យុវជនម្នាក់របួសធ្ងន់សល់ដង្ហើមចង្រិត និងបុរសវ័យចំណាស់ម្នាក់របួសស្រាល បន្ទាប់ពីជិះម៉ូតូបញ្ច្រាសទិសបុកគ្នាពេញទំហឹង
ខេត្ដកណ្ដាល ៖ យុវជនម្នាក់ជិះម៉ូតូស្គូពីស្លៀកសារ៉ុង អត់ពាក់អាវ បើកគ្មានប្រណីលឿន បោះពួយទៅបុក ម៉ូតូ១គ្រឿងម៉ាកហុងដាឌ្រីមយ៉ាងពេញទំហឹង ខណៈដែលកំពុងបើកបរ បញ្ច្រាសទិសគ្នាបណ្ដាលឲ្យយុវជនជិះម៉ូតូស្គូពី ដួលបោកក្បាលនឹងថ្នល់បែកមុខខ្ទេច សល់ដង្ហើមចង្រិត។ ចំណែកភាគីម៉ូតូឌ្រីមរងរបួស បន្ដិចបន្ដួច ដឹកបញ្ជូនតាមរថយន្ដសាមុយទៅសង្គ្រោះនៅ មន្ទីរពេទ្យប្រត្ដិបត្ដិស្រុកខ្សាច់កណ្ដាល។ ហេតុការណ៍នេះបានកើតឡើង កាលពីវេលាម៉ោង១៩ និង១០នាទី ថ្ងៃទី២៧ ខែមេសា ឆ្នាំ២០១៥ លើកំណាត់ផ្លូវជាតិលេខ៨ ត្រង់ ចំណុចចន្លោះគីឡូម៉ែត្រលេខ៤២-៤៣ ស្ថិតក្នុងភូមិព្រៃបាំង ឃុំស៊ីធរ ស្រុក ខ្សាច់កណ្ដាល ខេត្ដកណ្ដាល ។
មន្ដ្រីនគរបាលចរាចរណ៍ស្រុកខ្សាច់កណ្ដាលបានឲ្យដឹងថា ម៉ូតូម៉ាកស្គូពី ពណ៌ស ពាក់ស្លាកលេខភ្នំពេញ 1CZ-9358 បើកបរដោយឈ្មោះ លី រតនា ភេទប្រុស អាយុ២២ឆ្នាំរបួសធ្ងន់ មានទីលំនៅក្នុងភូមិព្រៃធំ ឃុំ សន្លង់ ស្រុកខ្សាច់កណ្ដាល។ ចំណែកឯ ម៉ូតូម៉ាកហុងដាឌ្រីមសេ១២៥ ពណ៌ខ្មៅ គ្មានស្លាកលេខ បើកបរដោយឈ្មោះ ដន ថុង ភេទប្រុស អាយុ៦៦ឆ្នាំ រងរបួស ស្រាល មានទីលំនៅក្នុងភូមិអញ្ជែង ក្រោម ឃុំពុកឫស្សី ស្រុកខ្សាច់កណ្ដាល ។ បន្ទាប់ពីវាស់វែង ម៉ូតូទាំង២គ្រឿងត្រូវសមត្ថកិច្ចនគរបាល ស្រុកខ្សាច់កណ្ដាល នាំយកទៅរក្សាទុកនៅអធិការដ្ឋាននគរបាលស្រុកដើម្បីចាត់ការតាមច្បាប់ ៕ គិរី
http://ift.tt/1JOAh2p