ទីតាំង ល្បែងជល់មាន់បង្កប់ដោយ បៀ អាប៉ោង នៅកណ្តាលទីរួមស្រុកស្ទឹងហាវ កំពុងបើកលេងយ៉ាងពេញបន្ទុក ដោយសារអាជ្ញាធរ និងសមត្ថកិច្ចរក្សាទុកជាឆ្នាំងបាយ
ខេត្តព្រះសីហនុ៖ ប្រជាពលរដ្ឋក្នុងមូលដ្ឋានស្រុកស្ទឹងហាវ កំពុងធ្វើការរិះគន់យ៉ាងខ្លាំង ទៅលើអាជ្ញាធរដែនដី កងរាជអាវុធខេត្តស្រុក សមត្ថកិច្ចប៉ូលិសស្រុកថា កំពុងរក្សាបនល្បែងជល់មាន់ដ៏ទ្រហឹងអឺងកង នៅកណ្តាលទីរួមស្រុកស្ទឹងហាវ ដើម្បីទទួលបានការបង់ប្រាក់បន្តិចបន្ទួច ប្រចាំខែពីមេបនល្បែង រហូតដល់លែងខ្វល់ពីការអនុវត្តគោលនយោបាយភូមិ ឃុំមានសុវត្ថិភាសុវត្តិភាពអស់ទៅហើយ។ ចំណែកពលរដ្ឋគិតគូរពីសេចក្តីសុខក្នុងមូលដ្ឋានបានចាត់ទុកថា ល្បែងជាប្រភពវិនាស ហិង្សា ក្នុងគ្រួសារ និងកើតមានអំពើឆក់ ប្លន់ ។ល។ ហើយបច្ចប្បន្នពលរដ្ឋកំពុងរស់នៅក្នុងក្តីខ្វល់ខ្វាយ។
ការរិះគន់នេះបានធ្វើឡើងបន្ទាប់អាជ្ញាធរគ្រប់ជំនាញ កំពុងតែលើកកំពស់ វង់បនល្បែងស៊ីសងមួយកន្លែងដែលមានទាំង បៀ អាប៉ោង និង ជល់មាន់ បានដំណើរការណ៍លេងយ៉ាងអនាធីបតេយ្យ នៅចំណុចក្បែសាលារៀនអនុវិទ្យាល័យស្ទឹងហាវថ្មី ស្ថិតក្នុងភូមិថ្មី ឃុំទំនប់រលក ស្រុកស្ទឹងហាវ ខេត្តព្រះសីហនុ ដែលកំពុងបង្កផលប៉ះពាល់យ៉ាងធ្ងន់ដល់ក្មេងៗសិស្សសាលា និង ការរស់នៅរបស់ប្រជាពលរដ្ឋ។ ប្រជាពលរដ្ឋបានរាយការណ៍ឲ្យដឹងថា ជារៀងរាល់ថ្ងៃចាប់ពីម៉ោង១១ថ្ងៃត្រង់រហូតដល់ម៉ោង២ល្ងាច ទីតាំងល្បែងមួយនេះតែងតែបង្កការរំខានដល់អ្នកដ៏ទៃ ដោយសារតែអ្នកលេងល្បែងសម្រែកហ៊ោកញ្ជ្រៀវកងរំពងខ្ញៀវខ្ញារ មិនខ្លាចក្រែងអ្នករស់នៅក្បែរនោះទេ ដោយសារតែម្ចាស់បនល្បែងនោះ មានការទុកចិត្តថា អាជ្ញាធរដែនដី PM ប៉ូលិសមិនប៉ះពាល់ពួកគេទេ ដោយសារទីនោះជាឆ្នាំងបាយ។
ទាក់ទងបញ្ហានោះ កម្មករទូកម្នាក់ សុំមិនបញ្ជេញឈ្មោះ ដែលរស់នៅក្បែរនោះបានអះអាងថា ចំពោះមូលហេតុដែល ម្ចាស់ទីតាំងល្បែងហ៊ានបើកលេងល្បែងស៊ីសងកណ្តាលទីរួមស្រុកម៉ាសប្បាយនេះក៏ដោយសារម្ចាស់ទីតាំងបានរៀបចំរបបខែជូនពីថ្នាក់មេប៉ុស្តិ៍ ថ្នាក់ភូមិ រហូតដល់ថ្នាក់ អធិការ មេបញ្ជាការអាវុធហត្ថស្រុក រួចរាល់ហើយ គ្មានសល់ចន្លោះប្រហោងណាមួយឲ្យគេភិតភ័យនោះទេ។ ដូចនេះ ទៅខ្លាចអីទៀត ពួកគេងសប្បាយទាំងឆ្កួតវង្វេងលែងធ្វើការងារអ្វីទៀតហើយ ម្នាក់ៗប្រាថ្នាចង់ស្រណុកកាយ ចង់កៀងគជួបជុំគ្នាលេងល្បែងភ្នាល់ដាក់លុយកាក់ឮថាមានឆ្នះមានចាញ់រាប់លានរៀលរាប់រាប់ពាន់ដុល្លារ មិនយូរទេ អំពើចោរកម្ម លួចឆក់ប្លន់នឹងកើតឡើងហើយ ។
ពាក់ព័ន្ធករណីខាងលើនេះ លោក រស់ កី អធិការស្រុកស្ទឹងហាវ បានអះអាងថា ទីតាំងសង្វៀនល្បែងជល់មាន់នោះលោកបានបញ្ជាអោយថ្នាក់ប៉ុស្តិ៍ ចុះបិទម្តងជាពីរដងមកហើយ ប៉ុន្តែក្រុមម្ចាស់ទីតាំងនៅតែលួចបើកដ៏ដែល ដូចនេះលោកនឹងព្យាយាមចុះបង្ក្រាបអោយខាងតែបានជាដាច់ខាតមិនបណ្តោយអោយកើតមានទីតាំងល្បែងស៊ីសងនៅក្នុងភូមិឃុំនៃស្រុកស្ទឹងហាវជាដាច់ខាត។ ពលរដ្ឋចាំមើលការប្តេជ្ញាចិត្តរបស់លោក រស់ កី អធិការស្រុកស្ទឹងហាវ ថាតើទៅរួចទេ? ៕ ដោយ កោះរ៉ុង
