧប្បត្តិហេតុនេះបានកើតឡើងនៅវេលាម៉ោង ៦ និង៣០នាទីព្រឹកថ្ងៃទី២៦ ខែមេសា ឆ្នាំ២០១៥ នៅលើផ្លូវជាតិលេខ៥ ត្រង់ចំណុចជិតស្ថានីយ ប្រេងឥន្ទនៈសូគីមិច ក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ។
សមត្ថកិច្ចនគរបាលក្រុងកំពង់ឆ្នាំង បាននិយាយអោយដឹងថា៖ រថយន្តបង្កខាងលើនេះ ម៉ាកហ៊ីយ៉ាន់ដាយ កាប៊ីនពណ៌ក្រហម ស និងស៊ីទែនពណ៌ខ្មៅ ស្លាកលេខត្រូវបានម្ចាស់ដោះចេញក្រោយពេលកើតហេតុ ដើម្បីលាក់បាំងអត្តសញ្ញាណ។
មុនពេលកើតហេតុ រថយន្តខាងលើបានបើកមកពីត្បូងទៅជើងក្នុងល្បឿនលឿន លុះពេលមកដល់ចំណុចកើតហេតុ បានវាក់នឹងរថយន្តដឹកទឹកកកមួយគ្រឿងដែលចេញពីស្ថានីយប្រេង នៅខងឆ្វេងដៃ ហើយរថយន្តស៊ីទែនបានគេចមកឆ្វេងដៃដែរ បណ្តាលអោយជ្រុលទៅបុកតូបអ្នកលក់បង្អែមធ្វើអោយខ្ទេច។ នោក្នុងហេតុការណ៍នេះដែរអ្នកបើករថយន្តបង្កបានព្យាយាមជាន់ហ្វ្រាំងដែរ តែស៊ីទែនជ័រកៅស៊ូបានរុញបត់ក្បាលរថយន្តត្រឡប់មកក្រោយវិញ។ នៅកន្លែងកើតហេតុគេឃើញខូចខាតតូបលក់បង្អែមមួយខ្នង បែកលូទឹក បាក់កូនឈើមួយដើម និងរបស់របរមួយចំនួនទៀត តែសំណាងល្អមិនបង្កគ្រោះថ្នាក់ ដល់អ្នកណាឡើយ ។
សមត្ថកិច្ចបានអោយដឹងទៀតថាៈ រថយន្តខាងលើជារបស់ក្រុមហ៊ុន លឹម ឡេងស្រេង ដែលមានអ្នក បើកបរ ឈ្មោះ ស៊ុត ប៊ុត អាយុ២៥ឆ្នាំ រស់នៅខេត្តកំពតនិងព្រូមា្នក់ទៀតឈ្មោះ វុឌ្ឍី អាយុ២៤ ឆ្នាំនៅ ខេត្តកំពង់ស្ពឺ។ក្រោយពេលកើតហេតុ សមត្ថកិច្ចនគរបាល បានសម្របសម្រួលអោយក្រុមហ៊ុនចេញ ថ្លៃសងការខូចខាតម្ចាស់តូបលក់បង្អែម និងសងថ្លៃសម្ភារៈដែលបែកបាក់ខូតខាតមួយចំនួនទៀត ដោយមិនបានយករថយន្តមកកាន់អធិការដ្ឋាននគរបាលក្រុងកំពង់ឆ្នាំងនោះឡើយ។ ករណីគ្រោះថ្នាក់នេះត្រូបានសមត្ថកិច្ចសន្និដ្ឋានថា៖ បណ្តាលមកពីរថយន្តស៊ីទែនបើកបរលឿន ហួសល្បឿនកំណត់នៅក្នុងក្រុង ទើបបង្កអោយមានគ្រោះថ្នាក់ដូចខាងលើនេះ៕ ដោយ រិទ្ធិ ជ័យ
http://ift.tt/1bKw2L3
