បត់ម៉ូតួខ្វះការប្រុងប្រយ័ត្ន ត្រូវបានរថយន្តមកពីក្រោយ ផ្លោងទាំងម៉ូតូ និងមនុស្សធ្លាក់ពីលើថ្នល់ស្លាប់១នាក់ និងរបួសធ្ងន់២នាក់
ខេត្តរតនគិរី៖ រថយន្តលុច្សស៊ីស៣៣០បុក យុវជនម្នាក់ស្លាប់ភ្លាមៗ និងរបួសក្នុងសភាពធ្ងន់២នាក់ខណៈកំពុងជិះម៉ូតូឌុបគ្នាដោយបត់ម៉ូតួទៅខាងឆ្វេងដៃខ្វះការប្រុងប្រយ័ត្នត្រូវបានរថយន្ត លុច្សស៊ីសបើកបុកបើកស្របទិសពីក្រោយបុកចំពេញទំហឹងបណ្តាលឲ្យផ្លោងទាំងម៉ូតូ និងមនុស្សធ្លាក់ពីលើថ្នល់។ គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៦ល្ងាចថ្ងៃទី២៩ ខែមិនា ឆ្នាំ២០១៥ នៅតាមបណ្តោយផ្លូវជាតិលេខ៧៨ ត្រង់ចំណុចអូរគគី ស្ថិតក្នុងភូមិ៣ ឃុំស្រែអង្គ្រង ស្រុកកូនមុំ។
លោក ផាន់ តិ អធិការរងស្រុកកូនមុំ បានអោយដឹងថា រថយន្តដែលបើកបុកម៉ូតូនេះម៉ាកលុច្សស៊ីសពណ៌ខ្មៅ ពាក់ស្លាកលេខ2Q-9097 បើកបរពីកើតទៅលិចតាមបណ្តោយផ្លូវជាតិលេខ៧៨ លុះមកដល់ កន្លែងកើតហេតុ ក៏វ៉ាក់អើជាមួយម៉ូតូម៉ាកយ៉ាម៉ាហា ពណ៌ខ្មៅមួយគ្រឿងដែលជិះដោយយុវជនម្នាក់ឌុបគ្នា២នាក់ទៀត បានបត់ម៉ូតូមកធ្វេងដៃបំណងចូលទៅតាមផ្លូវក្រុមហ៊ុនហ៊ង់ អាញ់ ឡានជាន់ហ្វាំងមិនទាន់បុកម៉ូតូនេះពីក្រោយពេញទំហឹង បណ្តាលអោយផ្លោងទាំងម៉ូតូ និងមនុស្សធ្លាក់ពីលើថ្នល់ស្លាប់ម្នាក់នៅនឹងកន្លែងកើតហេតុ ចំណែក២នាក់ទៀតរងរបួសធ្ងន់ត្រូវបានរថយន្តដឹកយកមកសង្គ្រោះបន្ទាប់នៅឯមន្ទីរពេទ្យបង្អែកខេត្ត។
ជនរងគ្រោះនៅក្នុងហេតុការណ៍នោះមានឈ្មោះ ទី១.ឈ្មោះ ធឿន ម៉ៅ ភេទប្រុស អាយុ១៩ឆ្នាំ ជនជាតិខ្មែរ ស្លាប់ នៅកន្លែងកើតហេតុ ទី២ ឈ្មោះ ម៉ាច សាវ៉ែន ភេទប្រុស អាយុ១៧ឆ្នាំ ជនជាតិខ្មែរ ទទួលរងរបួសធ្ងន់ និងទី៣ ឈ្មោះយឿន ដារ៉ា ភេទប្រុស អាយុ១៩ឆ្នាំ ជនជាតិខ្មែរ រងរបួសធ្ងន់។ ចំណែកតៃកុងបើកបររថយន្តបង្កនេះក្រោយពីបុកម៉ូតូហើយនោះមិនបានឈប់ មើលជនរងគ្រោះនោះទេថែមទាំងបន្ថែមល្បឿនបើករថយន្តរត់គេចចម្ងាយជាង៣គីឡូម៉ែត្រពីកន្លែងកើតហេតុ ទើបសមត្ថកិច្ចដេញឃាត់បាន។ប៉ុន្តែតៃកុងឡាននេះបានឈប់រថយន្តចុះរត់ចូលព្រៃបាត់ស្រមោលតែម្តង។
សមត្ថកិច្ចនគរបាលស្រុកកូនមុំសហការជាមួយកម្លាំងអាវុធហត្ថបានចុះទៅធ្វើការវាស់វែងរួចធ្វើកំណត់ហេតុប្រគល់សពអោយទៅសាច់ញាតិយកទៅធ្វើបុណ្យតាមប្រពៃណី ព្រមទាំងនាំយកម៉ូតូ និងរថយន្តនេះមករក្សាទុកនៅកន្លែងអធិការនគរបាលស្រុកកូនមុំ ដើម្បីធ្វើការស្រាវជ្រាវរកម្ចាស់រថយន្តនេះមកដោះស្រាយគ្នាទៅតាមច្បាប់។ បើយោងតាមប្រភពពត៌មានពីសាច់ញាតិជនរងគ្រោះបានបញ្ជាក់ថា ជនរងគ្រោះទាំង៣នាក់ធ្វើការនៅក្នុងក្រុមហ៊ុនហ៊ង អាញ់ ដែលមានទីតាំងស្ថិតនៅក្នុងស្រុកកូនមុំនេះផងដែរ៕ ដោយ លី វណ្ណៈ
http://ift.tt/1Fcvff8
