មេទាហានឈ្មោះហ៊ួត ប៊ុនគីម ចរាចរណ៍ឈើល្មើសច្បាប់ចំនួន១៤ រថយន្តយីឌុប ឆ្លងទៅវៀតណាមចេញតាមច្រកង៉ាំ០៦ គ្រប់គ្រងដោយ លោក ធឹម ធឿន ខណៈនោះគយចល័តចាប់បាន១រថយន្ត ហើយស្ទើរតែផ្ទុះអាវុធដាក់គ្នា
ខេត្តក្រចេះ៖ ភ្នាក់ងារខ្មែរអង្គរបានរាយការណ៍ពីស្រុកស្នួលខេត្តក្រចេះឲ្យដឹងថា នៅយប់ថ្ងៃសៅរ៍ ទី២ ខែឧសភានេះ លោក ហ៊ួត ប៊ុនគីម មេ គ៣ យោធាវរៈការពារព្រំដែនគោក២០៤ ចំណុះអោយតំបន់ប្រតិបត្តិការសឹងរងខេត្តក្រចេះ បានចរាចរណ៍ល្មើសច្បាប់ដឹកតាមរថយន្តធន់ធំ (យីឌុប) ចំនួន១៤គ្រឿង ឆ្លងទៅប្រទេសវៀតណាមចេញតាមច្រកង៉ាំ០៦ ក្រោមការគ្រប់គ្រងរបស់ លោក ធឹម ធឿន នាយប៉ុស្គិ៍នគរបាលច្រកត្រពាំងក្រញូង ដែលបច្ចុប្បន្នកាន់កាប់ច្រករបៀងចំនួន៦នៅឃុំ២ធ្នូ ក្នុងស្រុកស្នួល ខេត្តក្រចេះបានជួយសម្រួលបើកបារ៉ាស់ឲ្យការនាំឈើចេញទាំងយប់ទៅដោយរលូន។ ប៉ុន្តែក្នុងចំណោមរថយន្តដឹកឈើទាំង១៤គ្រឿងនោះ ចេញផុតទៅទឹកដីវៀតណាមចំនួន១៣គ្រឿង ហើយ១គ្រឿងទៀតត្រូវកម្លាំងចល័ត របស់លោក ព្រាប គារ៉ាត ក្រោមការបញ្ជាផ្ទាល់ពី លោក កើត សុទ្ធារ៉ា ប្រធាន នាយកដ្ឋានបង្កា និងបង្ក្រាបបទល្មើស សហការណ៍ជាមួយកម្លាំងកងរាជអាវុធហត្ថលើផ្ទៃប្រទេស ចាប់ឃាត់បានទាំងកណ្តាលយប់ថ្ងៃទី២ ខែឧសភា ឆ្នាំ២០១៥នេះ ក្នុងសភាពតានតឹងដាក់គ្នាស្ទើតែផ្ទុះអាវុធដាក់គ្នាទៀតផង។
ភ្នាក់ងារយើងបានរាយការណ៍ឲ្យដឹងទៀតថា ការដឹកនាំកម្លាំងចុះទៅបង្ក្រាបរបស់មន្ត្រីគយចល័តនោះធ្វើឡើងយឺតពេលបន្តិចទៅហើយក្រោយពីទទួលព័ត៌មានសម្ងាត់ថាមានក្បួនរថយន្តកំពុងតែដឹកឈើតម្រង់ទៅច្រកខាងលើ។ ទន្ទឹមគ្នានោះ លោក ហ៊ួត ប៊ុនគីម មេ គ៣ វរៈការពារព្រំដែនគោក២០៤ ដែលជាម្ចាស់ឈើនោះ បានប្រើប្រាស់កូនទាហានរបស់ខ្លួន សហការណ៍ជាមួយកម្លាំងប៉ុស្តិ៍នគរបាលច្រកង៉ាំ០៦ របស់ លោក ធឹម ធឿន ចេញមករារាំងការពារមិនឲ្យកម្លាំងបង្ក្រាបរុលទៅចាប់រថយន្តផ្សេងៗទៀតទេ ហើយបានធ្វើឲ្យ រថយន្តទាំង១៣គ្រឿង បានឆ្លងដែនចូលដីវៀតណាមផុតទៅដោយសុវត្ថិភាព។ នៅក្នុងហេតុការណ៍ចុះបង្ក្រាបនោះអ្នកសារព័ត៌មានរបស់ទូរទស្សន៍អប្សរា ប្រចាំខេត្តមណ្ឌលគិរីមួយរូប បានប្រើប្រាស់ទូរស័ព្ទដៃថតរូបភាពតែត្រូវ ទាហាកូនចៅលោក ហ៊ួត ប៊ុនគីម មេ គ៣ វរៈការពារព្រំដែនគោក២០៤ កំពុងតែកាង ជំនួញឈើល្មើសច្បាប់នោះ ដកហូតយកទំនងជាបង្កាចៀសវាងបែកធ្លាយរឿងល្មើសច្បាប់នេះ ដែលអាចផ្សាយនៅលើកញ្ចក់ទូរទស្សន៍ ។
