សាលាក្រុងហាម ប្រើប្រាស់ យន្តហោះ បញ្ជា “Drone”
ភ្នំពេញៈ សាលារាជធានីភ្នំពេញ ព្រមានចាត់វិធានការតាមផ្លូវច្បាប់ និងប្រកាសហាមឃាត់មិនឲ្យប្រើប្រាស់យន្តហោះបញ្ជា “Drone” ផ្ដិតយករូបភាពក្នុងភូមិសាស្ត្ររាជធានីភ្នំពេញនោះឡើយ ដោយអាជ្ញាធរបានអះអាងថា អាចបង្កផលប៉ះពាល់ដល់សិទ្ធិរស់នៅឯកជន ក៏ប៉ុន្តែបានលើកឡើងថា ក្នុងករណីចាំបាច់ ត្រូវសុំការអនុញ្ញាតពីអាជ្ញាធរជាមុនសិន។
សេចក្តីជូនដំណឹងរបស់សាលារាជធានីភ្នំពេញ កាលពីថ្ងៃទី១៦ ខែកុម្ភៈ ឆ្នាំ២០១៥ បានឲ្យដឹងថា អាជ្ញាធររាជធានីភ្នំពេញ បានហាមដាច់ខាត និងព្រមានចាត់វិធានការតាមផ្លូវច្បាប់ ចំពោះករណីល្មើសច្បាប់ ចំពោះក្រុមហ៊ុនឯកជន ដែលបានប្រើប្រាស់ម៉ាស៊ីនថតរូប និងវីដេអូ បំពាក់លើយន្តហោះបញ្ជា “Drone” ផ្តិតយករូបភាពក្នុងភូមិសាស្ត្ររាជធានីភ្នំពេញ។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានថ្លែងប្រាប់សារព័ត៌មាននគរបាលជាតិ ដោយបញ្ជាក់បន្ថែមថា ការហាមឃាត់នេះ បានធ្វើឡើងក្នុងគោលបំណងទប់ស្កាត់នូវភាពអសកម្មមួយចំនួន ដែលបង្កឡើងដោយសារការថតរូបភាពតាមយន្តហោះបញ្ជា “Drone”។
មន្ត្រីអ្នកនាំពាក្យសាលារាជធានីភ្នំពេញរូបនេះ បានរំឭកថា នាសប្ដាហ៍កន្លងទៅ មានជនបរទេសម្នាក់ បានបញ្ជាយន្តហោះ“Drone” ផ្តិតយករូបភាពមួយចំនួនក្នុងរាជធានីភ្នំពេញ និងបានឈានដល់បរិវេណក្នុងព្រះបរមរាជវាំងទៀតផង ដែលករណីនេះ ជាការរំលោភសិទ្ធិមួយយ៉ាងធ្ងន់ធ្ងរ និងអាចឈានដល់ភាពអសន្តិសុខសុវត្ថិភាពសាធារណៈ ព្រមទាំងបង្កនូវភាពអសកម្មមួយចំនួនទៀតផងដែរ។
យ៉ាងណាក៏ដោយ ក្នុងសេចក្តីជូនដំណឹង ស្តីពីការហាមឃាត់ ការប្រើប្រាស់ម៉ាស៊ីនថតរូប និងវីដេអូបំពាក់លើយន្តហោះបញ្ជា “Drone” ក្នុងភូមិសាស្ត្ររាជធានីភ្នំពេញ បានបញ្ចាក់ថា ក្នុងករណីចាំបាច់ អ្នកប្រើយន្តហោះបញ្ចា“Drone” អាចសុំការអនុញ្ញាតជាមុនពីអាជ្ញាធររាជធានីភ្នំពេញ។
គួរគត់សម្គាល់ថា ការហាមឃាត់នេះ បានធ្វើឡើងស្របពេលដែលបច្ចុប្បន្នមានក្រុមហ៊ុនទូរទស្សន៍ និងក្រមហ៊ុនមួយចំនួនទៀត ព្រមទាំងអ្នកទេសចរផ្សេងខ្លះផងដែរ កំពុងពេញនិយមដោយបានប្រើប្រាស់ម៉ាស៊ីនថតផ្ដិតរូបភាព និងវីដេអូបំពាក់យន្តហោះបញ្ជាដោយម៉ាស៊ីនស្វ័យប្រវត្តិ “Drone” តាមតំបន់មួយចំនួនក្នុងប្រទេសកម្ពុជា ដោយពួកគេយល់ថា ការថតរូបភាព និងវីដេអូបំពាក់យន្តហោះបញ្ជាដោយម៉ាស៊ីនស្វ័យប្រវត្តិ “Drone” បានបង្កភាពងាយស្រួលដល់ពួកគេ ដើម្បីផ្តិតយករូបភាពបានច្បាស់ល្អ៕
ប្រភព៖ អគ្គស្នងការដ្ឋាននគរបាលជាតិ
from Khmernote - The best entertainment website in Cambodia http://ift.tt/1L50r0F
