ប្រជាពលរដ្ឋឃុំក្បាលទឹកទទួលមុងគ្រែចំនួន១.៦៥៧មុង និងមុងអង្រឹងចំនួន៧៤៥មុង ពីរាជរដ្ឋាភិបាល
ខេត្តកំពង់ឆ្នាំង ៖ អនុវត្តតាមផែនការរបស់រាជរដ្ឋាភិបាល ក្នុងការលុបបំបាត់ជំងឺគ្រុនចាញ់ អោយអស់នៅឆ្នាំ២០២៥ នៅព្រឹកថៃ្ងទី២២ ខែមិថុនា ឆ្នាំ២០១៥ លោក ឈួរ ច័ន្ទឌឿន អភិបាលខេត្តកំពង់ឆ្នាំង លោកប្រាក់ វ៉ុន ប្រធានមន្ទីរសុខាភិបាលខេត្ត លោកលោកស្រី ប្រធាន អង្គភាពជុំវិញខេត្តបានអញ្ជើញចុះសាកសួរសុខទុក្ខ និងនាំយកមុងទៅចែកជូន ប្រជា ពលរដ្ឋសរុបចំនួន៧៤៥ គ្រួសារ មកពី៧ភូមិ ក្នុងឃុំក្បាលទឹក ស្រុកទឹកផុសខេត្ត កំពង់ឆ្នាំង ក្នុងនោះមានមុងអង្រឹងចំនួន៧៤៥មុង និងមុខគ្រែចំនួន១៦៥៧មុង។
លោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានអោយដឹងថា៖ ក្នុងឆ្នាំ ២០១៥ នេះរយៈពេល៥ខែនេះ មានករណីគ្រុនចាញ់សរុបព្យាបាលដោយ សេវាសា ធារណៈ និងព្យាបាលដោយអ្នកស្ម័គ្រចិត្តភូមិ បានចំនួន៣០៦ករណីក្នុងនោះសេវាសាធារ ណៈចំនួន១៤៨ករណី និងព្យាបាលដោយអ្នកស្ម័គ្រចិត្តភូមិ១៥៨ករណី។
លោកបានបន្តទៀតថា៖ ក្នុងឆ្នាំ២០១៥នេះមន្ទីរសុខាភិបាលខេត្តបានសហការជាមួយ ស្រុកប្រតិបត្តិមណ្ឌលសុខភាពមេភូមិ និងភ្នាក់ងារទ្រទ្រង់ភូមិបានចុះធ្វើជំរឿនស្រង់ ស្ថិតិ តាមភូមិគោលដៅក្នុងតំបន់ប្រឈម និងគ្រុនចាញ់មានចំនួន១២០ភូមិ(មានស្រុកទឹកផុស, បរិបូណ៌,សាមគ្គីមានជ័យ,រលាប្អៀរ,និងកំពង់លែង) ស្មើនិងប្រជាពលរដ្ឋចំនួន៨៣.៦៥៥ នាក់ស្មើ និង២១.៩៦៦គ្រួសារដែលក្នុងមួយគ្រួសារត្រូវទទួលបានមុងអង្រឹង១និងមុខគ្រែ ដេក២នាក់១។
សំណេះសំណាលនៅក្នុងឱកាសនោះលោក ឈួរ ច័ន្ទឌឿន អភិបាលខេត្តកំពង់ឆ្នាំង បានមានប្រសាសន៍ថា៖ រាជរដ្ឋាភិបាលដែលដឹកនាំដោយសម្តេចតេជោ ហ៊ុន សែន ជាប្រមុខ បានអនុម័តធ្វើការលប់បំបាត់ជំងឺគ្រុនចាញ់អោយអស់នៅក្នុងឆ្នាំ២០២៥។ ដើម្បីឆ្ពោះទៅលប់បំបាត់បានជំងឺគ្រុនចាញ់នៅទូទាំងប្រទេសកម្ពុជាត្រូវខិតខំប្រឹងប្រែងយ៉ាងខ្លាំងក្លាក្នុងការលប់បំបាត់មេរោគគ្រុនចាញ់គ្រប់ប្រភេទ នៅក្នុងព្រះរាជណាចក្រកម្ពុជាអោយបាន អស់នៅឆ្នាំ២០១៥នេះតាមយុទ្ធសាស្ត្ររបស់រាជរដ្ឋាភិបាល អោយសំរេចបានលទ្ធផល ដោយជោគជ័យ និងមានប្រសិទ្ធិភាពខ្ពស់។
លោក ឈួរ ច័ន្ទឌឿន អភិបាលខេត្ត ក៏បានផ្តាំផ្ញើដល់ប្រជាពលរដ្ឋដែលរស់នៅក្នុងតំបន់ ប្រឈម និងជំងឺគ្រុនចាញ់ទូទាំងខេត្តកំពង់ឆ្នាំងត្រូវយកចិត្តទុកដាក់ថែទាំសុខភាពអោយ បានល្អនិងក្រុមគ្រួសារត្រូវធ្វើយ៉ាងណាជៀសអោយផុតពីជំងឺគ្រុនចាញ់ដ៏កាចសាហាវនេះដើម្បីការពារបានប្រជាពលរដ្ឋទាំងអស់ត្រូវគេងក្នុងមុងជាប្រចាំចៀសវាងយកមុងទៅប្រើប្រាស់ខុសទិសដៅ និងបើសង្ស័យថាខ្លួនមានជំងឺគ្រុនចាញ់សូមទៅពិនិត្យនិងព្យាបាល នៅមន្ទីរពេទ្យដែលនៅជិតអោយបានទាន់ពេលវេលា៕ដោយ រិទ្ធិ ជ័យ
http://ift.tt/1SJfhja
