មន្ត្រីសាខាកាំកុងត្រូលខេត្តព្រះសីហនុចុះពិនិត្យចំណីអាហារក្នុងផ្សារស្ទឹងហាវ
ខេត្តព្រះសីហនុ៖ មន្ត្រីសាខាកាំកុងត្រូលខេត្តព្រះសីហនុ កាលពីព្រឹកថ្ងៃទី២៨ ខែមករា ឆ្នាំ២០១៦ បានចុះពិនិត្យគុណភាពទំនិញនៅក្នុងផ្សារស្ទឹងហាវ។ នៅទីកន្លែងចុះត្រួតពិនិត្យនោះលោក ពៅ សុផានិត្យ អនុប្រធានសាខាកាំកុងត្រូលខេត្តព្រះសីហនុ បានមានប្រសាសន៍ឲ្យដឹងថា៖ ការចុះពិនិត្យនេះគឺមានគោលបំណង រក្សានូវសុវត្តិភាព ចំណីអាហារ ដូចជាម្ហូបអាហារគ្រឿងសមុទ្រ បន្លែចិត មីដុំ នំបញ្ចុក សាច់គុយទាវ ជាដើម។ល។ ជាពិសេសផ្តោតលើស្ករត្នោត។
ជាលទ្ធផលក្នុងការចុះត្រួតពិនិត្យនាព្រឹកថ្ងៃទី២៨ ខែមករា ឆ្នាំ២០១៦នេះ ជំនាញរបស់លោក ពុំបានរកឃើញនូវសារធាតុហាមឃាត់ណាមួយនៅក្នុងម្ហូបអាហារខាងលើនោះទេ។ ទោះយ៉ាងណាក៏ដោយ មន្ត្រីរបស់លោក នឹងនៅតែចុះធ្វើការតាមដានពិនិត្យជារៀងរាល់សប្តាហ៍ នៅគ្រប់ទីផ្សារនានា ក្នុងខេត្តព្រះសីហនុដើម្បីធ្វើការអប់រំ និងទប់ស្កាត់អាហារ សាច់ បន្លែផ្លែឈើ និងគ្រឿងឧបភោគបរិភោគទាំងឡាយណាយណាដែលបណ្តាលឲ្យប៉ះពាល់ដល់សុខភាព។
ឆ្លៀតក្នុងឪកាសនោះដែរ លោក ពៅ សុផានិត្យ ក៏បានអំពាវនាវ ដល់បងប្អូន អាជីវករទាំងអស់សូមមេត្តា បញ្ឈប់ ការលក់ ចំណី អាហារ ដែលអាចធ្វើអោយប៉ះពាល់ដល់សុខភាពបងប្អូនប្រជាពលរដ្ឋ និងភ្ញៀវទេសចរណ៍ រក្សាអោយបាននូវភាពថ្លៃថ្នូរ លើសពីនេះលោក ក៏បានសំណូមពរដល់បងប្អូនប្រជាពលរដ្ឋទាំងអស់ សូម មេត្តារាយការណ៍មកកាន់ប្រព័ន្ធទូរស័ព្ទពិសេសរបស់មន្ត្រីសាខាកាំកុងត្រូលខេត្តព្រះសីហនុ ៕ សមុទ្រខៀវ
http://ift.tt/1nCZad9
