ប្រជាពលរដ្ឋ៣៥គ្រួសារនៅក្នុងភូមិសន្ទៃសំណូមពរអាជ្ញាធរស្រុកនិងខេត្តជួយដោះស្រាយរឿងមន្ត្រីសុរិយោដីខេត្តម្នាក់ និងប្រជាពលរដ្ឋមា្នក់រំលោភយកដីចំការពួកគាត់ជាង៥ហិកតា
ខេត្តកំពង់ឆ្នាំង៖ មន្ត្រីសុរិយោដីខេត្តម្នាក់ និងប្រជាពលរដ្ឋម្នាក់ដែលមានឪពុកជាអតីតជាមេឃុំពង្រចាស់ បានរងការចោទប្រកាន់ពីប្រជាពលរដ្ឋចំនួន៣៥គ្រួសារ នៅក្នុងភូមិសន្ទៃ ឃុំពង្រ ស្រុករលាប្អៀរ ថាបាន លួចធ្វើប័ណ្ណកម្មសិទ្ធរំលោភយកដីចំការពួកគាត់ដែលបានកាន់កាប់តាំងពីឆ្នាំ១៩៨៦រហូតមក។នៅព្រឹកថ្ងៃទី០១ខែមករា ឆ្នាំ២០១៥ ជួបជាមួយក្រុមអ្នកកាសែតប្រជាពលរដ្ឋបានស្នើសុំលោកអភិបាល ស្រុករលាប្អៀរ និងលោកអភិបាលខេត្តកំពង់ឆ្នាំង ជួយចុះមកស្រាវជ្រាវដោះស្រាយរឿងនេះជូនពួកគាត់ផង។
លោក ប៉ែន ចាន់យឿន ជាមេភូមិសន្ទៃ ឃុំពង្រ ស្រុករលាប្អៀរ បានរៀបរាប់អោយដឹងថា៖ ប្រជាពលរដ្ឋ ៣៥គ្រួសារនៅក្នុងភូមិសន្ទៃ មានដីចំការបន្តិចៗម្នាក់ចំនួន៥ហិកតាដែលទទួលបានការបែងចែកពី លោក សោម ឈឹង អតីតមេភូមិក្នុងឆ្នាំ១៩៨៦។ បន្ទាប់មកពួកគាត់បាននាំគ្នាធ្វើប័ណ្ណស្នើសុំកាប់កាប់ដី ចំការតាមផ្លូវច្បាប់ និងបានប័ណ្ណទទួលពាក្យស្នើសុំកាន់កាប់ដីចំការពីសុរិយោដីស្រុក និងលោកអភិបាល ស្រុកនៅឆ្នាំ១៩៩៤ ហើយក៏បានការពារកាន់កាប់ដាំដុះ និងអាស្រ័យផលរហូតមក។
ស្រាប់តែនៅដើមឆ្នាំ២០១៥ ក៏លេចមុខលោក ស៊ីវ ចន្ថារី មានឪពុកជាអតីតមេឃុំពង្រ និងលោក ប៉ិល ចន្ថា ជាមន្ត្រីសុរិយោដីខេត្ត មកឃាត់ឃាំងមិនអោយប្រជាពលរដ្ឋគាស់រានដីធ្វើចំការ ដោយអះអាង និងបង្ហាញប័ណ្ណកម្មសិទ្ធដែលគេលួចធ្វើតាំងពីឆ្នាំ១៩៩៥ថា ដីចំការទាំងនោះជាកម្មសិទ្ធរបស់គេ។មិនតែប៉ុណ្ណោះកន្លងមក គេបាននាំមន្ត្រីនគរបាលព្រហ្មទណ្ឌខេត្តមកគំរាមចាប់ប្រជាពលរដ្ឋដាក់គុក និងគំរាមប្តឹងទៅតុលាការខេត្ត ប្រសិនបើនៅតែប៉ះពាល់ដីចំការរបស់គេទៀតនោះ។
