ឡានដឹកកម្មករកាត់ដេរ២គ្រឿងបុកគ្នាក្រឡាប់ស្លាប់កម្មករ៥នាក់ របួសធ្ងន់ស្រា៦៨នាក់
ខេត្តកំពង់ស្ពឺ៖ រថយន្តកូរ៉េដឹកកម្មកររោងចក្រកាត់ដេរពីរគ្រឿងបើកបញ្ច្រាសទិសគ្នា ក្នុងល្បឿនលឿនបានរ៉េចង្កូតបុកគ្នាពេញទំហឹងក្រឡាប់ធ្លាក់ពីផ្លូវទាំងពីរគ្រឿងក្រឡាប់១គ្រឿង បណ្តាលឲ្យកម្មការិនី២នាក់ស្លាប់ភ្លាមៗនៅកន្លែងកើតហេតុ ស្លាប់៣នាក់ទៀតបន្ទាប់ពីបញ្ជូនទៅសង្គ្រោះនៅមន្ទីរពេទ្យ និងរបួសចំនួន៦៨នាក់។ ហេតុការណ៍រថយន្តដឹកកម្មករបុកគ្នាដ៏រន្ធត់នោះកើតឡើងនៅម៉ោងប្រមាណ ៦ និង៣០នាទីព្រឹកថ្ងៃទី១២ ខែមករា ឆ្នាំ២០១៦នេះ នៅលើផ្លូវ ជាតិលេខ៤១ ក្នុងភូមិជ្រៃត្រកួន ឃុំរកាកោះ ស្រុកគងពិសី ជាប់ព្រំប្រទល់នឹងស្រុកសំរោងទង។
ប្រភពពីកន្លែងកើតហេតុបានឲ្យដឹងថា បន្ទាប់ពីរថយន្តដឹកកម្មករទាំងពីរគ្រឿងបុកគ្នាហើយប្រឡាប់ ទាំងសងខាង ប្រជាពលរដ្ឋ និងអាជ្ញាធរបានចេញមកជួយសង្គ្រោះភ្លាមៗជួយដឹកបញ្ជូនអ្នករងរបួសទៅសង្គ្រោះនៅមន្ទីរពេទ្យ ។ កម្មករ២នាក់ បានស្លាប់ភ្លាមៗ នៅកន្លែងកើតហេតុ និងម្នាក់ស្លាប់ពេលដឹកបញ្ជូនទៅសង្គ្រោះ តែរហូមកដល់ម៉ោង ១១ព្រឹកនេះ អ្នកស្លាប់បានកើនដល់ ៥នាក់ហើយ ខណៈអ្នករងរបួសមានចំនួន ៦៨នាក់។ កម្មករ-កម្មការិនី ដែលជួបគ្រោះថ្នាក់នេះ បម្រើការនៅរោងចក្រ NOUW CORP ។ ដោយឡែកចំពោះ អ្នកបើកបររថយន្តទាំង២ បានរត់គេចខ្លួនបាត់ ។
ក្រសួងការងារ និងបណ្តុះបណ្តាលវិជ្ជាជីវៈ បានចេញមកបញ្ជាក់ថា ជនរងគ្រោះដែលស្លាប់ ១-ឈ្មោះ ស៊ីម ខុម ភេទ ស្រី អាយុ ៣៣ឆ្នាំ រស់នៅ ភូមបឹងព័ទ្ធ ឃុំស្តុក ស្រុកគងពិសី។ ២-ឈ្មោះ ណុប លីម ភេទស្រី អាយុ ៣៩ឆ្នាំ រស់នៅភូមិបឹងព័ទ្ធ ឃុំស្តុក ស្រុកគងពិសី។ ៣-ឈ្មោះ ស្រីប៉ិច រស់នៅភូមិភ្នៅ ឃុំព្រៃញាតិ ស្រុកគងពិសី និង៤-ឈ្មោះ អ៊ីវ សុខមុំ អាយុ ៣៧ឆ្នាំ រស់នៅភូមិព្រះម្លប់ ឃុំភារីមានជ័យ ស្រុកបរសេដ្ឋ។ ចំពោះអ្នករបួស ធ្ងន់ស្រាល នៅពេទ្យសម្ភព ថ្នល់ទទឹងមាន ១៣នាក់ ក្នុងនោះធ្ងន់ ៧នាក់ បញ្ជូនទៅមន្ទីរពេទ្យ កាល់ម៉ែត។ ពេទ្យបង្អែកខេត្តកំពង់ស្ពឺ មាន ១២នាក់ ធ្ងន់ ២នាក់ និងមន្ទីរពេទ្យបង្អែក គងពិសី មាន ៤២នាក់ រងរបួសស្រាល សរុបទាំងអស់ ៦៨នាក់។
ក្រសួងការងារ និងបណ្តុះបណ្តាលវិជ្ជាជីវៈ បបានថ្លែងក្នុងសេចក្តីប្រកាសព័ត៌មានថា កម្មករ-កម្មការិនី ដែលជួប គ្រោះថ្នាក់នេះ បម្រើការនៅរោងចក្រ NOUW CORP ជាសមាជិកបេឡាជាតិរបបសន្តិសុខសង្គម (ប. ស.ស) ហើយ ជាគ្រោះថ្នាក់ការងារ រាល់ការព្យាបាលរហូតដល់ជាសះស្បើយជាបន្ទុករបស់ ប.ស.ស ។ អ្នកស្លាប់ ប.ស.ស ផ្តល់ ៤លានរៀលសម្រាប់ចាត់ចែងពិធីបុណ្យសព និងមានផ្តល់បន្ថែមទៀតនូវរបបឧបត្ថម្ភក្រុមគ្រួសារ ប្តី ប្រពន្ធ កូន ជន ចាស់ជរា ឪពុក ម្តាយ ជីដូន ជីតា ជាដើម៕
http://ift.tt/1ZhOaNv
