ប្រជាពលរដ្ឋក្រីក្រស្រុកកែវសីមា ដែលរស់នៅពឹងមេឃពឹងដី ត្រូវអាជ្ញាធរប្រដាប់អាវុធខែ្មរចុះទៅរំខានការដាំដុះ រឹបអូសដើមដំឡូង
ខេត្តមណ្ឌលគិរី៖ ជនជាតិភាគតិចព្នងនៅក្នុងភូមិអូរអាម ឃុំស្រែខ្ទុម ស្រុកកែវសីមា ប្រមាណជាង១០០គ្រួសារ បានជួបជុំគ្នាតវ៉ាជាមួយមន្ត្រីអង្កការអភិរក្សជីវៈចំរុះសីមាមានកម្លាំងគាំទ្រប្រដាប់ដោយកាំភ្លើង រឿងដីដាំដំឡូងរបស់ពួកគាត់ ដោយមន្ត្រីទាំងនោះអះអាងថា ពលរដ្ឋទាំងនោះកំពុងធ្វើការដាំដុះលើដីអភិរក្សរបស់រដ្ឋ ។ ក្រុមសមត្ថកិច្ចប្រដាប់ដោយអាវុធបានប្រើរថយន្តរឹបអូសប្រមូលដឹកដើមដំឡូងមីរបស់ពួកគាត់ចេញពីចំការ ដែលពួកគាត់បំរ៉ុងដាំលើដីរបស់ពួកគាត់ពីដូនតា ។
ក្រុមប្រជាពលរដ្ឋជាជនជាតិភាគតិចព្នងក្នុងសភាពក្រីក្រលំបាកបានលើកឡើងថា ដីនោះមានប្លង់ខ្លះ ដីព្រៃខ្លះ នៅលាយឡំគ្នា ប៉ុន្តែដោយមានការខ្វះខាតក្នុងជីវភាព ពលរដ្ឋដែលមានចំណាកស្រុកខ្លះ រួមទាំងការកើនឡើងចំនួនគ្រួសាររបស់បងប្អូនជនជាតិដើមភាគតិចផងនោះ បានជាពួកគាត់ពង្រីកដីដាំដុះដំណាំបន្តិចបន្ទួចបន្ថែមដើម្បីផ្គត់ផ្គង់ក្នុងជីវភាពគ្រួសារប្រចាំថ្ងៃ ដោយគ្មានមុខរបរអ្វីក្រៅពីនេះ។
តាមការៀបរាប់របស់បងប្អូនជនជាតិដើមភាគតិចព្នង បានអោយដឹងថា ពួកគាត់ជាប្រជាពលរដ្ឋដែលរស់នៅក្នុង តំបន់នេះ តាំងពីដូនតាមក តែងតែប្រកបរបធ្វើចំការ រកដងជ័រ បោចវល្លិ៍ផ្តៅ ជាមុខរបរបស់ពួកគាត់ រហូតដល់សព្វថ្ងៃនេះ ដូច្នេះ ពួកគាត់សំណូមពរ សុំអោយអាជ្ញាធរ មេត្តាជួយសម្រួលអោយពួកគាត់បាន ដាំលើដីចំការដើម្បីអាស្រ័យផលដែលពួកគាត់មានសព្វថ្ងៃនេះផង ។
ទាក់ទងទៅនឹងបញ្ហានេះ មន្ត្រីអភិរក្សជីវៈចម្រុះបានប្រាប់ប្រជាពលរដ្ឋថា នឹងធ្វើរបាយការណ៍ទៅថ្នាក់លើដើម្បីរកវិធីនិងគោលការណាមួយពីថ្នាក់ដឹកនាំយកមកដោះស្រាយជូនតែសូមផ្អាកការដាំដុះសិន។ ប៉ុន្តែពលរដ្ឋទាំងនោះថា ការរងចាំការឆ្លើយតបថ្នាក់លើនោះបានកើតឡើងជាច្រើនសារមកហើយ គឺដូចចាំខ្មោចធ្លាក់ពីលើមេឃ។
ក្រុមប្រជាពលរដ្ឋជនជាតិព្នងក្រីក្រមានជីវភាពពឹងមេឃពឹងដីរស់នឹងការដាំដុះបានឲ្យដឹងទៀតថា បើសិនរយ:៣ថ្ងៃក្រោយ មិនមានការដំណោះស្រាយអោយពួកគាត់ទេ គាត់នាំគ្នាធ្វើការតវ៉ាម្តងទៀត នឹងឈានដល់បិទផ្លូវជាតិលេខ៧៦ នៅត្រង់ ចំណុចស្ពានអូរតឺកជិតស្នាក់ការអង្កការអភិរក្សជីវៈចំម្រុះសីមានៅថ្ងៃទី១៥ខែឧសភា ២០១៥នេះ ដើម្បីអោយអាជ្ញាធរ ស្រុក ខេត្ត និងប្រមុខរាជរដ្ឋាភិបាលដោះស្រាយជូនពួកគាត់ដែលកំពុងខ្វះខាតនៅក្នុងជីវភាពគ្រួសា បើមិនធ្វើយ៉ាងនេះទេ អស់លោកក្បាលពោះធំៗទាំងនោះមិនខ្វល់ពីពួកគាត់ឡើយ៕ ដោយ ឦសាន២
http://ift.tt/1KMdWTP