គណៈកម្មការចម្រុះខេត្តប្រជុំប្រជាពលរដ្ឋភូមិចុងកោះ១៩១គ្រួសារដោះស្រាយផលប៉ះពាល់ដើម្បីអភិវឌ្ឍន៍ថ្នល់តាមមាត់ទន្លេផ្សារក្រោមជាតំបន់ទេសចរណ៍
ខេត្តកំពង់ឆ្នាំង៖ ប្រជាពលរដ្ឋចំនួន១៩១រស់នៅតាមមាត់ទន្លេក្នុងភូមិចុងកោះ សង្កាត់កំពង់ ក្រុងកំពង់ឆ្នាំង ដែលរងផលប៉ះពាល់ក្នុងការអភិវឌ្ឍន៍ផ្លូវថ្នល់តាមមាត់ទន្លេផ្សារក្រោម នៅព្រឹកថ្ងៃទី២៨ ខែធ្នូ ឆ្នាំ២០១៥ ត្រូវបានគណៈកម្មការចម្រុះខេត្តអញ្ជើញមកប្រជុំពិភាក្សា និងចចារគ្នាក្នុងការសុំប្រាក់គោល នយោបាយក្នុងគម្រោងការរុះរើលំនៅដ្ឋានពួកគាត់ទៅនៅទីតាំងថ្មី។
លោក រ៉េស ទីន សមាជិកក្រុមប្រឹក្សាសង្កាត់ផ្សារឆ្នាំងបានរាយការណ៍នៅក្នុង អង្គប្រជុំអោយដឹង ថា៖ តាមការប្រជុំរវាងប្រជាពលរដ្ឋ១៩១គ្រួសារ និងអាជ្ញាធរភូមិ និងសង្កាត់កន្លងមក ប្រជាពលរដ្ឋមានសំ ណូមពរ៣គឺ៖ ១. សុំបង្ហាញទីតាំងថ្មីដែលគាត់ត្រូវទៅសាងសង់លំនៅដ្ឋានអោយបានច្បាស់លាស់ ២.សុំ ដោះស្រាយប្រាក់គោលនយោបាយរុះរើផ្ទះមាន៣ប្រភេទគឺ៖ ប្រភេទ១ផ្ទះធំ សុំ១៥០០ដុល្លា ២.ផ្ទះមធ្យម ១០០០ដុល្លា ៣.ផ្ទះតូច៥០០ដុល្លា និងសំណូមពរទី៣ ស្នើសុំអោយរៀបចំប្រព័ន្ធទឹក អគ្គីសនី នៅទីតាំង ថ្មីជាមុនសិន ចាំអោយប្រជាពលរដ្ឋរុះរើផ្ទះទៅនៅតាមក្រោយ។
ទាក់ទង និងសំណូមពរទាំង៣ខាងលើនេះ លោក ស៊ុន សុវណ្ណរិទ្ធ អភិបាលរងខេត្ត និងជាប្រធានគណៈកម្មការចម្រុះខេត្ត បានថ្លែងអោយដឹងថា៖ ចំពោះសំណូមពរទី១.ទីតាំងថ្មីដែលប្រជាពលរដ្ឋត្រូវទៅរស់នៅមាន២ទីតាំង គឺតាំងទី១មានចម្ងាយពី១០០ម៉ែត្រពីផ្សារថ្មីមានតម្លៃខ្ពស់បន្តិចឯទីតាំងទី២មានចម្ងាយ៣០០ទៅ៤០០ម៉ែត្រពីផ្សារថ្មីមានតម្លៃថោក និងត្រូវបង់រំលោះយូរឆ្នាំ។ សំណូមពរទី២. ប្រាក់គោលនយោបាយជួយក្នុងការរុះរើផ្ទះ ក្រោយពីបានចចារគ្នាចំនួន៣លើក