ស្ត្រីម្នាក់រវល់និយាយទូរស័ព្ទក៏ដើរស្លុយឆ្លងផ្លូវត្រូវរថយន្តបុកបាក់ជើងឆ្វេងជាច្រើនកំណាត់
ខេត្តព្រះសីហនុ៖ ស្ត្រីម្នាក់បានរងរបួសធ្ងន់ បាក់ជើងឆ្វេងជាច្រើនកំណាត់ ដោយសារដើរឆ្លងផ្លូវ ហើយត្រូវបានរថយន្តម៉ាកឡុចស៊ីសពណ៌ស្ករបុកពេញទំហឹងខ្ទាតជាច្រើនម៉ែត្រ ការពីវេលាម៉ោង១៧ និង៣៥នាទីយប់ ថ្ងៃទី២៨ ខែមេសា ឆ្នាំ២០១៥ នៅចំណុចអូរសំអាត ស្ថិតក្នុងភូមិ៣ សង្កាត់លេខ៣ ក្រុងព្រះសីហនុ ខេត្តព្រះសីហនុ។
យោងតាមសំដីសមត្ថកិច្ចចរាចរណ៍បានអោយដឹងថា ករណីគ្រោះថ្នាក់ចរាចរណ៍នេះ បង្កឡើងដោយរថយន្តម៉ាកឡុចស៊ីស ពណ៌ស្ករ ពាក់ស្លាកលេខព្រះសីហនុ 2A-3738 បើកបរក្នុងទិសដៅពីកើតទៅលិច។ បន្ទាប់ពីបើករថយន្តបុកស្ត្រីរងគ្រោះដែលកំពុងដើរឆ្លងផ្លូវពីត្បូងទៅជើងរួច អ្នកបើកបរ មិនស្គាល់អត្តសញ្ញាណ បានរត់គេចខ្លួនបាត់ ។ ស្ត្រីរងគ្រោះមានឈ្មោះហេងសុវណ្ណារី ភេទស្រីអាយុ៤៩ មានទីលំនៅភូមិ ២សង្កាត់លេខ៣ ក្រុង ខេត្តព្រះសីហនុ ភ្លាមនោះត្រូវបានសាច់ញ្ញាតិបញ្ជូនទៅកាន់រាជធានីភ្នំពេញ ដោយសារតែអាការៈធ្ងន់ធ្ងរពេក។
ដោយឡែកបើតាមសំដីសាក្សីនៅក្បែរកន្លែងកើតហេតុបានអះអាងថា៖ មុនកើតហេតុ មានរថយន្ត និងម៉ូតូកំពុងបើកបរយ៉ាងមមាញឹកនៅលើដងផ្លូវ។ គេឃើញរថយន្តម៉ាកឡុចស៊ីសពណ៌ស្ករបានបើកបរក្នុងទិសដៅពីកើតសំដៅទៅលិចក្នុងល្បឿនមធ្យម (ល្បឿនប្រហាក់ប្រហែល៦០គីឡូម៉ែត្រក្នុង០១ម៉ោង) រហូតមកដល់ចំណុចកើតហេតុ ពេលនោះគេឃើញស្ត្រីរងគ្រោះបានដើរឆ្លងផ្លូវពុំបានមើលឆ្វេងមើលស្តាំឡើយ ដោយសារតែរវល់និយាយទូរស័ព្ទ ក៏បានដើរសំដៅរថយន្តបុកពេញទំហឹងតែម្តង បណ្តាលអោយស្ត្រីរងគ្រោះដួលបោកលើផ្លូវបាក់ជើងឆ្វេងជាច្រើនកំណាត់ ដោយបន្សល់ឆ្អឹងនិងសាច់ជាប់កាងរថយន្ត ។
ក្រោយកើតហេតុរថយន្តបង្កត្រូវបានសមត្ថកិច្ចចរាចរណ៍ យកទៅរក្សាទុកនៅការិយាល័យចរាចរណ៍ផ្លូវគោកខេត្តរងចាំការដោះស្រាយនៅពេលក្រោយ ៕ ដោយ សមុទ្រខៀវ
http://ift.tt/1JP8cbo