ឈ្មួញដឹកឈើប្រណីតលោតឆ័ត្រ ត្រូវបាននគរបាលសេដ្ឋកិច្ចខេត្តស្ទាក់ចាប់បានទាំងយប់
ខេត្តរតនគិរី៖ រថយន្តម៉ាកតូយូតាមួយបាំងកន្លះមួយគ្រឿងពណ៌ស ពាក់ស្លាកលេខ រតនគិរី 2A-0029 មិនស្គាល់អត្តសញ្ញាណអ្នកបើកបរ ដឹកឈើប្រណីតប្រភេទធ្នង់ពេញព្រៀបលោកឆ័ត្រទំនងមិនបានរត់ការត្រូវបានកម្លាំង នគរបាលប្រឆាំងបទល្មើសសេដ្ឋកិច្ចខេត្ត សហការជាមួយនឹងកម្លាំងយោធាស្រុកអូរជុំស្ទាក់ចាប់បាននៅវេលាម៉ោង៧និង៣០នាទីយប់ ថ្ងៃទី៣០ ខែមេសា ឆ្នាំ២០១៥ ត្រង់ចំណុចភូមិចាអ៊ុងកាវឃុំចាអ៊ុង ស្រុកអូរជុំ ខេត្តរតនគិរី។
តាមប្រភពពីមន្ត្រីនគរបាលប្រឆាំងបទល្មើសសេដ្ឋកិច្ចខេត្តដែលចុះបង្ក្រាបបានឲ្យដឹងថា កាលពីវេលាម៉ោងខាងលើដោយបានទទួលព័ត៌មានពីភ្នាក់ងារសម្ងាត់ហើយបានឈានទៅស្ទាក់ចាប់រថយន្តកំពុងតែដឹកឈើលោតឆ័ត្រខាងលើ ដែលគេដឹងថារថយន្តនេះដឹកជញ្ជូនឈើ ចេញពីស្រុកវ៉ើនសៃ ឆ្ពោះមកកាន់ក្រុងបានលុង និងបន្តទៅលក់នៅប្រទេសវៀតណាម។
ខណៈស្ទាក់បង្ក្រាបបានរថយន្តដឹកឈើប្រណីតនោះ ម្ចាស់រថយន្តឃើញសភាពមិនស្រួលក៏បើកទ្វាររត់គេចខ្លួនតាមសម្រួលបាត់ទៅ បន្សល់ទុករថយន្ត និងឈើប្រណីត ហើយនគរបាលសេដ្ឋកិច្ចខេត្តបានធ្វើ សំណុំបែបបទប្រគល់ឲ្យផ្នែករដ្ឋបាលព្រៃឈើដើម្បីចាត់ការបន្តតាច្បាប់ព្រៃឈើ។ មានការកត់សម្គាល់ឃើញថា រាល់ការបង្ក្រាបការដឹកជញ្ជូនឈើខុសច្បាប់នេះគេពុំសូវឃើញមានការស្រាវជ្រាវរហូតដល់ចាប់ម្ចាស់ឈើយកមកឲ្យទទួលខុសត្រូវចំពោះមុខច្បាប់នោះទេ៕ ដោយលី វណ្ណៈ
http://ift.tt/1KBMvN9