លោកមេភូមិសន្ទៃ និងប្រជាពលរដ្ឋជាម្ចាស់ដីចំការជាច្រើននាក់បានអោយដឹងថា៖ ពួកគាត់ឆ្ងល់ណាស់ ថា ដីក្នុងភូមិគាត់ត្រូវបានអាជ្ញាធរខេត្ត និងរាជរដ្ឋាភិបាលចាត់ទុកជាដីចំណុចខ្មៅរបស់ព្រលានយន្តហោះ មិនចេញប័ណ្ណកម្មសិទ្ធអោយទេ ប៉ុន្តែហេតុអ្វីក៍លោក ប៉ិល ចន្ថា ជាមន្ត្រីសុរិយោដីខេត្តបានប័ណ្ណកម្ម សិទ្ធនៅលើដីនេះ ចំណែកពួកគាត់ដែលបានរស់នៅក្នុងភូមិនិងកាន់កាប់ដីស្រែដីចំការទាំងនេះជាង៣០ឆ្នាំ មកហើយបែរជាគេមិនចេញប័ណ្ណកម្មសិទ្ធដីធ្លីអោយទៅវិញ។
ដោយឡែកបើពិនិត្យមើលនៅលើប័ណ្ណកម្មសិទ្ធដីចំការរបស់លោក ប៉ិល ចន្ថា មានទំហំ២៥.០០០ម៉ែត្រការ៉េ គឺស្ថិតនៅក្នុងភូមិភ្នំតូច សោះហេតុអីមករំលោភយកដីចំការនៅក្នុងភូមិសន្ទៃ របស់ពួកគាត់ទៅវិញ។ ម្យ៉ាងទៀតនៅលើប័ណ្ណនោះបានបញ្ជាក់ថា ព្រុំប្រទល់ខាងជើងទល់នឹងផ្លូវ, ខាងត្បូងទល់នឹងភ្នំ (តើ ដីជើងភ្នំរបស់រដ្ឋគេអាចចេញប័ណ្ណកម្មសិទ្ធអោយដែរឬ) , ខាងកើតទល់នឹងដីលោក កែ ហ៊ីម (ជាមន្ត្រីសុរិ យោដីខេត្ត) , ខាងលិចទល់នឹងដីលោក មុំ សុរ័ត្ន ( ក៍ជាមន្ត្រីសុរិយោដីខេត្តដូចគ្នាដែរ) ប្រជាពលរដ្ឋយល់ថាប័ណ្ណកម្មសិទ្ធនេះមានភាពមិនប្រក្រតីឡើយ គឺនៅមានដីចំការច្រើនទៀតដែលពួកគេរំលោភយក។
លោកមេភូមិ និងប្រជាពលរដ្ឋទាំង៣៥គ្រួសារ បានធ្វើលិខិតសំណើរចុះថ្ងៃទី៩ ខែធ្នូ ឆ្នាំ២០១៥ដាក់ជូនលោកអភិបាលស្រុករលាប្អៀរជួយដោះស្រាយរួចហើយ តែមកដល់ពេលនេះស្ងាត់ឈឹងមិនឃើ ញចុះមកពិនិត្យដោះស្រាយឡើយ។ហេតុនេះពួកគាត់ស្នើសុំលោក ឈួរ ច័ន្ទឌឿន អភិបាលខេត្តកំពង់ ឆ្នាំងមេត្តាពិនិត្យដោះស្រាយ ប្រគល់ដីចំការនេះអោយប្រជាពលរដ្ឋអាស្រ័យផលវិញផង។
ដោយឡែកលោក ប៉ិល ចន្ថា មន្ត្រីសុរិយោដីខេត្តបានបញ្ជាក់អោយដឹងនៅល្ងាចថ្ងៃទី០១ ខែមករាឆ្នាំ២០ ១៦នេះថា៖ ដីចំការនេះលោកបានដោះដូរជាមួយគេហើយក៏បានធ្វើប័ណ្ណកម្មសិទ្ធ ចំណែករដ្ឋមិនចេញ បណ្ណ័កម្មសិទ្ធអោយក្នុងចំណុចខ្មៅនេះគឺចាប់ពីឆ្នាំ១០៩៧មកទេ។ពាក់ព័ន្ធ និងរឿងនេះជំហរលោកនឹងត្រៀមខ្លួនសម្របសម្រួលដោះស្រាយជាមួយប្រជាពលរដ្ឋបើពួកគាត់ចង់សម្រួល៕ រិទ្ធិ ជ័យ
http://ift.tt/1mvybit
