ជើងខ្លាំងខាងវាយ និងចាប់អារកដៃស្រី ត្រូវប៉ូលិសអញ្ចើញឲ្យទៅដេកគុក
ខេត្តព្រះសីហនុ៖ បុរសជើងខ្លាំងខាងវាយស្រីម្នាក់ ត្រូវបានកម្លាំងនគរបាលការិយាល័យព្រហ្មទណ្ឌ នៃស្នងការដ្ឋាននគរបាលខេត្តព្រះសីហនុ ធ្វើការឃាត់ខ្លួនភ្លាមៗ បន្ទាប់ពីសមត្ថកិច្ចទទួលបានពាក្យបណ្តឹងផ្ទាល់មាត់ពីស្ត្រីរងគ្រោះ។ ហេតុការនេះបានកើតឡើងនៅវេលាម៉ោង២៣ និង៣៥នាទីយប់ថ្ងៃទី១១ ខែឧសភា ឆ្នាំ២០១៥ នៅចំណុចផ្ទះយុវជនសង្ស័យស្ថិតក្នុងភូមិ៣ សង្កាត់លេខ៣ក្រុង ខេត្តព្រះសីហនុ។
លោកវរសេនីយ៍ទោ ញ៉ែត ភ័ណ្ឌ នាយការិយាល័យព្រហ្មទណ្ឌកម្រិតធ្ងន់បានអោយដឹងថា ជនសង្ស័យដែលសមត្ថកិច្ចឃាត់ខ្លួនតាមបណ្តឹងរបស់ស្ត្រីរងគ្រោះនេះមានឈ្មោះ ហុក ពិសិទ្ធ ហៅ ចៅវ៉ា ភេទប្រុស អាយុ២៩ឆ្នាំ មានមុខរបរជនសង្ស័យនោះ មានមុខរបរបើកហាងខារាអូខេ មានទីលំនៅភូមិ៣ សង្កាត់លេខ៣ក្រុង ខេត្តព្រះសីហនុ បានធ្វើសកម្មភាពអុកឡុកក្នុងហាងខារាអូខេមួយកន្លែង ស្ថិតក្នុងក្រុមទី២ភូមិ៤ សង្កាត់លេខ៤ ក្រុងព្រះសីហនុ ហើយបានយកកូនកាំបិតមុខពីរ អារដៃស្ត្រីរងគ្រោះឈ្មោះ ហេង ស្រី អាយុ២៧ឆ្នាំ រយះដេរចំនួន៦ថ្នេរនិងបានយកទូរស័ព្ទមួយគ្រឿងពីស្ត្រីរងគ្រោះ។
ប្រភពសមត្ថកិច្ចដ៏ដែលបានបន្តថា ក្រោយធ្វើសកម្មភាពអុកឡុកក្នុងហាង និងអារដៃស្ត្រីរង គ្រោះរួចមកយុវជនសង្ស័យបានឡើងជិះម៉ូតូ ទៅផ្ទះដេកធ្វើមិនដឹងរឿង រហូតសមត្ថកិច្ចទៅ ដល់ផ្ទះជនសង្ស័យ ដើម្បីហៅជនសង្ស័យមកបំភ្លឺជុំវិញករណីអារដៃស្ត្រីរងគ្រោះ តែបែរជាជនសង្ស័យ និងក្រុមគ្រួសារហាក់ពុំសហការជាមួយសមត្ថកិច្ច រហូតជិត១ម៉ោងទើបយុវជនសង្ស័យព្រមប្រគល់ខ្លួនអោយសមត្ថកិច្ច។
ចំណែកបងស្រីស្ត្រីរងគ្រោះបានបញ្ជាក់ថា ជនសង្ស័យ និង ប្អូនស្រី គឺជាគូរសង្សារនឹងគ្នាជាយូរឆ្នាំមកហើយ ប៉ុន្តែចាប់តាំងពីប្អូនស្រីរបស់នាងបានស្គាល់យុវជនសង្ស័យមក យុវជនសង្ស័យតែងតែវាយដុំធ្វើបាបជាញឹកញាប់ ទាំងនៅផ្ទះ និងនៅក្នុងហាងដែលនាងបើកជាមួយប្អូនស្រីរបស់នាង។ នៅយប់កើតហេតុជនសង្ស័យបានមកផឹកក្នុងហាងហើយស្រែកឡូឡាផ្អើលភ្ញៀវអស់ពីហាង។ មិនត្រឹមតែប៉ុណ្ណោះ ជនសង្ស័យបានអូសដៃប្អូនស្រីនាងទៅក្នុងបន្ទប់យកកាំបិតអារដៃហូឈាមដូចអារករមាន់ នៅពេលនោះដោយនាងភ័យពេកបានយកប្អូនស្រីទៅពេទ្យដេអស់៦ថ្នេរ បន្ទាប់មកទើបនាងមកដាក់ពាក្យបណ្តឹង។
បច្ចុប្បន្នជនសង្ស័យកំពុងត្រូវបានកម្លាំងនគរបាលការិយាល័យព្រហ្មទណ្ឌ នៃស្នងការដ្ឋាននគរបាលខេត្តព្រះសីហនុ បានកសាងសំណុំរឿងចាត់ការតាមផ្លូវច្បាប់៕ ដោយ សមុទ្រខៀវ
http://ift.tt/1JKXzXq