ប្រជាកសិករធ្វើចំការតាមដងទន្លេ ប្រមូលផលល្ងបានរាប់រយតោនក្នុងឆ្នាំនេះប៉ុន្តែតម្លៃទាបជាងឆ្នាំមុន
ខេត្តកំពង់ឆ្នាំង៖ ដំណាំល្ងនៅក្នុងឆ្នាំនេះ ត្រូវបានប្រជាកសិករដែលរស់នៅតាមដងទន្លេបាននាំ គ្នាដាំដុះ យ៉ាងផុលផុស ព្រោះតែល្ងមានតំលៃខ្ពស់។ ជាក់ស្តែងរយៈពេល២ខែនេះ ប្រជាកសិករបានប្រមូលផលល្ង យកមក លក់នៅទីផ្សារបានរាប់រយតោន ហើយត្រូវបានឈ្មួញ កណ្តាលដឹកជញ្ជូនយកទៅលក់នៅភ្នំពេញ និងបន្តទៅលក់ នៅ ប្រទេសជិតខាង។
នៅព្រឹកថ្ងៃទី២៩ ខែមេសា ឆ្នាំ២០១៥ គេឃើញនៅកំពង់ផែរមាត់ទន្លេផ្សារក្រោម ក្នុងសង្កាត់ផ្សារឆ្នាំង មានកាណូតធំៗជាច្រើនគ្រឿងបានដឹកផលល្ងរាប់សិបតោន យកមកលក់អោយឈ្មួញកណ្តាលនៅក្នុងភូមិចុងកោះ សង្កាត់ផ្សារឆ្នាំង។នៅតាមផ្ទះល្វែងមាត់ទន្លេផ្សារក្រោមប្រមាណជាង១០កន្លែង គេឃើញឈ្មួញកណ្តាលដែលជា អ្នកទទួលទិញផលល្ងស្តុកទុកក្នុង១ផ្ទះៗរាប់សិបតោន។លោក ឡេង សារុន ជាអ្នកទទួលទិញផលល្ងម្នាក់ បាននិយាយអោយដឹងថា៖ គាត់បានទទួលទិញផលល្ងនេះរយៈ ពេល២ខែហើយ ប៉ុន្តែផលល្ងក្នុងឆ្នាំនេះ បានថយចុះ ជាងឆ្នាំមុន ដោយសាតែធាតុអាកាសក្តៅខ្លាំង។ ដោយឡែកតម្លៃល្ងនៅក្នុងថ្ងៃនេះ ក្នុង១គីឡូក្រាមទិញចូល ៧៦០០ រៀល ប្រៀបធៀបនឹងឆ្នាំចាស់ទិសចូល៨០០០រៀល។
#អ្នកបើកបររថយន្តម្នាក់ ឈ្មោះ សាវុធ ជាអ្នកស៊ីឈ្នួលដឹកល្ងពីខេត្តកំពង់ឆ្នាំងយកទៅភ្នំពេញបាន និយាយអោយ ដឹងថា៖ ជាង១០ថ្ងៃនេះគាត់បានដឹកល្ងក្នុងថ្ងៃបាន១ជើង និងក្នុង១ជើងមានទម្ងន់១០តោន យកទៅអោយថៅកែ ស្តុកទុកនៅទីក្រុងភ្នំពេញ ហើយល្ងនេះត្រូវឈ្មួញទិញបន្តយកទៅលក់នៅប្រទេសវៀតណាម និងចិន។
#លោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំងបាននិយាយអោយដឹងនៅព្រឹកថ្ងៃទី២៩ ខែមេសា ឆ្នាំ២០១៥ នេះថា៖ តាមរបាយការណ៍ដែលលោកទទួលបានពីបណ្តាស្រុក មកដល់សប្តាហ៍នេះ ប្រជាកសិករក្នុងខេត្តកំពង់ ឆ្នាំង ដាំដុះល្ងលើផ្ទៃដីសរុបចំនួន៥២០ហិកតា និងប្រមូលផលល្ងបានចំនួន២៥០តោនហើយ ស្មើនឹង៩០% នៃ ផលសរុប។ ដោយឡែកការប្រមូលផលល្ងក្នុង១ហិកតាប្រមូលផលបានពី៦០០ទៅ៧០០គីឡូក្រាម។
#លោក ប៉ាត់ គន ជាអ្នកដាំល្ងម្នាក់រស់នៅក្នុងភូមិផ្លូវទូក ឃុំផ្លូវទូ ស្រុកកំពង់លែងបាននិយាយអោយដឹងថា៖ ការដាំដុះដំណាំល្ងនេះ ត្រូវមានការថែទាំបាញ់ថ្នាំការពារសត្វល្អិត បាញ់ថ្នាំបំប៉នផ្លែផ្កាអោយបានម៉ត់ចត់ដែលក្នុង ១ហិកតា ត្រូវចំណាយថវិកាទិញថ្នាំបាញ់អស់ប្រាក់ពី៥០ទៅ៦០ម៉ឺនរៀល ហើយនឹងត្រូវទទួលផលមកវិញក្នុងរយៈ ពេល៣ខែកន្លះទៅ៤ខែ និងបានផលពី៧០០ទៅ៨០០គីឡូក្នុង១ហិកតា នឹងអាចលក់បានប្រាក់ក្នុង១ហិកតាពី ១៥០០ទៅ២០០០ដុល្លាតាមតម្លៃថ្លៃឬថោក គឺបានកម្រៃខ្ពស់ជាងដំណាំផ្សេងៗធ្វើអោយជីវភាពគ្រួសារ ពួកគាត់ បានធូធារមួយកំរិតផងដែរ៕ ដោយ រិទ្ធិ ជ័យ
http://ift.tt/1JWGKs8
