រថយន្តសាំយ៉ុង បើកជែងក្នុងស្ថានភាពគ្រោះថ្នាក់ទៅបុករថយន្តកូរ៉េក្រឡាប់ធ្លាក់ស្រែ ទាំង២គ្រឿងរបួសធ្ងន់ស្រាល៤នាក់
ខេត្តកំពង់ឆ្នាំង៖ មនុស្ស៤នាក់បានរងរបួសធ្ងន់ និងស្រាល ក្នុងហេតុការណ៍គ្រោះថ្នាក់ចរាចរណ៍មួយ ដោយសារតែរថយន្តសាំយ៉ុងបើកជែងវ៉ារថយន្តមួយគ្រឿងទៅបុក និងរថយន្ត កូរ៉េមួយគ្រឿង ក្នុងដំណើរច្រាស់ទិសគ្នាក្រឡាប់ធ្លាក់ស្រែ ។ករណីនេះបានកើតឡើងកាលពីវេលាម៉ោង៣និង៥០នាទីរសៀលថ្ងៃទី២១ ខែមេសាឆ្នាំ២០១៥ លើកំណាត់ផ្លូវជាតិលេខ៥ ចំណុច ភូមិដើមជ្រែ ឃុំខុនរ៉ង ស្រុកបរិបូរណ៌។
សមត្ថកិច្ចនគរបាលស្រុកបរិបូរណ៌បាននិយាយអោយដឹងថា រថយន្តបង្កហេតុម៉ាកសាំយ៉ុង ពណ៌ស ពាក់ស្លាកលេខ ភ្នំពេញ2A-8429 បើកបរដោយបុរសមិនស្គាល់ឈ្មោះ ចំណែកភាគីម្ខាងទៀត ជា រថយន្តកូរ៉េ ម៉ាកហ៊ីយ៉ាន់ ពណ៌ខៀវពាក់ស្លាកលេខ បន្ទាយមានជ័យ 2A-2300បើកបរដោយបុរស មិនស្គាល់ឈ្មោះដូចគ្នា ។
ប្រភពដដែលបានបន្តថា៖ មុនពេលកើតហេតុ រថយន្តសាំយ៉ុង ដែលជារថយន្តដឹកអ្នកដំណើរ បានធ្វើដំណើរពីខេត្តបាត់ដំបងទៅភ្នំពេញ ក្នុងដំណើរពីជើងទៅត្បូងតាមបណ្តោយផ្លូវជាតិលេខ៥ លុះពេលមកដល់ ចំណុចកើតហេតុបានបើកជែងវ៉ារថយន្តមួយគ្រឿងទៀតក្នុងដំណើរស្របទិសគ្នា ស្រាប់តែទៅបុកជា មួយរថយន្តកូរ៉េ ដែលបើកមកពីខាងមុខ យ៉ាងពេញទំហឹងតែម្តង បណ្តាលអោយរថយន្តទាំងពីរគ្រឿងក្រឡាប់ធ្លាក់ចេញពីថ្នល់ជាតិមកក្រោមថ្នល់ ។ ក្នុងហេតុការណ៍នោះបណ្តាល អោយបុរសជាអ្នកបើកបររថយន្តទាំងសងខាងបានរងរបួសធ្ងន់ធ្ងរ និងស្ត្រី២នាក់ទៅទៀតដែលជិះលើរថយន្តសាំយ៉ុងបានរងរបួសស្រាល ។
សមត្ថកិច្ចនគរបាលស្រុកបរិបូរណ៌បានបន្តថា៖ ដោយសារតែអ្នកបើកបររថយន្តបានរង របួសធ្ងន់ និង ប្រញាប់ដឹកទៅសង្គ្រោះនៅមន្ទីរ ពេទ្យក្រុងភ្នំពេញផងនោះទើបមិនទាន់ស្គាល់អត្តសញ្ញាណ ។ ចំពោះមូលហេតុគ្រោះខាងលើសមត្ថកិច្ចបាន សន្និដ្ឋាន ថា គឺ “ជែងក្នុងស្ថានភាពគ្រោះថ្នាក់” ។ ចំណែករថយន្តទាំងពីរគ្រឿងត្រូវបានស្ទូចយកមករក្សាទុកនៅ ការិយាល័យចរាចរណ៌ផ្លូវគោករបស់ស្នងការដ្ឋាននគរបាលខេត្តដើម្បីរង់ចាំការដោះស្រាយតាមនិតិវិធី៕ ដោយ រិទ្ធិ ជ័យ
http://ift.tt/1JbIxwC