លោក ហ៊ួត ប៊ុនគីម ជាមេ គ៣ យោធាវរៈការពារព្រំដែនគោក២០៤ ក្នុងឋានៈជាមេទាហានម្នាក់បាន បំពានវិន័យកងទ័ព ដោយបានប្រើប្រាស់កម្លាំងជាកូនទាហានក្រោមបង្គាប់ ឲ្យកាងជំនួញឈើល្មើសច្បាប់នាំចេញទៅវៀតណា និងបានធ្វើការរារាំងការបង្ក្រាបពីមន្ត្រីគយ។ លោក ហ៊ួត ប៊ុនគីម បច្ចុប្បន្នបានលូកដៃយ៉ាងជ្រៅធ្វើជំនួញឈើល្មើសច្បាប់ បើទោះជាមានបទបញ្ជាពីសម្តេចអគ្គមហាសេនាបតីតេជោ ហ៊ុន សែន ឲ្យកងទ័ពដកខ្លួនចេញឲ្យឆ្ងាយពីបទល្មើសព្រៃឈើ និងព្រមានដកហូតបុណ្យស័ក្តិចាប់ផ្តន្ទាទោសយ៉ាងណាក៏ដោយ តែលោក ហ៊ួត ប៊ុនគីម មិនព្រួយបារម្ភឡើយ ដោយលោក ហ៊ួត ប៊ុនគីម មានទំនាក់ទំនងល្អជាមួយ លោក ស ចំរ៉ុង អភិបាលខេត្ត, លោក លន់ សុផាត ស្នងការស្នងការនគរបាលខេត្តក្រចេះ និង លោក ធឹម ធឿន នាយប៉ុស្គិ៍នគរបាលច្រកត្រពាំងក្រញូង ដែលបច្ចុប្បន្នកាន់កាប់ច្រករបៀងចំនួន៦នៅឃុំ២ធ្នូ ក្នុងស្រុកស្នួល ខេត្តក្រចេះ ជួយលាក់បាំង ចាំជួយសម្រួលបើកបារ៉ាស់កុងត្រូល ឲ្យការនាំឈើចេញទៅវៀតណាម គ្មានឧបស័គ្គអ្វីឡើយ ដែលនេះជាការឃុបឃិតគ្នារបស់មន្ត្រីមានអំណាច។
ដោយឡែកថ្មីៗនេះ កាលពីមុនចូលឆ្នាំថ្មីប្រពៃណីខ្មែរថ្ងៃទី១២ មេសានោះ មេឈ្មួញឈើឈ្មោះ លោក ហ៊ួត ប៊ុនគីម បានរត់ការ នាំឈើ ៦រថយន្តធំៗ តាមច្រករបៀង ៦២ និងច្រករបៀង ប៊ិនឌ៊ាំង ដែលគ្រប់គ្រង់ដោយលោក ធឹម ធឿន ទៅប្រទេសវៀតណាមដោយសុវត្ថិភាព។ ហេតុដែលនាំឲ្យលោក ហ៊ួត ប៊ុនគីម ធ្វើជំនួញឈើនាំចេញទៅវៀតណាមយ៉ាងគគ្រឹកគគ្រេងមិនខ្លាចអាជ្ញាធរខេត្តមានវិធានការបង្ក្រាបនោះ ប្រភពមួយបានទម្លាយថា លោក ហ៊ួត ប៊ុនគីម បានចំណាយលុយបង់១រថយន្តចំនួន២ពាន់ដុល្លារ ឲ្យលោក ធឹម ធឿន នាយប៉ុស្គិ៍នគរបាលច្រករបៀង យកទៅបែងចែកឲ្យ លោក លន់ សុផាត ស្នងការស្នងការនគរបាលខេត្តក្រចេះ និងលោក ស ចំរ៉ុង អភិបាលខេត្តក្រចេះ ហេតុដូច្នេះហើយទើបគ្មានបទបញ្ជាម្តងណាឡើយពីគណៈបញ្ជាការឯកភាពខេត្តក្រចេះ ឲ្យជំនាញបង្ក្រាបទាល់តែសោះ។
ដោយឡែកប្រភពមួយបានអះអាងថា មន្ត្រីគយចល័តជាជំនួយការលោក កើត សុធារ៉ា មេគយចល័តចុះបង្ក្រាប នោះដោយសារតែមិនត្រូវរូវតម្លៃបង់ក្បាលឡានគ្នា ដោយខាងគយទារឲ្យលោក ហ៊ួត ប៊ុនគីម បង់ ១ឡាន ៨០០ដុល្លារ តែកន្លងទៅ បង់ឲ្យតែ៥០០ ដុល្លារ ហើយការចេញឈើចំនួន១៤ឡាននេះទៀតទំនងលោក ហ៊ួត ប៊ុនគីម លោតឆ័ត្រ ចង់ផ្តាច់របបគយ តែចៃដន្យជំនាញគយបានដាក់កម្លាំងបង្កប់ឲ្យការណ៍ទើបមានការប្រទាំងប្រទើសគ្នានេះដែលសឹងតែផ្ទុះអាវុធនេះ។ គេចាំមើលលោក ស ចំរ៉ុង អភិបាលខេត្តក្រចេះ លោក លន់ សុផាត ស្នងការស្នងការនគរបាលខេត្តក្រចេះ និង លោក ធឹម ធឿន នាយប៉ុស្គិ៍នគរបាល ដែលបច្ចុប្បន្នកាន់កាប់ច្រករបៀងចំនួន៦នៅឃុំ២ធ្នូ ក្នុងស្រុកស្នួល ខេត្តក្រចេះ(ជាមន្ត្រីស្និទនឹងលោក លន់ សុផាត ) សុទ្ធតែអ្នកនៅពីក្រោយខ្នងចាំជួយសម្រួលបើកបារ៉ាស់កុងត្រូល ឲ្យការនាំឈើចេញទៅវៀតណាមមិនថាយប់ ឬថ្ងៃទេគឺទៅដោយរលូន ប្រឆាំងនឹងបទបញ្ជាដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន ដែលគេអាចចាត់ទុកថាជាប្រភេទមន្ត្រីបន្ទាបបន្ថោក និងហ៊ានប្រឆាំងហ្វាយនាយខ្លួនឯង បន្តទង្វើប្រមាទនេះនេះបានដល់ពេលណា?៕ ដោយ ឦសាន១
http://ift.tt/1I3YUJZ
