ប្រជាពលរដ្ឋស្ម័គ្រចិត្ត៩នាក់នៅភូមិព្រែកសាលា បានប្រគល់អាំងវែកទ័រឆក់ត្រីជូនសហគមន៍
ខេត្តកំពង់ឆ្នាំង៖ ក្រោយពីខ័ណ្ឌរដ្ឋបាលជលផលកំពង់ឆ្នាំង បានផ្សព្វផ្សាយសេចក្តីណែនាំ របស់ខេត្ត និងច្បាប់ស្តីពីជលផល ជូនដល់ប្រជាពលរដ្ឋតាមមូលដ្ឋាន និងសហគមន៍ ជាបន្តបន្ទាប់រួចមកនៅក្នុងភូមិព្រែកសាលា ឃុំទឹកហូត ស្រុករលារប្អៀរ នាថ្ងៃទី១១ ខែកុម្ភៈ ឆ្នាំ២០១៥ ប្រជាពលរដ្ឋ ស្ម័គចិត្ត៩នាក់បានភ្ញាក់រលឹកនាំគ្នាយកឧបករណ៏ឆក់ត្រីមកប្រគល់អោយសហគមន៏នេសាទក្នុងភូមិជាបន្តបន្ទាប់។
លោក ឃុត ខេង ដែលជាប្រធានក្រុមល្បាតរបស់សហគមន៏នេសាទភូមិព្រែកសាលា ឃុំទឹកហូត បានអោយដឹងថា ជាក់ស្តែងនៅរសៀលថ្ងៃទី១១ ខែកុម្ភះ ឆ្នាំ២០១៥នេះ ក្នុងសហគមន៍របស់លោកមានប្រជាពលរដ្ឋចំនួន៩នាក់បានស្ម័គ្រចិត្តយកអាំងវែកទ័រឆក់ត្រី៩គ្រឿងមកប្រគល់អោយដោយភ្ញាក់រលឹក។
ប្រជាពលរដ្ឋដែលបានស្ម័គ្រចិត្តខាងលើនេះបានអោយដឹងថា៖ ពួកគាត់ប្តេជ្ញាថា និងខិតខំការពារ និងជួយអភិរក្យមច្ឆាជាតិនៅក្នុងសហគមន៍ពូកគាត់អោយបានគង់វង្ស និងព្យាយាមពន្យល់ណែនាំប្រជាពលរដ្ឋផ្សេងទៀតអោយមានការភ្ញាក់រលឹកនិងយល់ដឹងអំពីច្បាប់ ស្ម័គចិត្តយកឧបករណ៍ឆក់ត្រីខុសច្បាប់ទាំងនោះដែលគេមានយកមកប្រគល់អោយសហគមន៍ដូចពួកគាត់ដែរ។
នៅក្នុងថ្ងៃប្រគល់ឧបករណ៏ឆក់ត្រីនោះផងដែរ លោក ឃុត ខេង ជាប្រធានក្រុមល្បាត របស់សហគមន៍នេសាទក្នុងភូមិព្រែកសាលា លោកបានថ្លែងអំណរគុណដល់ប្រជាពលរដ្ឋ ដែលមានការយល់ដឹង និងភ្ញាក់រលឹកទាន់ពេល ហើយបាននាំគ្នាយកឧបករណ៍ឆក់ត្រីមកប្រគល់អោយសហគមន៍។
ឆ្លៀតក្នុងឱកាសនោះដែរលោកក៏សូមអំពាវនាវដល់ប្រជាពលរដ្ឋក្នុងសហគមន៍លោកដែលមានឧបករណ៍ ឆក់ត្រី ដែលមិនទាន់បានយកមកប្រគល់អោយសហគមន៍ សូមប្រញាប់ប្រញាល់យកមកប្រគល់ អោយសហគមន៍ៗ នឹងនៅរង់ចាំទទួលគ្រប់ពេលវេលា បើមិនដូច្នោះទេពួកគេនឹងប្រឈមជាមួយ និងការអនុវត្តច្បាប់របស់សមត្ថកិច្ច និងតុលាការហើយប្រឈម និងការចាប់ដាក់គុកពី១ឆ្នាំទៅ៣ឆ្នាំ។
លោក សោម ភិរុណ នាយរងខ័ណ្ឌរដ្ឋបាលជលផលកំពង់ឆ្នាំង ដែលត្រូវប្រកាស់ឡើងជានាយខ័ណ្ឌ រដ្ឋបាលជលផលកំពង់ឆ្នាំងនៅព្រឹកថ្ងៃទី១៣ ខែកុម្ភៈ ឆ្នាំ២០១៥នេះ បាននិយាយអោយដឹងថា៖ តាមគោលការណ៍របស់រដ្ឋបាលជលផល និងអាជ្ញាធរខេត្ត ការលុបបំបាត់ឧបករណ៍ឆក់ត្រីតាមមូលដ្ឋានមាន៣ជំហ៊ានគឺ៖ ទី១ផ្សព្វផ្សាយច្បាប់អោយប្រជាពលរដ្ឋដែលមានឧបករណ៍ឆក់ត្រីនៅតាមមូលដ្ឋានអោយពួកគាត់យល់ដឹងនិងភ្ញាក់រលឹកយកឧបករណ៍ឆក់ត្រីមកប្រគល់អោយសមត្ថកិច្ច ឬអាជ្ញាធរដោយខ្លួនឯង ដែលកន្លងមកយើងទទួលបានឧបករណ៍ឆក់ត្រីរាប់រយគ្រឿងពីប្រជាពលរដ្ឋស្ម័គចិត្ត ទី២សមត្ថកិច្ចរដ្ឋបាលជលផលនិងធ្វើលិខិតកោះហៅមកអប់រំអោយប្រគល់ឧបករណ៍ឆក់ត្រី និងទី៣បើពួកគាត់នៅតែរឹងរុះសមត្ថកិច្ចជំនាញ និងកសាងសំណុំរឿងបញ្ជូនឈ្មោះអ្នកមានឧបករណ៍ឆក់ត្រីដែលមានក្នុងបញ្ជី ទៅកាន់តុលាការខេត្តចាត់ការតាមផ្លូវច្បាប់៕ ដោយ រិទ្ធិ ជ័យ
