ក្មេងស្រីពីរនាក់បងប្អូនជិះម៉ូតូឌុបគ្នាត្រឡប់មកពីហែសពសាច់ញាតិមិត្តភ័ត្តិ ត្រូវរថយន្តទំនើបថៅកែភោជនីយដ្ឋានឆ្នេរមាសក្រុងព្រះសីហនុ បុកស្លាប់១នាក់ របួសធ្ងន់១នាក់យ៉ាងសង្វេគ
ខេត្តព្រះសីហនុ៖ យុវតី២នាក់បងប្អូនជាសិស្សសាលាឯកជនអន្តរទ្វឹបខេត្តព្រះសីហនុកំពុងជិះម៉ូតូម៉ាកស្កូពីឌុបគ្នា ត្រឡប់មកពីដង្ហែសពក្រុមគ្រួសារមិត្តភ័ត្តិ ត្រូវបានរថយន្តម៉ាកអេស្កាលែតបើកក្នុងល្បឿងលឿនស្ទើរហោះក្នុងទិសដៅផ្ទុយគ្នាបានបុកចំមួយកំណាត់ម៉ូតូផ្នែកខាងក្រោយពេញទំហឹង បណ្តាលឲ្យទាំងម៉ូតូទាំងមនុស្សផ្លោងចេញពីផ្លូវស្លាប់ម្នាក់នៅកន្លែងកើតហេតុ និងរងរបួសធ្ងន់ម្នាក់សង្ឃឹមរស់តិចតួចណាស់ ហើយនៅខណៈតៃកុងឡានបានរត់គេចខ្លូនបាត់។ ហេតុការណ៍គ្រោះថ្នាក់ចរាចរណ៍ដ៏សែនរន្ធត់នេះបានកើតឡើងនៅវេលាម៉ោង៩ និង១៥នាទី ព្រឹកថ្ងៃទី២២ខែធ្នូ ឆ្នាំ២០១៥នេះនៅលើដងផ្លូវជាតិលេខ៤ ចន្លោះគីឡូម៉ែត្រ២១២ និង២១៣ ស្ថិតក្នុងភូមិពូធឿង ឃុំបិត្រាំង ស្រុកព្រៃនប់ ខេត្តព្រះសីហនុ។
យោងតាមប្រភពពីលោកវរសេនីយ៍ ឯកអ៊ី សុខា ស្នងការរងនគរបាលខេត្តព្រះសីហនុ ទទួលបន្ទុកសណ្តាប់ធ្នាប់បានប្រាប់ឲ្យដឹងថា គ្រោះថ្នាក់ចរាចរណ៍នេះកើតឡើងរវាងរថយន្ត១គ្រឿងម៉ាកអេស្កាលែតពណ៌ខ្មៅពាក់ស្លាកលេខភ្នំពេញ២U-៦៩៦៩ ទិសដៅពីភ្នំពរញមកខេត្តព្រះសីហនុ មកដល់ចំណុចកើតហេតុខាងលើរថយន្តបានបុកម៉ូតូ១គ្រឿង ម៉ាកស្កូពីពណ៌សគ្មានស្លាកលេខ បើកបរដោយឈ្មោះ កុយ អេងលី ភេទស្រី អាយុ១៧ឆ្នាំ ជាសិស្ស មានទីលំនៅក្រុងព្រះសីហនុ ស្លាប់ភ្លាមៗកន្លែងកើតហេតុ (ជាអ្នកបើកបរ) និងអ្នករួមដំណើរជិះពីក្រោយម្នាក់ទៀតឈ្មោះ កុយ អេងលីន អាយុ១៤ឆ្នាំ ជាប្អូនស្រីបង្កើត បានរងរបួសធ្ងន់បានបញ្ជូនមកសង្គ្រោះនៅមន្ទីរពេទ្យខេត្ត។ យុវតីរងគ្រោះទាំងពីរជាសិស្សថ្នាក់ទី១០សាលាឯកជនអន្តរទ្វីប បច្ចុប្បន្នស្នាក់នៅក្នុងសង្កាត់លេខ៣ ក្រោយសាលាខេត្តព្រះសីហនុ។
សាច់ញាតិ និងជាអាណាព្យាបាលរបស់ក្មេងស្រីរងគ្រោះដែលជាមន្ត្រីនៅមន្ទីរប្រៃសនីយ៍ និងមន្ទីរសាធារណការ និងដឹកជញ្ជូនខេត្តព្រះសីហនុអះអាងថា៖ យុវតីរងគ្រោះជាប្អូនស្រីឈ្មោះ កុយ អេងលីន អាយុ១៤ឆ្នាំ ដែលរងរបួសធ្ងន់ធ្ងរបំផុតនោះ ត្រូវបានដឹកចេញពីមន្ទីរពេទ្យបង្អែកខេត្តទៅសង្គ្រោះនៅភ្នំពេញ។ ចៅស្រីទាំង២របស់គាត់ដែលរងគ្រោះថ្នាក់នេះកើតឡើងក្នុងពេលដែលពួកគេទាំង២ជិះម៉ូតូឌុបគ្នារួមជាមួយមិត្តភក្តិរបស់គេផ្សេងទៀតនាំគ្នាទៅដង្ហែសពគេទៅវត្តសមាធិឃុំរាមស្រុកព្រៃនប់។ ចៅស្រីទាំង២នាក់បងប្អូននេះរស់នៅរៀនសូត្រក្នុងក្រុងព្រះសីហនុជាមួយយាយតា ចំណែកឪពុកម្តាយរបស់ពួកគេរស់នៅក្នុងឯខេត្តកំពុងចាម។
លោកវរសេនីយ៍ ឯកអ៊ី សុខា បានឲ្យដឹងទៀតថា រថយន្តបង្ក និងម៉ូតូជនរងគ្រោះ បន្ទាប់ពីសមត្ថកិច្ចធ្វើការវាស់វែងរួចរាល់ បានយកទៅរក្សាទុកនៅការិយាល័យចរាចរណ៍ផ្លូវគោករងចាំការស្រាវជ្រាវដោះស្រាយនៅពេលក្រោយ។
សូមបញ្ជាក់ផងដែរថា យុវតីរងគ្រោះទាំងពីរ គឺជាសិស្សពូកែប្រចាំ សាលាអន្តរ ទ្វិប (យុវសិស្សដែលស្លាប់ជាប្រធានថ្នាក់) សព្វថ្ងៃរស់នៅជាមួយជីដូន ឯឪពុកម្តាយរស់នៅឯខេត្តកំពុងចាម។ ដោយឡែកម្ចាស់រថយន្តបង្ក បើយោងតាមប្រភពជំហ៊ានដំបូងបានអោយដឹងថាគឺជាថៅកែភោជនីយដ្ឋានឆ្នេរមាស ក្រុងព្រះសីហនុ ដែលមានទីតាំង ស្ថិតនៅ តាមបណ្តោឆ្នេរ ក្បែរសាលាខេត្តព្រះសីហនុ (ក្នុងតំបន់មិនឆ្ងាយពីផ្ទះជនរងគ្រោះ) ស្ថិតក្នុងភូមិ៣ សង្កាត់លេខ៣ ក្រុងព្រះសីហនុ ៕ សមុទ្រខៀវ
http://ift.tt/1PhRzsN
