បុរសចំណាស់ម្នាក់ បាក់កដៃបែកមុខដោយសារជិះម៉ូតូរេទៅបុករថយន្តបញ្ច្រាសទិសចំពីមុខយ៉ាងកំរោល
ខេត្តកណ្តាល៖ បុរសវ័យចំណាស់ម្នាក់សង្ស័យស្រវឹងស្រា ជិះម៉ូតូម៉ាកសង់កូរ៉េ ម្នាក់ឯងកណ្តាលថ្ងៃភ្លឺយ៉ាងច្បាស់ចែសប្រាប់តែរេចូលទៅបុករថយន្ត ម៉ាក CANTER ចំពីមុខពេញទំហឹងដួលបែកមុខមាត់ហូរឈាមពេញមុខរបួសធ្ងន់ កាលពីវេលាម៉ោង១៣ និង៤៥នាទី ថ្ងៃទី២ ខែឧសភា ឆ្នាំ២០១៥ នៅចំណុចលើផ្លូវលំ ភូមិ ព្រៃទទឹង ឃុំលំហាច ស្រុកអង្គស្នួល ខេត្តកណ្តាល។
នគរបាលស្រុកអង្គស្នួលបានឲ្យដឹងថា៖ បុរសចំណាស់របួសធ្ងន់នោះមានឈ្មោះ មុត ម៉ុន ភេទប្រុស អាយុ៥២ឆ្នាំ កសិកររស់នៅភូមិ កណ្តោស ឃុំលំហាច ស្រុកអង្គស្នួល ខេត្តកណ្តាល ជិះម៉ូតូម៉ាកសង់កូរ៉េ ពណ៌ក្រហម ពាក់ស្លាកលេខកំពង់ស្ពឺ ១D- ៥០៧០ បើកបើកបរ ទិសដៅពីកើតទៅលិច គ្មានមួក គ្មានកញ្ចក់ លុះមកដល់ចំណុចខាងលើ បានទៅបុក និងរថយន្ត ម៉ាកCANTER ពណ៌ស ពាក់ស្លាកលេខ ភ្នំពេញ ៣.A-៨២៨១បើកបរដោយឈ្មោះ គួន ង៉ុក ភេទប្រុស អាយុ២១ឆ្នាំ នៅភូមិព្រៃគោ ឃុំ លំហាច ស្រុកអង្គស្នួល ខេត្តកណ្តាល ដែលកំពុងបើកបរបញ្ច្រាស់ទិសគ្នា បណ្តាលឲ្យអ្នកបើកម៉ូតូរបួសធ្ងន់ បាក់កដៃ ខូចខាត ម៉ូតូ និង រថយន្តយ៉ាងដំណំ។
បន្ទាប់ពីកើតហេតុ នគរបាលស្រុកអង្គស្នួល បានចុះវាសវែង និងនាំយករថយន្ត និងម៉ូតូទៅ រក្សាទុកបណ្តោះអាសន្ននៅអធិការដ្ឋាននគរបាលស្រុកអង្គស្នួល ដើម្បីរងចាំដោះស្រាយពេលក្រោយ ៕ ដោយ គិរី
http://ift.tt/1I3cNIh