ខណៈផ្ទះកំពុងភ្លើងឆេះបំផ្លាញម្ចាស់ផ្ទះទាំងពីរនាក់ប្តីប្រពន្ធភ័យដួលសន្លប់
ខេត្តរតនគិរី៖ លំនៅដ្ឋានមន្ត្រីប៉េអឹមខេត្តរតនគិរីម្នាក់ដែលមានទីតាំងខាងក្រោយផ្សារបានលុង ស្ថិតក្នុងភូមិជ័យជំនះ សង្កាត់ឡាបានសៀក ក្រុងបានលុង ត្រូវបានភ្លើងឆាប់ឆេះយ៉ាងសន្ធោសន្ធៅ បង្កការភ័យឆោឡោពេញផ្សារក្រុងបានលុងកាលពីវេលាម៉ោង៩ និង៤៥នាទី ថ្ងៃទី២៧ ខែមិថុនា ឆ្នាំ២០១៥ ។ ប្រភពជំហានដំបូងបានអះអាងថាបណ្តាលមកពីទុសេចន្តរអគ្គីសនី ផ្តើមចេញពីផ្ទះមន្ត្រីប៉េអឹមឈ្មោះ ទុយ គឹមហួន ដែលផ្ទះសង់អំពីឈើលើថ្មក្រោមប្រក់ស័ង្កសី ទំហំទទឹង៨ម៉ែត្រ បណ្តោយ១២ម៉ែត្រ។
ក្រោយពេលកើតហេតុប្រមាណជាង២០នាទី គេឃើញរថយន្តមួយគ្រឿងបានមកដល់ ប៉ុន្តែប្រើការមិនកើតឡើយ។ ហើយប្រហែលជា២០នាទីទៀតទើបមានរថយន្តមួយគ្រឿងទៀតមកដល់ ប៉ុន្តែមានការយឺតយ៉ាវដោយសារកកស្ទះចរាចរណ៍ណែនតាន់តាប់មនុស្សម្នាលចោមរោមមើល ហេតុការណ៍នោះ ដោយមានការអន្តរាគមន៍ពីសមត្ថកិច្ចទើបរថយន្តពន្លត់អគ្គីភ័យដល់កន្លែងកើតហេតុបាញ់ទឹកពន្លត់ទាន់ពេលវេលា បណ្តាលឲ្យផ្ទះពីរល្វែងសងខាងទទួលរងនូវការឆាប់ឆេះផ្សែងរោលៗ មិនបណ្តាលឲ្យឆាប់ឆេះធ្ងន់ធ្ងរនោះទេ។
ប្រភពពីកន្លែងកើតហេតុពេលភ្លើងកំពុងឆាប់ឆេះជំហានដំបូងមានសន្ទុះឡើងយ៉ាងខ្លាំងធ្វើឲ្យម្ចាស់ផ្ទះឈ្មោះទុយ គឹមហួន ជាមន្ត្រីប៉េអឹមមានការតក់ស្លុតរហូតសន្លប់ទាំងពីរនាក់ប្តីប្រពន្ធ ហើយរថយន្តសង្គ្រោះបញ្ជូនទៅមន្ទីរពេទ្យបង្អែកខេត្តក្នុងពេលកើតហេតុ។ បន្ទាប់ពីមានហេតុការណ៍ភ្លើងកំពុងឆេះគេសង្កេតឃើញការជញ្ជូនចេញជំលៀសសុទ្ធសឹងតែជាគ្រឿងសង្ហារឹមខ្នាតយក្ខធ្វើអំពីឈើប្រណីតនិងឈើប្រណីតមិនទាន់កែច្នៃមួយចំនួនទៀតដឹកតាមរថយន្តជាបន្តបន្ទាប់។ ហើយប្រជាពលរដ្ឋដែលមានផ្ទះល្វែងជាប់ៗគ្នាកន្លែងដែលកំពុងឆេះក៏មមាលញឹកក្នុងការជញ្ជូនសម្ភារៈទ្រព្យសម្បត្តិរៀងៗខ្លួនចេញពីក្នុងផ្ទះដាក់តាមដងផ្លូវ។ ទោះយ៉ាងណាក្នុងហេតុការអគ្គិភ័យឆាប់ឆេះលំនៅដ្ឋានមួយនេះពុំទាន់បានដឹងចំនួនខូចខាតសម្ភារៈ ទ្រព្យសម្បត្តិពិតប្រាកដនៅឡើយទេ។
សូមបញ្ជាក់ថាទីតាំងដែលអគ្គីភ័យកំពុងឆាប់ឆេះនេះគឺធ្លាប់ទទួលរងការឆាប់ឆេះក្បែរបរិវេណផ្ទះជាប់ៗគ្នានេះចំនួន៣លើកមកហើយក៏បណ្តាលឲ្យស្ត្រីចំណាស់ម្នាក់ស្លាប់នៅក្នុងភ្លើងឆេះនោះទៀតផងកាលពីប៉ុន្មានឆ្នាំកន្លងទៅ បូករួមទាំងករណីមួយនេះទៀត ។ ហើយក្នុងខែមិថុនានេះក៏មានអគ្គីភ័យបានលេបត្របាក់លំនៅដ្ឋានចំនួន២លើកមកដែរ លើកទីមួយកើតឡើងនៅផ្ទះលក់សម្លចាណាង (តាមភាសារបស់ជនជាតិដើមភាគតិចឡាវធ្លាប់ហៅ)របស់ឈ្មោះ ថន ធុន ភេទប្រុស អាយុ៥៧ឆ្នាំ ជាមន្ត្រីយោធាតំបន់ប្រតិបការសឹករងខេត្ត ដែលបានកើតឡើងនៅថ្ងៃទី២២ ខែមិថុនា ឆ្នាំ២០១៥ ហើយលើកទី២កើតឡើងនៅថ្ងៃទី២៧ ខែមិថុនា ឆ្នាំ២០១៥ ផ្ទះរបស់មន្ត្រីកងរាជអាវុធហត្ថខេត្តឈ្មោះទុយ គឹមហួន ដែលនៅជាប់ខាងត្បូងផ្សារបានលុង ស្ថិតនៅភូមិជ័យជំនះ សង្កាត់ឡាបានសៀក ក្រុងបានលុង នេះតែម្តង។
គួរបញ្ជាក់ផងដែរថានៅក្នុងហេតុការណ៍អគ្គិភ័យឆាបឆេះនេះ មានរថយន្តពន្លត់អគ្គិភ័យចំនួន២គ្រឿង និងសមត្ថកិច្ចគ្រប់លំដាប់ចុះមកជួយធ្វើអន្តរាគមន៍ ដើម្បីដោះស្រាយតាមស្ថានភាពជាក់ស្តែង៕ លី វណ្ណៈ
http://ift.tt/1RNJzyZ
