រថយន្តនីសាន់បុករថយន្តក្រុងប៉ើងខ្ទាតទៅបុករថយន្តឡង់រឺវែក្រឡាប់ជាច្រើលត្រឡប់ បណ្តាលស្ត្រីម្នាក់ស្លាប់និង៤នាក់ទៀតរបួសធ្ងន់ស្រាល
ខេត្តកំពង់ឆ្នាំង៖ ស្ត្រីម្នាក់បានស្លាប់យ៉ាងរន្ធត់នៅកន្លែងកើតហេតុ កុមារ២នាក់ជាកូន និងបុរស២នាក់ទៀតរងរបួសធ្ងន់ស្រាស នៅក្នុងករណីគ្រោះថ្នាក់ចរាចរណ៍ ដោយសាររថយន្តនីសាន់បុករថយន្តក្រុងដឹកអ្នកដំណើរពេញទំហឹង ហើយប៉ើងទៅចំរថយន្តឡង់រឺវែ របស់លោកអភិបាលរងខេត្តបាត់ដំបងបុកមួយជាន់ទៀត ដោយរបូតដាច់ម៉ាស៊ីនខ្ទាតប៉ើងជាង១០ម៉ែត្រ ក្រឡាប់ជាច្រើនត្រឡប់បះជើងឡើងលើកណ្តាលទ្រូងផ្លូវ។ ហេតុកាណ៍រដ៏រន្ធត់នេះបានកើតឡើងវេលាម៉ោង១និង២៥នាទីរសៀល ថ្ងៃទី២៦ ខែមេសា ឆ្នាំ២០១៥ នៅលើផ្លូវជាតិលេខ៥ ចន្លោះគីឡូម៉ែត្រលេខ៨៥និង៨៦ ក្នុងភូមិព្រៃពួច ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។
លោក ទឹម ចន្ធី អធិការនគរបាលស្រុករលាប្អៀរដែលបានឃើញហេតុការណ៍នេះបាននិយាយអោយដឹង ថា៖ មុនពេលកើតហេតុរថយន្តម៉ាកនីសាន់ពណ៌ទឹកប្រាក់ ពាក់ស្លាកលេខភ្នំពេញ2E-8742 បើកបរដោយបុរសឈ្មោះ ប៊ុន និន អាយុ៥០ឆ្នាំរស់នៅភូមិពពេល ឃុំខុនរ៉ង ស្រុកបរិបូរណ៌ (របួសធ្ងន់ដាច់ចុងអណ្តាតនិយាយមិនចេញ) បានដឹកប្រពន្ធនិងកូន២នាក់ បើកបរពីស្រុកបរិបូរណ៌ទៅភ្នំពេញ។ លុះដល់ចំណុច កើត ហេតុសង្ស័យថាងោគងុយ បានបុករថយន្តក្រុងដឹកអ្នកដំណើរក្រុមហ៊ុនKSOពាក់ស្លាកលេខភ្នំពេញ3A-9544 ពណ៌សខៀវ បើកបរក្នុងទិសច្រាស់គ្នាមកពីភ្នំពេញទៅប៉ោយប៉ែត ហើយបានបែកកង់មុខងាកក្បាលមកស្តាំដៃ ស្របពេលរថយន្តឡង់រឺវែ ពណ៌ខ្មៅពាក់ស្លាកលេខ បាត់ដំបង2A-9988 បើកបរដោយឈ្មោះ ជីប វ៉ាន់ឌឿន (ដឹកលោកសុខ គង់ អភិបាលរងខេត្តបាត់ដំបង)ក៏បានបុករថយន្តសីសាន់មួយជាន់ទៀត បណ្តាលអោយរថយន្តនីសាន់ដាច់ម៉ាស៊ីនប៉ើងជាង១០ម៉ែត្រ និងក្រឡាប់ជាច្រើនត្រឡប់ហើយបះជើងឡើងលើនៅកណ្តាលថ្នល់ជាតិ។
នៅក្នុងគ្រោះថ្នាក់ដ៏គួរអោយរន្ធត់នេះ បណ្តាលអោយស្ត្រីឈ្មោះ ម៉ក់ សារួន ហៅស្រីអូន អាយុ៤៥ឆ្នាំ ជាប្រពន្ធអ្នកបើកបររថយន្តនីសាន់ស្លាប់នៅកន្លែងកើតហេតុ អ្នកបើកបរនីសាន់ឈ្មោះ ប៊ុន និន រង របួសធ្ងន់ដាច់អណ្តាតមួយកំណាត់ កូនប្រុសរបស់ (ប៊ុន និន) អាយុជាង២ឆ្នាំ របួសស្រាល និង កូនស្រីគេម្នាក់ទៀត អាយុ ប្រមាណ៨ឆ្នាំរបួសធ្ងន់ និងអ្នកបើកបររថយន្តឡង់រឺវែរបស់លោក អភិបាលរងខេត្តបាត់ដំបងឈ្មោះ ជីប វ៉ាន់ឌឿន រងរបួសដងកាំបិតខាងឆ្វេងធ្ងន់ ចំណែកលោក សុខ គង់ អភិបាលរងខេត្តបាត់ដំបងមិនរង របួសធ្ងន់ទេព្រោះលោកជិះនៅបាំងក្រោយ។ ដោយឡែករថយន្តក្រុង និងរថយន្តឡង់រឺវែខូចខាតធ្ងន់ដូចគ្នា រីឯរថយន្តនីសាន់វិញខូចខាតខ្ទេចខ្ទីទាំងស្រុង។
រថយន្តទាំង៣គ្រឿងត្រូវបានសមត្ថកិច្ចនគរបាលចរាចរណ៍ផ្លូវគោកខេត្ត ជួលរថយន្តស្ទួចដឹកយកទៅ រក្សាទុកនៅក្នុងស្នងការដ្ឋាននគរបាលខេត្តកំពង់ឆ្នាំង និងបានកសាងសំណុំរឿងតាមនិតិវិធីច្បាប់។ សមត្ថកិច្ចបានសន្និដ្ឋានថា៖ ករណីគ្រោះថ្នាក់ចរាចរណ៍នេះ សង្ស័យថាបណ្តាលមកពីអ្នកបើកបររថយន្ត នីសាន់បើកបរក្នុងសភាពងោគងុយ ឬរថយន្តនីសាន់មានបញ្ហាអ្វីមួយ ទើបទៅបុករថយន្តក្រុងពេញ ទំហឹង ក្នុងទិសបញ្ច្រាសគ្នា ហើយប៉ើងចូលរថយន្តឡង់រឺវែមកពីក្រោយបុកមួយជាន់ទៀត ទើបបង្កអោយ មានគ្រោះថ្នាក់ធ្ងន់ធ្ងន់បែបនេះ៕ ដោយ រិទ្ធិ ជ័យ
http://ift.tt/1EIevQ3
