ប្តីខឹងប្រពន្ធទៅធ្វើការឆ្ងាយមិនមកលេងផ្ទះក្នុងពេលចូលឆ្នាំខ្មែរ ដុតផ្ទះខ្លួនឯងរំសាយកំហឹង រាលដាលឆេះទាំង ផ្ទះម្តាយក្មេកម៉ត់គ្មានសល់ត្រូវនគរបាលចាប់ខ្លួន
ខេត្តកំពង់ឆ្នាំង៖ ផ្ទះ២ខ្នងត្រូវបានភ្លើងឆេះម៉ត់ ដោយសារបុរសម្នាក់ ព្រោះតែខឹងនឹងប្រពន្ធទៅធ្វើការឆ្ងា យមិនព្រមមកលេងផ្ទះក្នុងពេលបុណ្យចូលឆ្នាំខ្មែរ គេបានយកភ្លើងដុតផ្ទះខ្លួនឯងចោល និងបានរាលដាលឆេះផ្ទះម្តាយក្មេកម៉ត់ ដែលនៅជាប់នឹងគ្នាគ្មានអ្នកណាជួយពន្លត់បានឡើយ។ ករណីនេះបានកើតឡើងនៅវេលាម៉ោង៥ និង៣០នាទីល្ងាចថ្ងៃទី១៥ ខែមេសា ឆ្នាំ២០១៦ នៅក្នុងភូមិក្បាលថ្នល់ ឃុំផ្សារ ស្រុកបរិបូណ៌។ ក្រោយកើតហេតុបុរសដៃដល់ដុតផ្ទះរំសាយកំហឹង ត្រូវបានសមត្ថកិច្ចបានចាប់ឃាត់ខ្លួនកាសងសំណុំរឿងបញ្ជូនទៅតុលាការ។
សមត្ថកិច្ចនគរបាលមូលដ្ឋានបាននិយាយអោយដឹងថា៖ បុរសដុតផ្ទះខ្លួនឯង និងរាលឆេះផ្ទះម្តាយក្មេកនោះ មានឈ្មោះ អ៊ុក ភន អាយុ៣៤ឆ្នាំ ចំណែកម្តាយក្មេកមានឈ្មោះ ប៉ិក តុំ អាយុ៧១ឆ្នាំ ជាស្ត្រីមេម៉ាយ។ ផ្ទះដែលរងការខូតខាត ទី១មានទំហំ៣គុណនឹង៤ម៉ែត្រ ធ្វើពីឈើប្រក់ស្លឹក និងបាំងជញ្ជាំងស្លឹករបស់ជនដៃដល់។ ចំណែកផ្ទះម្តាយក្មេក មានទំហំ៥គុណនឹង៦ម៉ែត្រ ធ្វើពីឈើប្រក់ស្លឹក និងបាំងជញ្ជាំងស្លឹក ត្រូវបានឆេះម៉ត់ទាំងស្រុង គ្មានអ្នកណាជួយពន្លត់ទាន់ឡើយ។ ករណីនេះក្រោយពេលកើតហេតុ ជនដៃដល់ត្រូវបានសមត្ថកិច្ចចាប់ឃាត់ខ្លួន កសាងសំណុំរឿងបញ្ជូនខ្លួនមកស្នងការដ្ឋាននគរបាលខេត្ត ចាត់ការបន្តបញ្ជូនខ្លួនទៅកាន់តុលាការខេត្ត។
ស្ត្រីរងគ្រោះជាម្តាយក្មេកបានអោយសមត្ថកិច្ចដឹងថា៖ កូនស្រីគាត់ ឈ្មោះ ថ្លាង សុគង់ អាយុ៣១ឆ្នាំ បានទៅធ្វើការជាកម្មកររោងចក្រ នៅខេត្តសៀមរៀប ។ មុនពេលកើតហេតុប៉ុន្មានថ្ងៃនេះ គាត់ឃើញ កូនប្រសារគាត់ បានឈ្លោះគ្នាជាមួយកូនស្រីគាត់ជាប្រពន្ធ តាមទូរស័ព្ទស្ទើរតែរៀងរាល់យប់ ហើយឮកូនប្រសារគាត់និយាយថា៖ ចូលឆ្នាំខ្មែរនេះត្រូវតែមកផ្ទះ បើមិនមកទេមានរឿងធំហើយ ។ លុះដល់ពេលចូលឆ្នាំខ្មែរ មិនឃើញកូនស្រីគាត់មកផ្ទះឡើយ ក៏ស្រាប់តែកូនប្រសារគាត់បានដុតផ្ទះវា រាលដល់ផ្ទះគាត់ទៀតឆេះម៉ត់តែម្តង រូមទាំងទ្រព្យសម្បត្តិមួយចំនូនទៀតគ្មានយកអ្វីបាននោះឡើយ។
ស្ត្រីជាម្តាយបានបានបញ្ជាក់អោយដឹងទៀតថា៖ ក្រៅពីខឹងនឹងប្រពន្ធមិនមកផ្ទះ កូនប្រសារគាត់ក៏បាន ប្រច័ណ្ឌនឹងប្រពន្ធវាផងដែរ។ ប៉ុន្តែអ្វីដែលលំបាកដោះស្រាយនោះ គឺផ្ទះមួយខ្នងរបស់គាត់ ដែលកូនប្រសារបានដុតឆេះអស់នោះ គឺគាត់បានលក់អោយគេមានតម្លៃ៤លានរៀល និងគាត់បានយកប្រាក់ពីគេរួចអស់ហើយ គឺនៅរង់ចាំតែគេមករុះយកតែប៉ុណ្ណោះ ។
#ប្រជាពលរដ្ឋអ្នកជិតខាងបានអោយដឹងថា៖ កន្លងមកប្តីប្រពន្ធ២នាក់នេះ រស់នៅមិនសូវត្រូវគ្នាទេ ឈ្លោះគ្នាញឹកញាប់ណាស់កាលប្រពន្ធមិនទាន់ចេញទៅធ្វើការឆ្ងាយនៅរោងចក្រខេត្តសៀមរាប ប៉ុន្តែបើទោះជាខឹងគ្នាយ៉ាងណាក៏ដោយនៅក្នុងពេលបុណ្យចូលឆ្នាំខ្មែរនេះ ស្ត្រីជាប្រពន្ធគួរណាស់តែមកមើលម្តាយ និងប្តីផងដែរមិនគួរចិត្តដាច់នោះឡើយ ដូចពាក្យក្នុងចម្រៀងពោលថា «បងស្រឡាញ់អូនស្ទើរលេបទៅហើយចុះម្តេចឡើយអូនកន្តើយនឹងបង…» ឆេះម៉ត់… ៕ រិទ្ធិ ជ័យ
http://ift.tt/1QgYm3k
