ផឹកស្រាស្រវឹង ប្រពន្ធស្តីបន្ទោសបន្តិចបន្ទួច តូចចិត្តលែងចង់រស់ បានយកកាំភ្លើងអាកាទល់ចង្កា រួចបាញ់ទម្លាយក្បាលខ្ចាយខួរស្លាប់ភ្លាម
ខេត្តរតនគិរី៖ មន្ត្រីនគរបាលប៉ុស្តិ៍ឃុំសេដា ផឹកស្រាស្រវឹងរាល់ថ្ងៃផ្ទួនៗប្រពន្ធគម្រាមលែងលះបើនៅតែប្រមឹករាល់ថ្ងៃមិនព្រមឈប់។ បន្ទាប់ពីឮដូច្នេះក៏តូចចិត្តគឹតខ្លីលែងចង់រស់ ក៏បាន យកកាំភ្លើងអាកា (AK)ស្វាយបត់បាញ់ស្លាប់ខ្លួនឯងនៅក្នុងផ្ទះ កាលពីវេលាម៉ោង៨យប់ ថ្ងៃទី១២ ខែកុម្ភៈ ឆ្នាំ២០១៥ ត្រង់ ចំណុច ក្នុងផ្ទះស្ថិតនៅភូមិថ្មី ឃុំសេដា ស្រុកលំផាត់ ខេត្តរតនគិរី។
បើតាមការអោយដឹងពីលោកសុវណ្ណរាយ មេប៉ុស្តិ៍ឃុំសេដាបានប្រាប់អ្នកពត៌មានយើងអោយដឹងថា ជនរងគ្រោះដែលបាញ់សម្លាប់ខ្លួនឯងនោះមានឈ្មោះ ធឿន រតនី ភេទប្រុស អាយុ២៦ឆ្នាំ ជនជាតិខ្មែរ មានឋានៈជាមន្ត្រីប៉ុស្តិ៍ឃុំសេដា និងមានទីលំនៅខាងលើ មានប្រពន្ធឈ្មោះសាំង រ៉ាវេត ភេទស្រី អាយុ២២ឆ្នាំ ជនជាតិខ្មែរ និងមានកូនស្រី១នាក់ អាយុ២ឆ្នាំ។
លោកមេប៉ុស្តិ៍បានប្រាប់ទៀតថា មុនពេលកើតហេតុឈ្មោះ ធឿន រតនី បានទៅផឹកស្រាជាមួយមិត្តភ័ក្ត នៅក្រៅផ្ទះរហូតស្រវឹងលុះត្រឡប់មកផ្ទះវិញមិនឃើញប្រពន្ធ ក៏បានទូរស័ព្ទហៅប្រពន្ធអោយមក ផ្ទះ ពេលដែលប្រពន្ធមកដល់ផ្ទះនោះឃើញប្តីមានអាការៈស្រវឹងខ្លាំងក៏បានស្តីបន្ទោសថា អោយឈប់ផឹកស្រាទៀតទៅព្រោះឃើញស្រវឹងជារៀងរាល់ថ្ងៃ បើនៅតែផឹកស្រាទៀតប្រពន្ធនឹងសុំលែងលះ។ ខណៈ ពេលដែលប្តីកំពុងស្រវឹងហើយលឺប្រពន្ធនិយាយបែបនេះក៏បានដើរចូលទៅក្នុងផ្ទះទាញយកកាំភ្លើងអាកាស្វាយបត់១ដើម មកអង្គុយលើអង្រឹងហើយអាមេបញ្ចូលគ្រាប់ និងយកកាណុងភ្ជង់ចង្កាខ្លួនឯងហើយក៏បានបាញ់ធ្លុះចង្កាធ្លាយក្បាលខ្ទាតខួរស្លាប់ភ្លាមៗនៅនឹងកន្លែង។
លោកមេប៉ុស្តិ៍បានបញ្ជាក់ទៀតថា កាំភ្លើងអាកាស្វាយបត់ដែលឈ្មោះធឿន រតនី បានយកមកបាញ់ស្លាប់ខ្លួននោះជាកាំភ្លើងរបស់ប៉ុស្តិ៍រដ្ឋបាលឃុំសេដា បានចេញបើកអនុញ្ញាតអោយប្រើប្រាស់សំរាប់ការពារសន្តិសុខភូមិ ឃុំ នៅក្នុងមូលដ្ឋាន មិននឹកស្មានថាបុគ្គលនោះហ៊ានយកកាំភ្លើងធ្វើអត្តឃាតខ្លួនឯងទាល់តែសោះ។ បច្ចុប្បន្នសាកសពមន្ត្រីប៉ុស្តិ៍ដែលបាញ់សម្លាប់ខ្លួនឯងនោះត្រូវបានក្រុមគ្រួសារសាច់ញាតិធ្វើបុណ្យតាមប្រពៃណីនៅព្រឹកមិញនេះហើយ៕ ដោយ លី វណ្ណៈ
