៤ចំណុចជុំវិញការប្រកួតលីកកម្ពុជាចាប់ផ្តើមនៅដើមខែកក្កដាខាងមុខនេះ
លីកបាល់ទាត់កំពូលកម្ពុជារដូវកាលឆ្នាំ២០១៥នឹងចាប់ផ្តើមនៅដើមខែកក្កដា ឆ្នាំ២០១៥ខាងមុខនេះហើយដោយការប្រកួតត្រូវធ្វើឡើងជាលក្ខណៈក្នុងដី និងក្រៅដី (Home/away) ប៉ុន្តែសម្រាប់ក្លិបទាំងឡាយណាដែលមិនមានកីឡដ្ឋានផ្ទាល់ខ្លួនត្រូវប្រកួតនៅទីលានកណ្តាលរបស់សហព័ន្ធបាល់ទាត់កម្ពុជា។
លោក ម៉ៃ តុលា អគ្គលេខាធិការរងសហព័ន្ធបាល់ទាត់កម្ពុជាបានប្រាប់ Sabay ថា ការប្រកួតលីកបាល់ទាត់កម្ពុជារដូវកាលឆ្នាំ២០១៥នឹងចាប់ផ្តើមប្រកួតជាផ្លូវការនៅថ្ងៃទី១ ខែកក្កដា ឆ្នាំ២០១៥ខាងមុខនេះ។ លោកបានលើកឡើងនូវកត្តាមួយចំនួនដែលអ្នកគាំទ្របាល់ទាត់កម្ពុជាចង់ដឹងមុនការប្រកួតមកដល់។
ការប្រកួតក្នុងដី និងក្រៅដី
ការប្រកួតត្រូវធ្វើឡើងលក្ខណៈក្នុងដី និងក្រៅដីពោលគឺក្លិបណាមានកីឡដ្ឋានផ្ទាល់ខ្លួនអាចរៀបចំធ្វើម្ចាស់ផ្ទះសម្រាប់ការប្រកួតបាន។ ក្លិបដែលអាចទទួលធ្វើម្ចាស់ផ្ទះបានគឺមានក្លិបភ្នំពេញក្រោន ស្វាយរៀង ក្រសួងការពារជាតិ និងវេស្ទើនភ្នំពេញ។ ចំពោះក្លិបដែលមិនមានកីឡដ្ឋានផ្ទាល់ត្រូវប្រកួតនៅកីឡដ្ឋានកណ្តាលរបស់សហព័ន្ធបាល់ទាត់កម្ពុជាគឺពហុកីឡដ្ឋានជាតិអូឡាំពិក។
ស្នើសុំកីឡដ្ឋានរបស់ក្លិបផ្សេងធ្វើម្ចាស់ផ្ទះ
សម្រាប់ក្លិបទាំងឡាយណាដែលមិនមានកីឡដ្ឋានផ្ទាល់ខ្លួនសម្រាប់រៀបចំធ្វើម្ចាស់ផ្ទះទេ ក្លិបទាំងនោះអាចស្នើសុំដល់ក្លិបណាដែលមានកីឡដ្ឋានដើម្បីរៀបចំការប្រកួតធ្វើជាម្ចាស់ផ្ទះបាន។ រហូតដល់ពេលនេះ បើតាមលោក ម៉ៃ តុលា បានទទួលដំណឹងគឺមានក្លិបពីរហើយដែលស្នើសុំកីឡដ្ឋានរបស់ក្លិបផ្សេងធ្វើម្ចាស់ផ្ទះកឺក្លិប បឹងកេតអង្គរស្នើសុំស្តាតចាស់របស់ក្លិបក្រសួងការពារជាតិធ្វើជាម្ចាស់ផ្ទះ និងក្លិប Cambodian Tiger FC បានស្នើសុំកីឡដ្ឋានវេស្ទើនធ្វើជាម្ចាស់ផ្ទះ។
ទីលានស្តាតចាស់
មជ្ឈមណ្ឌលបាល់ទាត់បាទីធ្វើជាទីលានកណ្ដាលមួយខែដំបូង
មជ្ឈមណ្ឌលបាល់ទាត់ជាតិបាទីនៅខេត្តតាកែវនឹងក្លាយជាទីលានកណ្តាលរយៈពេលមួយខែដំបូងសម្រាប់ការប្រកួតលីកបាល់ទាត់កម្ពុជារដូវកាលនេះ។ លោកអគ្គលេខាធិការរងបញ្ជាក់ថា ពហុកីឡដ្ឋានជាតិអូឡាំពិកដែលស្ថិតក្រោមការគ្រប់គ្រងរបស់ក្រសួងអប់រំ យុវជន និងកីឡាមិនទាន់ជួសជុលរួចរាល់នៅឡើយទេ ដូច្នេះរង់ចាំរហូតដល់មួយខែទៀតទើបជួសជុលរួចរាល់ និងរៀបចំការប្រកួតបាន។
ទីលានបាល់ទាត់ជាតិបាទី
ការលក់សំបុត្រទស្សនា
រាល់ការប្រកួតទាំងអស់ទាំងនៅទីលានកណ្តាលរបស់សហព័ន្ធបាល់ទាត់កម្ពុជា និងនៅទីលានរបស់ក្លិបដែលរៀបចំធ្វើម្ចាស់ផ្ទះនឹងត្រូវលក់សំបុត្រសម្រាប់អ្នកទស្សនា។ លោក ម៉ៃ តុលា បានប្រាប់ថា ចំពោះសំបុត្រសម្រាប់ទស្សនាគឺសហព័ន្ធអនុញ្ញាតឲ្យម្ចាស់ផ្ទះជាអ្នករៀបចំ និងយកកម្រៃទាំងអស់ ប៉ុន្តែចំពោះការកំណត់តម្លៃ និងការរៀបចំនានាត្រូវពិគ្រោះ និងសហការជាមួយសហព័ន្ធដើម្បីធ្វើយ៉ាងណាឲ្យមានប្រសិទ្ធភាព ព្រមទាំងដំណើរការដោយរលូន។
លោកអគ្គលេខាធិការរងនៃសហព័ន្ធបាល់ទាត់កម្ពុជារូបនេះបានបន្ថែមថា នេះជារបត់ថ្មីមួយទៀតសម្រាប់វិស័យកីឡាបាល់ទាត់កម្ពុជាដែលឈានដល់ដំណាក់កាលរៀបចំការប្រកួតលីករបស់ខ្លួនជាលក្ខណៈក្នុងដី និងក្រៅដីបាន បើទោះជាការរៀបចំរដូវកាលដំបូង ក្លិបមួយចំនួនមិនទាន់មានកីឡដ្ឋានផ្ទាល់ខ្លួនក៏ដោយ។ លោកថា ៖«យើងរៀបចំការប្រកួតក្នុងដី និងក្រៅដីដំបូងតែងតែមានភាពរអាក់រអួលខ្លះហើយ តែនេះជាមោទនភាពរបស់យើងមួយដែរ ហើយការរៀបចំឲ្យមានកីឡដ្ឋានផ្ទាល់ខ្លួនរបស់ក្លិបនីមួយៗមិនមែនជាការងារស្រួលទេ ដូច្នេះយើងត្រូវធ្វើបណ្តើរៗ»៕
អត្ថបទ៖ ជាន ចាន់រ៉ា
http://ift.tt/1NcLEmt