ក្នុងអង្គប្រជុំមកអាជ្ញាធរខេត្ត និងប្រជាពលរដ្ឋបានឯកភាពគ្នាថា៖ ទី១ផ្ទះធំដោះស្រាយជូន១៣០០ដុល្លា ទី២ផ្ទះមធ្យម៩០០ដុល្លា និងទី៣ផ្ទះតូច៤០០ដុល្លា។ សំណូមពរទី៣. ទីតាំងថ្មីគឺអាជ្ញាខេត្តនឹងធានារៀបប្រពន្ធ័ទឹកភ្លើងជាស្រេចទើបអោយប្រជាពលរដ្ឋទៅរស់នៅ។ ចំណែកផ្លូវតាមមាត់ទន្លេត្រូវកសាងថ្មីដែលមានទទឹងលើ១០ម៉ែត្រ អាចមានកំពង់៤ទៅ៥ម៉ែត្រខ្ពស់ផុតពីទឹកទន្លេឡើង។
ដោយឡែកលោក ស៊ុន សុវណ្ណរិទ្ធ បានបញ្ជាក់អោយដឹងទៀតថា៖ ផែនការផ្លាស់ប្តូរទីតាំងផ្ទះប្រ ជាពលរដ្ឋតាមមាត់ទន្លេនេះ គឺត្រូវអនុវត្តន៍រយះពេល៥ឆ្នាំ គិតពីឆ្នាំ២០១៥ដល់២០១៩ ។ នៅក្នុងខែ១ និងខែ២ ឆ្នាំ២០១៦នេះ ខេត្តនិងធ្វើផ្លូវបេតុងថ្មីប្រវែង៤០០ម៉ែត្រ ចេញពីចុងភូមិចុងកោះទៅផ្លូវជាតិលេខ ៥សង្កាត់ខ្សាម ដើម្បីយកយឿត្រី និងអ្នកលក់ឈើ ស្លឹក ពីងពុងទៅដាក់នៅចុងភូមិចុងកោះ តាមផែន ការដែលបានគ្រោងទុក។ ចំណែកផ្ទះប្រជាពលរដ្ឋជាង៧០ខ្នងនៅខាងលិចផ្លូវលំក្នុងភូមិចុងកោះ និងផ្ទះ ប្រជាពលរដ្ឋភូមិកណ្តាល ១២ខ្នង ដែលមានផលប៉ះពាល់ដែរនោះ និងត្រូវដោះស្រាយជាបន្តបន្ទាប់ពេល ក្រោយទៀត។
គណៈកម្មការចំរុះខេត្តបានអោយដឹងទៀតថា៖ អាជ្ញាធរខេត្តមានគំរោងអោយក្រុមហ៊ុនវិយោទុន រៀបចំដីអភិវឌ្ឍន៍ប្រមាណ៣០ហិកតា នៅជិតក្រុមហ៊ុនអានកូ ដើម្បីធ្វើផ្សារថ្មីជាង១ពាន់តូប និងរៀបចំ ដីប្រមាណ២០ហិកតាលក់បង់រំលោះជូនប្រជាពលរដ្ឋខ្មែរ ខ្មែរឥស្លាម និងវៀតណាម ជាង១០០គ្រួសារ ផ្លាស់ប្តូរពីផ្ទះបណ្តែតទឹក និងផ្ទះរស់នៅតាមមាត់ទន្លេ មករស់នៅលើទីតាំងថ្មីនេះ ដែលផែនការរៀបចំ នេះមានរយៈពេល៥ឆ្នាំ ដើម្បីអភិវឌ្ឍន៍មាត់ទន្លេផ្សារក្រោមជាង២គីឡូម៉ែត្រ អោយក្លាយជាតំបន់ទេស ចរណ៍ សម្រាប់លើកស្ទួយជីវភាពរស់នៅប្រជាពលរដ្ឋក្នុងខេត្តកំពង់ឆ្នាំង៕ រិទ្ធិ ជ័យ
http://ift.tt/1JG5Xa7
