ក្រឡាប់គោយន្តកែច្នៃដឹកដំឡូងមីពេញ ស្លាប់អ្នកបើកបរម្នាក់ និងរបួសធ្ងន់ធ្ងរម្នាក់
ខេត្តរតនគិរី៖ គោយន្តកែច្នៃមួយគ្រឿង ពណ៌ខៀវលាយ ឆ្នូតលឿង អត់មានពាក់ស្លាកលេខ ផ្ទុកដំឡូងមីពេញប្រៀប ចំណុះជាងពីរតោន ខណៈបើកមកដល់ផ្លូវចុះចំណោតមានល្បឿនលឿន អ្នកបើកបរគ្រប់គ្រងមិនបាន និងចាប់ហ្វ្រាំងមិនជាប់ បណ្តាលអោយគោយន្តបត់ក្បាលធ្លាក់ទៅក្នុងអូរក្រឡាប់ផ្កាប់ផ្ងា បណ្តាលអោយស្លាប់តៃកុងគោយន្តភ្លាមៗ នៅនឹងកន្លែងកើតហេតុ និងរងរបួសធ្ងន់អ្នករួមដំណើរម្នាក់។ ហេតុការណ៍គ្រោះថ្នាក់ចរាចរណ៍ដ៏រន្ធត់មួយបានកើតឡើងកាលពីវេលាម៉ោង៨ និង៤០នាទីនាព្រឹក ថ្ងៃទី១៥ ខែមករា ឆ្នាំ២០១៥ នៅចំណុចភូមិប៉ក់ញ៉ៃ ឃុំប៉កធំ ស្រុកអូរយ៉ាដាវ ។
តាមប្រភពពីសមត្ថកិច្ចកងរាជអាវុធហត្ថប្រចាំនៅស្រុកអូរយ៉ាដាវបានអោយដឹងថា កាលពីវេលាម៉ោងខាងលើ ឃើញគោយន្តកែច្នៃផ្ទុកដំឡុងមីពេញព្រៀបធ្វើដំណើរចេញពីស្រុកអូរយ៉ាដាវតាមផ្លូវជាតិលេខ ៧៨ ក្នុងទិសដៅពីលិចទៅកើត ដោយល្បឿនលឿនលុះទៅដល់ចំណុចកើតហេតុត្រង់ចំណុចភូមិប៉ក់ញ៉ៃ ឃុំប៉កធំ ស្រុកអូរយ៉ាដាវ ក្នុងស្ថានភាពផ្លូវចុះចំណោត គោយន្តផ្ទុកធ្ងន់ហើយឃ្លោងផងនោះ អ្នកបើក បរសាងលេខអត់ចូល បានរ៉េចង្កូតធ្លាក់ទៅក្នុងអូរក្រឡាប់តែម្តង។
ប្រភពដដែលបានឲ្យដឹងទៀតថា៖ អ្នកបើកបរគោយន្តមានឈ្មោះ សុខ វី ភេតប្រុស អាយុ៣៥ឆ្នាំ ជនជាតិខ្មែរ មានទីលំនៅសព្វថ្ងៃនៅភូមិអ៊ុន ឃុំលំជ័រ ស្រុកអូរយ៉ាដាវ ខេត្តរតនគិរី ត្រូវបានស្លាប់ភ្លាមៗនៅនិងកន្លែងកើតហេតុ។ និងអ្នករួមដំណើរម្នាក់ឈ្មោះ ផាន់ ផាន ភេតប្រុស អាយុ៤៥ឆ្នាំ ជនជាតិខ្មែរ មានទី លំនៅភូមិឃុំខាងលើត្រូវរងរបួសធ្ងន់ធ្ងរ។ #ក្រោយពេលកើតហេតុ សមត្ថកិច្ចកងរាជអាវុធចុះជួយជនរងគ្រោះ ដឹកជញ្ជូនជនរងគ្រោះទាំង២នាក់ តាមរថយន្តសមត្ថកិច្ចទៅកាន់មណ្ឌលសុខភាពស្រុកអូរយ៉ាដាវ និងប្រគល់សាកសពទៅអោយក្រុមគ្រួសារដើម្បីធ្វើបុណ្យទៅតាមប្រពៃណី។ ចំណែកគោយន្តត្រូវបានសមត្ថកិច្ចមូលដ្ឋាននាំទៅរក្សានៅប៉ុស្តិ៍នគរបាលឃុំប៉ក់ធំ រងចាំការដោះស្រាយជាក្រោយ៕ ដោយ លី វណ្ណៈ
