ក្នុងជម្លោះហិង្សា យុវជនម្នាក់របួសធ្ងន់រយះមុខ ដោយសារយុវជន៣នាក់ព្រួតគ្នាចាក់ និងវាយ
ខេត្តព្រះសីហនុ៖ យុវជនទំនើង៣នាក់បានព្រួតគ្នាវាយនិងយកកាំបិតចុងស្រួចចាក់ទៅលើយុវជនម្នាក់បណ្តាលឲ្យរងរបួសធ្ងន់ដេកដួលក្នុងថ្លុកឈាម កាលពីវេលាម៉ោងនៅម៉ោង១១ និង០០នាទីព្រឹតថ្ងៃទី២៩ខែសីហា ឆ្នាំ២០១៥ នៅចំណុចភូមិ៤ សង្កាត់៤ ក្រុងព្រះសីហនុ។ បន្ទាប់ពីពួកគេប្រព្រឹត្តហិង្សារួចបាននាំគ្នារត់គេចខ្លួនបាត់។
មន្ត្រីនគរបាលការិយាល័យព្រហ្មទណ្ឌក្រុងព្រះសីហនុបានឲ្យដឹងថា៖ ជនរងគ្រោះឈ្មោះ ម៉ី ចាន់ ភេទប្រុស អាយុ២០ឆ្នាំ រស់នៅអង្គការម្លប់តាប៉ាង របួសធ្ងន់ដោយត្រូវជនសង្ស័យ៣នាក់ព្រួតគ្នាវាយ និងចាក់នឹងកាំបិតចុងស្រួចរយះសាច់មុខមួយចំអាម និងមុតជ្រៅហូរឈាមស្រោចខ្លួនរបួសធ្ងន់សន្លប់ស្តូកស្តឹងត្រូវបានបញ្ជូនទៅសង្គ្រោះនៅមន្ទីរពេទ្យ។ បន្ទាប់ពីធ្វើសកម្មភាពរួចសង្ស័យទាំង៣នាក់បានរត់គេចខ្លួនបាត់ ។
មន្ត្រីដដែលបានបន្តថា៖ បន្ទាប់ពីទទួលបានព័ត៌មានពីហេតុការណ៍នោះកម្លាំងម៉ូតូ ប្រដេញ របស់ការិយាល័យកណ្តាលនគរបាលព្រហ្មទ សហការជាមួយកម្លាំងអធិការក្រុង បានស្ទាក់ ចាប់បានជនសង្ស័យ ចំនួន៣នាក់មានឈ្មោះ ១.ម៉ាន់ ង៉ែត ភេទប្រុស អាយុ៣០ឆ្នាំ (ជនដៃដល់) ២. ជា បូ ភេទប្រុស អាយុ២៨ឆ្នាំ (សមគំនិត) និង ៣. ឈឹម ឈាង ភេទប្រុស អាយុ៣០ឆ្នាំ (សមគំនិត) ។ ជនសង្ស័យទាំង៣នាក់នេះរស់នៅអង្ការម្លប់តាប៉ាង។
មន្ត្រីដដែលបានបញ្ជាក់ទៀតថា៖ វត្ថុតាងចាប់យកបានកាំបិតចុងស្រួចដងឈើ១។ ជនសង្ស័យ និង វត្ថុតាង ត្រូវបាននគរបាលការិយាល័យជំនាញបានកសាងសំណុំរឿងបញ្ជូនទៅសាលាដំបូងខេត្ត ដើម្បីផ្តន្ទាទោសតាមច្បាប់ ៕ សមុទ្រខៀវ
http://ift.tt/1hrzNHq
