ស្ត្រី២នាក់ម្តាយ និងកូន រងរបួសធ្ងន់ស្រាលដោយសាររថយន្តនីសាន់ បុកម៉ូតូ ក្នុងដំណើរខ្វែងទិសគ្នា
ខេត្តកំពង់ឆ្នាំង៖ ស្ត្រី២នាក់ម្តាយ និងកូន បានរងរបួសធ្ងន់ និងស្រាល ក្នុងហេតុការណ៏គ្រោះថ្នាក់ ចរាចរណ៍ មួយខណៈដែលស្ត្រីរងគ្រោះទាំង២នាក់ជិះម៉ូតូបុកជាមួយរថយន្តមួយគ្រឿង។ គ្រោះថ្នាក់ នេះបាន កើតឡើងនៅវេលាម៉ោង៤ និង២០នាទីល្ងាចថ្ងៃទី១២ ខែកុម្ភៈ ឆ្នាំ២០១៥ នៅចំណុចផ្លូវបែក ជាបួនក្រោយរបងរោងចក្រ M.V ស្ថិតក្នុងភូមិត្រពាំងចឹក្សា សង្កាត់កំពង់ឆ្នាំង ក្រុងកំពង់ឆ្នាំង។
ប្រភពពីមន្ត្រីនគរបាលចរាចរណ៍ក្រុងកំពង់ឆ្នាំងបាននិយាយថា៖ ស្ត្រីជាម្តាយបានរងរបួសធ្ងន់ មានឈ្មោះ ផល ថេន អាយុ៥៧ឆ្នាំ ចំណែកកូនស្រីរងរបួសស្រាលមានឈ្មោះ សុខ ស្រីមុំ អាយុ៣២ឆ្នាំ ទាំង២នាក់ ពួកគេមានទីលំនៅភូមិទួលខ្សាច់ ឃុំជ្រៃបាក់ ស្រុករលាប្អៀរ ។ មុនពេលកើតហេតុ ស្ត្រីជាកូន ឈ្មោះ សុខ ស្រីមុំ បានជិះម៉ូតូម៉ាកឌ្រីម១២៥ សេរី០១៤ ពណ៌ខ្មៅ គ្មានស្លាកលេខ ឌុបម្តាយពីក្រោយ ក្នុងដំណើរពីត្បូងទៅ ជើង ។
លុះពេលមកដល់ចំណុចកើតហេតុ ដែលជាផ្លូវបែកជា៤ ស្រាប់តែមាន រថយន្តមួយគ្រឿងទៀតម៉ាក នីសាន់ណាវ៉ារ៉ា បើកបរដោយបុរសមិនស្គាល់ឈ្មោះ បានបើកក្នុងដំណើរ ពីកើតមកលិច ខ្វែងទិសគ្នា ហើយក៏បានបុកគ្នាតែម្តង ពេលនោះ គេឃើញស្ត្រីជាម្តាយបានរងរបួសធ្ងន់ ហើយត្រូវបានរថយន្តដែលបង្ករគ្រោះថ្នាក់នោះជួយដឹកស្ត្រីរងគ្រោះពីកន្លែង កើតហេតុយកមកមន្ទីរពេទ្យខេត្ត ប៉ុន្តែពេលលើកស្ត្រីរងគ្រោះដាក់អោយគ្រូពេទ្យជួយសង្គ្រោះហើយ អ្នកបើកបររថយន្តបានបើក រថយន្តគេចខ្លួនចេញបាត់តែម្តង។
ករណីនេះសមត្ថកិច្ចនគរបាលបានស្រាវជ្រាវ និងបានស្គាល់អត្តសញ្ញាណម្ចាស់រថយន្តនីសាន់ណាវ៉ារ៉ា នោះហើយ គឺជាអ្នកបើករថយន្តទិញមាន់ នៅចំណុចទំនប់បារាំង ស្ថិតក្នុងភូមិផ្សារឆ្នាំង សង្កាត់ផ្សារឆ្នាំង ដែលពេលនេះសមត្ថកិច្ចកំពុងស្វែងរក អោយមកទទួលខុសត្រូវចំពោះករណីគ្រោះថ្នាក់ ចរាចរណ៍ខាង លើនេះ ។ ចំណែកម៉ូតូជនរងគ្រោះត្រូវបានយកមករក្សាទុកនៅអធិការដ្ឋាននគរបាលក្រុង ដើម្បីកសាង សុំណុំរឿងតាមផ្លូវច្បាប់ រង់ចាំការដោះស្រាយតាមនិតិវិធីពេលក្រោយ ៕ ដោយ រិទ្ធិ ជ័យ
