ស្ទាវ៤នាក់ផឹកស៊ីហឺហាក្នុងហាងឌីស្កូរាំចាក់ក្បាច់ ប៉ះពាល់ស្រីសំណប់ចិត្តគេ ផ្ទុះជម្លោះ ហើយព្រួតគ្នាវាយយុវជនម្នាក់រងរបួសធ្ងន់ តែត្រូវសមត្ថកិច្ចចាប់វ៉ៃខ្នោះបញ្ជូនទៅតុលាការ
ខេត្តកំពង់ឆ្នាំង៖ ស្ទាវទំនើង៤នាក់ ត្រូវសមត្ថកិច្ចនគរបាលព្រហ្មទ័ណ្ឌក្រុងកំពង់ឆ្នាំង ស្រាវជ្រាចាប់ខ្លួនបានក្រោយពីបានបង្កអំពើហិង្សាបណ្តាលឲ្យមានរបួសស្នាមលើយុវជនម្នាក់បានមួយថ្ងៃ ដោយបាន ព្រួតគ្នាវាយ ឲ្យរងរបួសធ្ងន់នៅក្នុងក្លឹបឌីស្កូមួយ ព្រោះតែទំនាស់កើតចេញពីការរាំចាក់ក្បាច់ប៉ះពាល់មិត្តស្រីសំណប់ចិត្តរបស់របស់ជនរងរបួស។ ហេតុការណ៍នេះបានកើតឡើងវេលានៅម៉ោង១១ និង៣០នាទីយប់ថ្ងៃទី២៥ ខែមេសា ឆ្នាំ២០១៥ នៅក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង។
លោក ញ៉ោក ប៊ុនធី អធិការនគរបាលក្រុងកំពង់ឆ្នាំងបានអោយដឹងថា យុវជនរងគ្រោះមានឈ្មោះ ជា វុទ្ធី អាយុ២៥ឆ្នាំ រស់នៅក្នុងភូមិសន្ទូច ឃុំស្រែថ្មី ស្រុករលាប្អៀរ។ ចំណែកជនបង្ករបួសស្នាមទាំង ៤នាក់ មាន ១ឈ្មោះ មាន ឌិត អាយុ២៧ឆ្នាំ ២ឈ្មោះ មាន ហេង អាយុ២២ឆ្នាំ ៣ឈ្មោះ ទុយ សុភ័ន្ត អាយុ២១ឆ្នាំ និងឈ្មោះភុំ ចំរើន អាយុ២៧ឆ្នាំ ពួកគេទាំង៤នាក់រស់នៅភូមិកំពង់អូស សង្កាត់ផ្សារឆ្នាំង ក្រុងកំពង់ឆ្នាំង។
មុនពេលកើតហេតុពួកគេទាំង៥នាក់បានស៊ីផឹកនៅក្នុងក្លឹបឌីស្កូ SK ក្រោមដីមួយកន្លែង ដោយឈ្មោះ ជា វុទ្ធី បាននាំមិត្តភ័ក្រស្រីៗទៅរាំលេងជាមួយផង។ ក្នុងពេលរាំលេង ឈ្មោះ មាន ឌិត បានប៉ះមិត្តស្រីរបស់ ឈ្មោះ ជា វុទ្ធី ពេលនោះឈ្មោះ ជា វុទ្ធី បានស្ទុំទៅវាយឈ្មោះ មាន ឌិត ២ទៅ៣ដៃ ឃើញដូច្នេះមិត្តភ័ក្ររបស់ឈ្មោះ មាន ឌិត ក៏បាននាំគ្នាវាយតប់ឈ្មោះ ជា វុទ្ធី និងចោលកែវមកចំក្បាល និងចិញ្ចើម បណ្តាលអោយបែកដេរ៤ថ្នេរ និងមុតកដៃស្តាំដេរ៣ថ្នេរ។ ក្រោយពេលបង្កហេតុជនបង្កទាំង ៤នាក់ក៏ បាននាំគ្នារត់គេចខ្លួនអស់។ ចំណែកជនរងគ្រោះត្រូបានមិតភ័ក្របញ្ជូនមកព្យាបាលរបួសនៅក្នុងមន្ទីរពេទ្យខេត្ត។
សមត្ថកិច្ចបានអោយដឹងទៀតថា៖ក្រោយពីបានស្រាវជ្រាវករណីនេះមួយយប់មួយថ្ងៃមក នៅវេលាម៉ោង ៤និង៣០នាទីល្ងាចថ្ងៃទី២៦ ខែមេសា ឆ្នាំ២០១៥ សមត្ថកិច្ចសហការជាមួយមន្ត្រីនគរបាលប៉ុស្តិ៍មូលដ្ឋាន បាននាំគ្នាចាប់ខ្លួនជនបង្កទាំង៤នាក់ យកមកឃុំខ្លួននៅក្នុងអធិការដ្ឋានគរបាលក្រុងកំពង់ឆ្នាំមួយយប់ កសាងសំណុំរឿងតាមផ្លូវច្បាប់។ នៅចំពោះមុខសមត្ថកិច្ចពួកគេទាំង៤នាក់ និយាយថាក្នុងរឿងនេះ គឺពួកគេ និងឈ្មោះ ជា វុទ្ធី គឺបានឈ្លោះគ្នាវាយគេទៅវិញទៅមក។
នៅព្រឹកថ្ងៃទី២៧ ខែមេសា ឆ្នាំ២០១៥នេះ យុវជនទាំង៤នាក់ត្រូវបានសមត្ថកិច្ចនគរបាលក្រុងកំពង់ឆ្នាំង បញ្ជូនខ្លួនទៅកាន់ ការិយាល័យជំនាញនៃស្នងការដ្ឋាននគរបាលខេត្ត កសាងសំណុំរឿងបន្ថែមបញ្ជូនខ្លួនទៅកាន់សាលាដំបូងខេត្ត ចាត់ការបន្តតាមផ្លូវច្បាប់៕ ដោយ រិទ្ធិ ជ័យ
http://ift.tt/1Ed3JxO