ចាស់ទំនើងឈ្មោះ ទេព ឃួន អាងអំណាចជាមន្ត្រីទីស្តីការគណៈរដ្ឋមន្ត្រីកាន់ជើងកូនស្រីរបស់ខ្លួន បានចូលទៅក្នុងវិទ្យាល័យបឹងកេងកងវាយសិស្សស្រីតូចៗរំសាយកំហឹង តែត្រូវប៉ូលិសចាប់បញ្ជូនខ្លួនទៅតុលាការភ្នំពេញ
ភ្នំពេញ៖ បុរសម្នាក់អះអាងថាខ្លូនជាមន្ត្រីរបស់ទីស្តីការគណៈរដ្ឋមន្ត្រីត្រូវនគរបាលប៉ុស្តិ៍រដ្ឋបាលសង្កាត់បឹងកេងកងចាប់ឃាត់ខ្លួន បន្ទាប់ពីបុរសរូបនោះ បានលួចចូលទៅក្នុងវិទ្យាល័យបឹងកេងកងវាយដំ សិស្សស្រីក្នុងសាលានោះតាមទំនើងចិត្ត តាមការញួសញយ់របស់កូនស្រីខ្លួនដែលបានទូរស័ព្ទប្រាប់បុរសជាឪពុកនោះថា ខ្លួនមានជម្លោះត្រូវវាយតប់គ្នា។ ករណីនេះបានបង្កឲ្យមានការភ្ញាក់ផ្អើលឆោឡោឡើងកាលពីវេលាម៉ោង១និង៤៨នាទីរសៀល ថ្ងៃទី១ ខែកក្កដា ឆ្នាំ២០១៥ នៅវិទ្យាល័យ ជា ស៊ីម បឹងកេងកង ក្នុងសង្កាត់បឹងកេងកងទី១ ខណ្ឌចំការមន រាជធានីភ្នំពេញ។
ប្រភពនៅកន្លែងកើតហេតុបាននិយាយថា៖ បន្ទាប់ពីសិស្សស្រីចំនួន៣នាក់រៀនថ្នាក់ទី១០C2 និយាយដៀមដាមទាស់សំដីគ្នាក្លាយទៅជាជម្លោះច្រានប្រតាយប្រតប់គ្នា បន្ទាប់ពីបញ្ឈប់ សិស្សស្រីម្នាក់ឈ្មោះ ផុន សុផាវី (ហៅស្រីម៉ៅ) ក្នុងចំណោមគូជម្លោះនោះបាន ទូរស័ព្ទហៅឪពុករបស់ខ្លួន គឺ (បុរសប្រើអំពើហិង្សានៅក្នុង វីដេអូ) បានជិះម៉ូតូម៉ាក វីវ៉ាចូលបរិវេណវិទ្យាល័យ ជា ស៊ីម បឹងកេងកងបានដើរទៅរកយុវតីគូជម្លោះតាមការចង្អុលរបស់កូនខ្លួន ហើយបានធ្វើសកម្មភាពយ៉ាងកំរោលស្ទុះទៅទះកំផ្លៀងពេញទំហឹងមួយដៃលើយុវតីឈ្មោះ ញ៉ែម ច័ន្ទធីតា ហើយបានលើកដៃវាយសិស្សស្រីម្នាក់ទៀតឈ្មោះ ហេង ឋារិកា តែត្រូវមិត្តភក្តិកៀសដៃចេញទាន់នាងបានរត់គេចចេញ ។
ប្រភពនប្តថា៖ បន្ទាប់ប្រព្រឹត្តហិង្សាវាយលើយុវតីជាសិស្សសាលានោះរួចមកបុរសចាស់ទំនើងរូបនោះស្រែកឡូឡាអួតក្តែងៗ ថារូបគេមុននឹងវ៉ៃនេះបានសុំការអនុញ្ញាតពីនាយកសាលានេះរួចហើយ ហើយបើចង់ប្តឹងសូមអញ្ជើញទៅប្តឹងដល់ណាក៏ទៅ ទៅ! (សម្លេងក្នុងវីដេអូ) ហើយភ្លាមនោះបានបបួលកូនស្រីគេចចេញពីទីនោះ តែនៅខណៈនោះ សិស្សាមួយចំនួនបានរត់ទៅបិទទ្វាររបងសាលា ដើម្បីកុំឲ្យជនដៃដល់រូបនោះគេចខ្លួន ហើយភ្លាមនោះនាយករងសាលានោះបានសហការជាមួយសិស្សឃាត់បានខ្លួនជនបង្កហិង្សានោះ ហើយនាំខ្លួនទៅកាន់ទីចាត់ការរង់ចាំប្រគល់ខ្លួនជនចាស់ទំនើនោះឲ្យ មន្ត្រីប៉ុស្តិ៍នគរបាលសង្កាត់បឹងកេងកង១ចាត់ការទៅតាមច្បាប់ ដើម្បីឆ្លើយតបនឹងភាពគឃ្លើន ហ៊ានចូលវាយសិស្សក្នុងសាលា ហើយបានបំភ្លើសថា នាយកសាលាអនុញ្ញាតឲ្យជនកំហូចរូបនេះវាយសិស្ស។ ករណីនោះបានធ្វើឲ្យមានការដេញដោរពីអាណាព្យាបាលសិស្សរងគ្រោះភ្លាមៗ ប៉ុន្តែលោក ម៉ន ស៊ីម៉ាត នាយករងវិទ្យាល័យបានបដិសេធ។
