ជិះម៉ូតូឌុបគ្នាចេញពីស៊ីការ បុកអ្នកជិះកង់ ពីក្រោយពេញទំហឹង របួសក្បាលធ្ងន់ធ្ងរទាំង៣នាក់ ព្រោះតែអត់បានពាក់មួកសុវត្តិភាព
ខេត្តកំពង់ឆ្នាំង៖ យុវជន៣នាក់បានរបួសក្បាលធ្ងន់ធ្ងរ ក្នុងករណីគ្រោះថ្នាក់ចរាចរណ៍មួយ ដោយ អ្នកបើកម៉ូតូឌុបគ្នាពីរនាក់ចេញពីស៊ីការគេក្នុងសភាពស្អុយស្រា បានជិះបុក អ្នកជិះកង់ពីក្រោយពេញទំហឹង ហើយអ្នកទាំង៣នាក់ដួលបោកក្បាលលើថ្នល់ហូរឈាមរបួសធ្ងន់ធ្ងរដូចៗគ្នា។ ហេតុការណ៍នេះបានកើតឡើងនៅម៉ោង៨និង៣០នាទីយប់ថ្ងៃទី១៣ ខែឧសភា ឆ្នាំ២០១៥ លើផ្លូវជាតិលេខ៥ ក្នុងភូមិទី៨ សង្កាត់ខ្សាម ក្រុងកំពង់ឆ្នាំង។
សមត្ថកិច្ចនគរបាលចរាចរណ៍ក្រុងកំពង់ឆ្នាំងបានអោយដឹងថា៖ មុនពេលកើតហេតុ យុវជន២នាក់ មានឈ្មោះ យូ សុខខេង អាយុ២៧ឆ្នាំ ជាអ្នកបើកម៉ូតូម៉ាកហុងដាឌ្រីម ពណ៌ខ្មៅពាក់ផ្លាកលេខ កំពង់ឆ្នាំង 1B-3852 ក្នុងល្បឿនលឿនចេញពីស៊ីការដោយឌុប ឈ្មោះ សំ រិទ្ធ អាយុ២៦ឆ្នាំ គេទាំង២នាក់រស់នៅភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរ។ លុះមកដល់ចំណុចកើតហេតុ ទំនងជាគេបើកជែងយានយន្តណាមួយ ក៏បានជ្រុលចង្កូតទៅបុកកង់មួយគ្រឿងកំពុងជិះដោយយុវជន ឈ្មោះ ដុង ឧត្តម អាយុ ២៥ឆ្នាំ រស់នៅភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំ ពីក្រោយពេញទំហឹង បណ្តាល អោយពួកគេទាំង៣នាក់ដួលបោកក្បាលផ្ទប់នឹងផ្លូវជាតិ របួសធ្ងន់ធ្ងរទាំង៣នាក់ ដោយសារអត់បានពាក់មួកសុវត្តិភាព។
ក្រោយពេលកើតហេតុ សមត្ថកិច្ចបានហៅរថយន្តសង្គ្រោះ មកដឹកជនរងគ្រោះទាំង៣នាក់ទៅកាន់មន្ទីរពេទ្យខេត្តកំពង់ឆ្នាំង ដើម្បីសង្គ្រោះព្យាបាល។នៅក្នុងមន្ទីរពេទ្យសមត្ថកិច្ចពិនិត្យឃើញយុវជនជិះម៉ូតូទាំង២នាក់ធំក្លិនស្រា របួសក្បាលធ្ងន់ធ្ងរហូរឈាមតាមចៀក និងសន្លប់ស្តូកស្តឹងមានសង្ឃឹមតែ៥០%ប៉ុណ្ណោះ។ ចំណែកយុវជនជិះកង់របួសក្បាលធ្ងន់ដូចគ្នា តែគេនៅមានស្មារតីចងចាំនៅឡើយ ពេលសមត្ថកិច្ចសួរនាំឈ្មោះ។
ម៉ូតូនិងកង់ខូតខាតជាមធ្យម ត្រូវបានសមត្ថកិច្ច ដឹកយកមករក្សាទុកនៅក្នុងអធិការដ្ឋាននគរបាលក្រុងកំពង់ឆ្នាំង កសាងសំណុំរឿងតាមនិតិវិធី។ ករណីគ្រោះថ្នាក់ចរាចរណ៍ខាងលើនេះ ត្រូវបានសមត្ថកិច្ចសន្និដ្ឋានថា៖ បណ្តាលមកពីបើកបរក្នុងស្ថានភាពស្រវឹង និងបើកជែងក្នុងស្ថានភាពគ្រោះថ្នាក់ និងមិនបានពាក់មួកសុវត្តិភាព ទើបបង្កអោយមានគ្រោះថ្នាក់របួសក្បាលធ្ងន់ធ្ងរបែបនេះ៕ ដោយ រិទ្ធិ ជ័យ
http://ift.tt/1cYpWr3