ស្ត្រីវ័យក្មេងជាប្រពន្ធចង ក សម្លាប់ខ្លួនដោយសារភ្លើងប្រចណ្ឌ និងបានថតសម្លេងទុកក្នុងទូរស័ព្ទដៃផ្តាំប្តីថា៖« បងមានគេហើយ បងស្រឡាញ់គេជាងខ្ញុំ ខ្ញុំសូមលាបងសិនហើយ»
ខេត្តកំពង់ឆ្នាំង៖ អណ្តាតភ្លើងប្រចណ្ឌបានឆេះងំក្នុងឱរាធ្វើឲ្យការរស់នៅមិនសូវចុះសម្រុងនឹងគ្នា ស្ត្រីជាប្រពន្ធវ័យក្មេងម្នាក់បានសម្រេចចិត្តចងកសម្លាប់ខ្លួន ចោលប្តីដែលខ្លួនខំស្រឡាញ់ ដោយបានបន្សល់ទុកសម្លេងក្នុងទូរស័ព្ទរៀបរាប់ពីភាពស្មោះត្រង់ដែលខំស្រឡាញ់ប្តី តែប្តីបែរជាមានស្រីថ្មីស្រឡាញ់ជាងខ្លួន និងសុំឲ្យប្តីជួយធ្វើបុណ្យឧទិ្ទសកុសលឲ្យនាងរូបនាងផង។ ហេតុការណ៍ដ៏សង្វេគនេះបានធ្វើ អោយភ្ញាក់ផ្អើល កាលពីវេលាម៉ោង២ និង៣០នាទីរសៀល ថ្ងៃទី២២ ខែមិថុនា ឆ្នាំ២០១៥ នៅផ្ទះខាងប្តី ស្ថិតក្នុងភូមិសាលាលេខ៥ ឃុំអូរឫស្សី ស្រុកកំពង់ត្រឡាច ខេត្តកំពង់ឆ្នាំង។
លោក ហ៊ុល វាសនា អធិការនគរបាលស្រុកកំពង់ត្រឡាច បាននិយាយឲ្យដឹងថា៖ ស្ត្រីគិតខ្លីរូបនោះ មានឈ្មោះ យន គួន អាយុ១៩ឆ្នាំ នាងមានទីលំនៅភូមិអន្លុងត្នោត ឃុំលង្វែក ស្រុកកំពង់ត្រឡាច ក្រោយរៀបការហើយ នាងបានមករស់នៅជាមួយប្តីឈ្មោះ រិន សុវណ្ណា អាយុ២៥ឆ្នាំ មានទីលំនៅភូមិឃុំកើតហេតុខាងលើ ។
លោកអធិការបានបន្តថា៖ ប្តីប្រពន្ធខាងលើនេះរស់នៅមិនសូវចុះសម្រុងនឹងគ្នាទេ។ មុនពេលកើតហេតុដោយសារមានការឈ្លោះប្រកែកគ្នា ប្រពន្ធបានវិលត្រឡប់មកផ្ទះនាងនៅភូមិអន្លុងត្នោតវិញ ប៉ុន្តែដោយ សារម្តាយនាងបានណែនាំអប់រំជាច្រើនមក នាងក៏វិលត្រឡប់ទៅផ្ទះខាងប្តីរស់នៅជាធម្មតាវិញ។ ពេលនៅបាន២ថ្ងៃ គឺនៅយប់ថ្ងៃទី២១ ខែមិថុនា ប្តីប្រពន្ធនេះក៏មានការឈ្លោះគ្នាជាថ្មីទៀត រឿងប្រពន្ធប្រចណ្ឌ ប្តី ហើយយប់នោះប្តីក៏មិនបានដេកផ្ទះដែរ គឺទៅដេកនៅក្រៅផ្ទះ ចំណែកប្រពន្ធដេកម្នាក់ឯង។ លុះស្អែកឡើងថ្ងៃទី២២ ខែមិថុនា ប្រពន្ធបានក្រោកពីដេករៀបចំផ្ទះសម្បែងលក់ដូរជាធម្មតា ( ផ្ទះលក់កាហ្វេ និងគ្រឿងទេស ) ហើយម៉ោងប្រហែល៩ព្រឹក នាងជាប្រពន្ធបានចូលសម្ងំដេកក្នុងបន្ទប់វិញ។
លុះរហូតដល់ម៉ោង១១ជាងពេលបាយថ្ងៃត្រង់ ឪពុកម្តាយក្មេកមិនឃើញនាងចេញមកហូបបាយទេ តែក៏មិនបានចាប់អារម្មណ៍ដែរ ព្រោះជាទម្លាប់អោយតែឈ្លោះគ្នាប្តី និងប្រពន្ធគឺនាងមិនចេញមកហូប បាយទេ។ រហូតដល់ម៉ោងជាង២រសៀល ពេលប្តីត្រឡប់ចូលផ្ទះវិញមិនឃើញប្រពន្ធ ក៏ទៅគោះទ្វារបន្ទប់ហៅប្រពន្ធ តែមិនឮឆ្លើយថែមទាំងដាក់ គន្លិះទ្វារជាប់ទៀតផង ទើបមានការឆោរឡោឡើង ហើយប្តីបានឡើងតាមជញ្ជាំងមើល ឃើញប្រពន្ធចងកសម្លាប់ខ្លួនស្លាប់បាត់ទៅហើយដោយយកក្រមាចងក និងចម្រឹងដែក ក្បែរគ្រែដេក។
លោកអធិការបានអោយដឹងទៀតថា៖ ស្ត្រីជាប្រពន្ធមុននឹងធ្វើអត្តឃាតដោយចង ក សម្លាប់ខ្លួននាងបាន ថតសម្លេងយំខ្សឹកខ្សួល ផ្តាំផ្ញើក្នុងទូរស័ព្ទទុកអោយប្តីដោយនិយាយថា៖ “ ខ្ញុំសុំទោសបងសម្លាញ់…អូន ស្រឡាញ់បងខ្លាំងណាស់ …ដោយសារបងមានគេហើយ បងស្រឡាញ់គេជាងខ្ញុំ ខ្ញុំសូមលាបងសិន ហើយ សូមបងកុំកំណាញ់ខ្លាំងពេក ធ្វើបុណ្យអោយអូនផង ” ។
ក្រោយពេលកើតហេតុសមត្ថកិច្ចជំនាញបានពិនិត្យ និងធ្វើកោសល្យវិច្ច័យ លើសពស្ត្រីរូបនោះហើយ បាននិយាយអោយដឹងថា៖ ស្ត្រីរូបនោះពិតជាបានធ្វើអត្តឃាតដោយចងក សម្លាប់ខ្លួនពិតមែន និងបានប្រគល់សពនាងទៅអោយក្រុមគ្រួសារ ជាឪពុកម្តាយនាងនៅក្នុងភូមិអន្លុងត្នោត ឃុំលង្វែក ស្រុកកំពង់ត្រឡាច យកធ្វើបុណ្យទានតាមប្រពៃណីយ៉ាងសោកសង្រេងបំផុតព្រោះតែកូនល្ងង់ខ្លៅ៕ រិទ្ធ ជ័យ
http://ift.tt/1Ng9PB7