មន្ត្រីនគរបាល នៃអធិការដ្ឋាននគរបាលខណ្ឌចំការមនបានបង្ហើបឲ្យដឹងថា៖ ជនប្រព្រឹត្តហិង្សារូបនោះមានឈ្មោះ ទេព ឃួន ភេទប្រុស អាយុ៤៩ឆ្នាំ ជាមន្ត្រីនៅទីស្តីការគណៈរដ្ឋមន្ត្រី បច្ចុប្បន្នស្នាក់នៅផ្ទះគ្មានលេខ(អគារបូឌិញ ជាប់់ក្រសួងទំនាក់ទំនងសភា-ព្រឹត្តសភា និងអធិការកិច្ច) ភូមិ២ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។ នៅរសៀលថ្ងៃដ៏ដែលនេះដោយមានការប្តឹងផ្ទាមាត់ពីអាណាព្យាបាលពីយុវតីរងគ្រោះ បុរសទំនើងរូបនោះត្រូវលោកនាយប៉ុស្តិ៍នគរបាលសង្កាត់បឹងកេងកងនាំខ្លួនមកសួរចម្លើយ កសាងសំណុំរឿង ហើយព្រលប់ថ្ងៃដដែលក៏បានបញ្ជូនខ្លួនទៅឃុំបណ្តោះអាសន្ននៅអធិការរដ្ឋាននគរបាលខណ្ឌចំការមន រងចាំរៀបចំសំណុំបែបបទ ដើម្បីបញ្ជូនខ្លួនបន្តទៅសាលាដំបូងរាធានីភ្នំពេញនៅព្រឹកថ្ងៃទី០៣ ខែកក្កដា ឆ្នាំ២០១៥ស្អែកនេះ។
តាមប្រភពពីពលរដ្ឋរស់នៅអគារបូឌិញមួយចំនួនបានបង្ហើបថា៖ មន្ត្រីនៅទីស្តីការគណៈរដ្ឋមន្ត្រី ឈ្មោះ ទេព ឃួន របៀបរស់នៅមានចរិតក្រអឺតក្រទម កោងកាចណាស់អួតអាងសែស្រឡាយថារូបគេស្គាល់មន្ត្រីមានអំណាចច្រើនណាស់ ដែលគេអួតអាងថាអ្នកកាន់អំណាចភាគច្រើនសុទ្ធតែជាមិត្តភក្តិរបស់ខ្លួន ហើយតែងតែនិយាយមើលងាយប្រមាទជេរប្រទិច បើនរណាមួយហ៊ានធ្វើឲ្យខ្នើសចិត្ត ។ ចំណែកនៅសាលាបឋមសិក្សាសុធារស់មន្ត្រីទំនើងរូបនេះ ក៏ធ្លាប់ចូលទៅជេរប្រទិចសិស្សស្រីក្នុងសាលានោះផងដែរ ខណៈពេលកូនគាត់ទូរស័ព្ទទូពិតតម្អូញថាមានគេរករឿង ដោយគាត់មិនបានប្រើប្រព័ន្ធវិន័យក្នុងសាលាទេ គាត់តែងតែពើងទះទ្រូងថាគាត់ជាមន្ត្រីទីស្តីការគណៈរដ្ឋមន្ត្រីអាណាចង់ខ្លាំង!។
ពាក់ព័ន្ធសមត្ថកិច្ចឃាត់ខ្លួន ឈ្មោះ ទេព ឃួន មន្ត្រីនៅទីស្តីការគណៈរដ្ឋមន្ត្រី ដែលជាជនដៃដល់វាយ សិស្ស ស្រី តូចៗនេះ ពលរដ្ឋក៏ដូចជាអណាព្យាបាលបានអបអរសាទរ និងសំណូមពរដល់សមត្ថកិច្ច និងតុលាការមេត្តា ចាត់វិ ធានការករណីនេះទៅតាមច្បាប់ឲ្យបានតឹងរឹង ដើម្បីឲ្យជនរូបនោះរាងចាល និងចេះគោរពច្បាប់ គោរពសិទ្ធិ អ្នក ដទៃ ដើម្បីលើកកំពស់នីតិរដ្ឋ ។ គួររំលឹកថា កាលពីម្សិលម៉ិញរហូតមកដល់ថ្ងៃនេះ អ្នកប្រើប្រាស់បណ្តញសង្គមហ្វេសប៊ុក បានសម្តែងការមិនពេញចិត្ត និងថ្កោលទោស ចំពោះសកម្មភាពដ៏ឃោរឃៅរបស់ជនបង្ក ប្រើកម្លាំងបាយវាយវាយក្មេងស្រីនោះ ហើយ វីដេអូក្លិបចំនួន០២ត្រូវបាន (Share & Commets) ចែករំលែកផ្ទួនៗ ៕ (កាសែតខ្មែរអង្គរ)
ឃុំបណ្តោះអាសន្ននៅក្នុងអធិការរដ្ឋានខណ្ឌចំការមនរងចាំបញ្ជូនទៅតុលាការក្រុងភ្នំពេញ
http://ift.tt/1f4BKJ8
