មេគយច្រកអូររំដួលក្នុងខេត្តបាត់ដំបងនៅតែបន្តល្បីល្បាញនាំមុខគេរឿងឃុបឃិតជាមួយឈ្មួញបង្ហូរទំនិញខុសច្បាប់ ទំនិញបង់ពន្ធមិនគ្រប់ចូលពីប្រទេសថៃដែលធ្វើឲ្យរដ្ឋនៅតែខាតបង់ប្រាក់ពន្ធ
ខេត្តបាត់ដំបង ៖ ក្រោយពីបែកធ្លាយរឿងអាស្រូវពុករលួយបន្លំលុយពន្ធរដ្ឋ លោក យ៉ែម ហែមរ៉ាត ប្រធានការិយាល័យគយ និងរដ្ឋាករអូររំដួល ស្ថិតនៅភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង ត្រូវបានអគ្គនាយក អគ្គនាយកដ្ឋានគយ និងរដ្ឋាករកម្ពុជា ដកយកមកបញ្ឈរជើង តែគេមិនដឹងថា លោកមេគយរូបប្រើខ្នងបង្អែក និងចាយលុយប៉ុណ្ណាទេទើបលោកគុណ ញឹម ធ្មេចភ្នែកបញ្ជូនមេគយពុករលួយរូបនេះវិលទៅកើបលុយសារជាថ្មីយ៉ាងក្រអឺតក្រទមលើសដើម។ ចាប់តាំងពី វិលទៅកានតំណែងចាស់នោះលោក យ៉ែម ហែមរ៉ាត មិនបោះបងការឃុបឃិតជាមួយឈ្មួញទុច្ចរិត បង្ហូរទំនិញគេចពន្ធ ទំនិញខុសច្បាប់ចូលពីប្រទេសថៃយ៉ាងពេញបន្ទុកទ្រង់ទ្រាយធំជាងមុន ដោយលែងខ្លាចអំណាចអគ្គនាយដ្ឋានគយទៀតហើយ។
មន្ត្រីពាក់ព័ន្ធនៅមាត់ច្រកបានបង្ហើបថា កន្លងមក ក៏ដូចបច្ចុប្បន្ន តំបន់ច្រកអូររំដួលបានហូរចូលទំនិញមកពីប្រទេសថៃទាំងយប់ទាំងថ្ងៃ រួមមាន ៖ គ្រឿងបន្លាស់រថយន្ត ម៉ូតូកង់ម៉តូ សំបកកង់រថយន្ត ម៉ូតូ សំបក រថយន្ត ទុយយោ គ្រឿងភេសជ្ជៈ ក៏ដូចជា ទំនិញចាប់ហួយនិងទំនិញគេចពន្ធផ្សេងទៀត ភាគច្រើនបង់ពន្ធមិនគ្រប់ ។ ល្បិចបន្លំពន្ធរបស់ លោក យ៉ែម ហែមរ៉ាត គឺស៊ីដោយស្របច្បាប់ គ្រាន់តែលួចបន្លំកែបង្កាន់ដៃនាំចូលពីប្រភេទទំនិញបង់ពន្ធខ្ពស់មកបង់ពន្ធទាបជា ប្រភេទទំនិញ ទំនិញចម្រុះ ហើយការបង់ពន្ធទំនិញចម្រុះនេះទៀតសោធ គឺបង់យ៉ាងច្រើនត្រឹមពាក់កណ្តាលផង នេះជាស្ទីលចាស់ដែល លោក យ៉ែម ហែមរ៉ាត ធ្លាប់ប្រព្រឹត្ត បង្គាប់ឲ្យឈ្មួញបង់តាមការទាមទារគ្មានក្រដាសស្នាមគ្មានវិក្កយបត្រ ។ ដូចកាលពីថ្ងៃទី១៦ ខែមិថុនា ឆ្នាំ២០១៦សាខាគយ និងរដ្ឋាករខេត្តពោធិ៍សាត់ចាប់ បានទំនិញមិនប្រក្រតីបានរកឃើញក្លែងឯកសារជាច្រើនពាក់ព័ន្ធនឹងការនាំទំនិញនៅច្រកអូររំដួលនោះ ។
ដោយអំពើលោភលន់ការកេងបំបាត់ពន្ធរដ្ឋ លោក យ៉ែម ហែមរ៉ាត បានប្រព្រឹត្តនូវរំលោភសច្បាប់ បំពានអនុក្រឹត្យរបស់រដ្ឋាភិបាលស្តីពីពេលវេលាអនុញ្ញាតឲ្យបើកច្រកចេញចូល ។ តែដើម្បីផលប្រយោជន៍ប្រព្រឹត្តពុករលួយ គាត់បានបើកចំហឲ្យរថយន្តដឹកទំនិញ ប្រភេទធំៗពី ប្រទេសថៃឆ្លងកាត់ច្រកអូររំដួលចូលទឹកដីកម្ពុជា ពេលខ្លះចាប់ពីម៉ោង២ទៅម៉ោង៤ទៀបភឺ្ល ប្រយោជន៍លាក់អាថ៌កំបាំងមិនឲ្យដឹង ហើយទុកឱកាសឲ្យឈ្មួញ ធំៗរត់ការបើកផ្លូវពីទឹកដីថៃ កើបយកលុយ ពីទំនិញមិនប្រក្រតីទាំងនោះ ក្នុងមួយខែៗរាប់សិបម៉ឺនដុល្លារ។ មន្ត្រីបានបន្តថា ជាធម្មតាការងាររដ្ឋបាល ទាំងច្រកតំបន់ ច្រកទ្វេរភាគី ច្រកអន្តរជាតិ គឺចរាចរឆ្លងកាត់ចេញ-ចូល ចាប់ពីវេលាម៉ោង៧ព្រឹក និងបញ្ឈប់នៅម៉ោងរដ្ឋបាល ត្រឹមម៉ោង៦ល្ងាច ។
ពាក់ព័ន្ធនឹងការលើកឡើងខាងលើនេះ (ខ្មែរអង្គរ) មិនអាចទាក់ទងបានsសុំការបំភ្លឺពីលោក យ៉ែម ហែមរ៉ាត ប្រធាន ការិយាល័យគយ និងរដ្ឋាករអូររំដួល បាននៅឡើយទេ។ ទោះយ៉ាងណាប្រសិនបើករណីនេះកើតឡើងដូចប្រភពលើកឡើងមែន គេក៏មិនដែលឃើញដោយឡែកលោក ឈុន សុភមង្គល ប្រធានសាខាគយ និងរដ្ឋាករខេត្តបាត់ដំបង សម្ងំស្ងៀមនិងមិនដែលឃើញដឹកនាំមន្ត្រីគយខេត្ត ចុះទប់ស្កាត់ទំនិញគេចពន្ធ ទំនិញបង់ពន្ធមិនគ្រប់ដែលកំពុងតែចរាចរណ៍ពេញបន្ទុកឆ្លងកាត់ខេត្តបាត់ដំប ចេញពីច្រកនានា ជាពិសេសច្រកអូររំដួល។ ភាពព្រងើយកន្តើយនេះមានមជ្ឈដ្ឋានជាច្រើដាក់ការសង្ស័យថា លោក ឈុន សុភមង្គល កំពុងមានចំណែករួមដៃប្រព្រឹត្តអំពើពុករលួយប្រមូលលុយច្រកហោប៉ៅមានជីវភាពធូរធា និងទុកទប់តំណែងខ្លាញ់នេះមិនឲ្យរបូតឡើយ៕ តាណង់
លោក ឈុន សុភមង្គល (ពាក់មួក)
http://ift.tt/2uoImwU
