ភ្លើងឆេះម៉ត់គ្មានសល់ ពេលម្ចាស់រវល់ចេញទៅច្រៀងតាមរោងការ
ខេត្តព្រះសីហនុ៖ ផ្ទះមួយខ្នងទំហំ៥គុណ១០ម៉ែត្រ ធ្វើអំពីឈើប្រកស័ង្កសីត្រូវបានភ្លើងឆេះម៉ត់ អស់ទាំងស្រុងកាលពីវេលាម៉ោង២០ និង៣០នាទីនៅចំណុចក្រុមទី១៤ ភូមិ៥ សង្កាត់លេខ៤ ក្រុងព្រះសីហនុ ខណៈពេលម្ចាស់មិននៅរវល់ទៅច្រៀងតាមរោងការដែលបានបណ្តាឲ្យខូចខាតទ្រព្យសម្បត្តិទាំងស្រុង។
យោងតាមប្រភពពីសមត្ថកិច្ចមូលដ្ឋានបានអោយដឹងថា៖ ផ្ទះមួយខ្នងនេះត្រូវបានភ្លើងឆេះអស់ទាំងស្រុង បើទោះបីជាមានការជួយអន្តរាគមន៍ពីប្រជាពលរដ្ឋដែលរស់នៅក្បែរៗនិងសមត្ថកិច្ចយ៉ាងណាក៏ដោយ។ ខណៈពេលអគ្គីភ័យកើតឡើងនោះ ម្ចាស់ផ្ទះពុំបាននៅទេ ដោយគេបានចាក់សោរចោលរវល់ទៅច្រៀងតាមរោងការ។
ក្នុងហេតុការណ៍នោះភ្លើងឆេះសន្ធោសន្ធៅទៅហើយ សមត្ថកិច្ចបានត្រឹមតែទប់ស្កាត់មិន អោយឆាបឆេះទៅកាន់ផ្ទះអ្នកជិតខាង ដោយប្រើប្រាស់រថយន្តពន្លត់អគ្គីភ័យចំនួន៥គ្រឿង និង ទឹកចំនួន៥រថយន្ត ក្នុងរថយន្តពន្លត់អគ្គីភ័យរបស់ស្នងការនគរបាលចំនួន០២គ្រឿង រថយន្តពន្លត់អគ្គីភ័យរបស់កំពង់ផែស្វយ័ត្នចំនួន០២គ្រឿង និងរថយន្តពន្លត់អគ្គីភ័យរបស់ កងរាជអាវុធហត្ថចំនួន០១គ្រឿងផងដែរ។
អាជ្ញាធរមូលដ្ឋានបានឲ្យដឹងថា៖ ម្ចាស់ផ្ទះជនរងគ្រោះមានឈ្មោះ អុច សំអុល ភេទប្រុស អាយុ៤៧ឆ្នាំត្រូវជាប្តី និង ប្រពន្ឋឈ្មោះ យឿន ចន្ធី ភេទស្រីអាយុ៣៧ឆ្នាំ មុខរបរអ្នកចម្រៀងនៅវង់តន្ត្រីរស្មីកំពង់សោម។ សម្ភារៈដែលបាត់បង់ក្នុងអគ្គីភ័យនេះរួមមាន៖ ខារាអូខេ០១ឈុត ទូរទស្សន៍៣ ទូរទឹកកក០១ និង កង្ហារចំនួន០៣។
ដោយឡែកយោងតាមប្រភពសាក្សីនៅក្បែរផ្ទះរងគ្រោះបានអោយដឹងថា៖ នៅមុនកើតហេតុ គេបានឮសូរសម្លេងផ្ទុះនៅក្នុងផ្ទះ ប៉ុន្តែគេពុំមានការចាប់អារម្មណ៍នោះទេ រហូតដល់មានផ្សែង និងអណ្តាតភ្លើងទើបដឹងថា ភ្លើងឆេះផ្ទះក៏នាំគ្នាស្ទុះស្ទារមកជួយពន្លត់ ប៉ុន្តែមិនអាចជួយបាននោះទេ ព្រោះភ្លើងបានឆេះពេញក្រមុំទៅហើយ ដោយបានលេបត្របាក់ផ្ទះទាំងស្រុងមួយរំពេច។ក្នុងឧប្បត្តិហេតុនេះពុំបានបណ្តាលអោយនរណាម្នាក់រងរបូស ឬបាត់បង់ជីវិតនោះទេ។
យោងតាមការសន្និដ្ឋានជំហានតំបូង អគ្គីភ័យនេះបង្ករឡើងដោយឆ្លងចរន្តអគ្គីសនីនៅក្នុងផ្ទះគាប់ជួនម្ចាស់ផ្ទះមិននៅទើបធ្វើអោយ ឆាបឆេះលឿនដូចនេះ៕ ដោយ សមុទ្រខៀវ
http://ift.tt/1dATafB