ស្រវឹងស្រាជិះម៉ូតូក្នុងរាត្រីដូចខ្យល់ព្យុះឡើងស្ពានអាកាសស្ទឹងមានជ័យដល់ចំណុចកោងមិនបង្អង់បានបុកចិញ្ចើមស្ពានដួលបោកខ្លួនបាក់កស្លាប់ម្នាក់ និងរបួសធ្ងនម្នាក់
ភ្នំពេញ ៖ យុវជនរាត្រីស្រវឹងស្រាបានជិះម៉ូតូបោះពួយលឿនទំនងមិនខ្វល់ពីគ្រោះថ្នាក់អ្វីឡើយ តែបាន ភ្លាត់ស្នៀតទៅបុក ចិញ្ចើមស្ពានអាកាសស្ទឹងមានជ័យដួលបោកខ្លួនប្រកាច់ស្លាប់ម្នាក់ និងម្នាក់ទៀតបាន របួសធ្ងន់ ហើយក៏ត្រូវបានគេជួយសង្គ្រោះដឹកទៅកាន់មន្ទីរពេទ្យភ្លាមៗដែរ។ ហេតុការណ៍គ្រោះថ្នាក់នេះបានកើតឡើង កាលពីរាត្រីឆ្លងចូលថ្ងៃទី០១ ឧសភា វេលាម៉ោងប្រមាណ៣ និង៣០ នៅលើស្ពានអាកាសស្ទឹងមានជ័យ សង្កាត់បឹងសាឡាង ខណ្ឌទួលគោក។
មន្ត្រីប៉ូលិសចរាចរណ៍ខណ្ឌទួលគោកបានឲ្យដឹងថា៖ បុរស២នាក់ជិះម៉ូតូម៉ាកស្មាស់ពណ៌ខ្មៅមួយគ្រឿង ពាក់ស្លាកលេខភ្នំពេញ1BR 4544 ឌុបគ្នាក្នុងល្បឿនលឿនណាស់ ក្នុងទិសដៅពីកើតមកលិចតាមបណ្តយផ្លូវលេខ២៧១ ទិសពីផ្សារសុវណ្ណាមកពេទ្យលោកសង្ឃ លុះបើកបរមកដល់ចំណុចកើតហេតុទំនងជាជនរងគ្រោះស្រវឹង ស្របពេល នៅចំណុចស្ពានអាកាសនោះកោងខ្លាំងផង បណ្តាលឲ្យម៉ូតូជ្រុលទៅបុកចិញ្ចើមស្ពានយ៉ាងពេញទំហឹងតែម្តង។
ក្នុងហេតុការណ៍នេះបណ្តាលឲ្យបុរសម្នាក់ដែលជាអ្នកបើកបរម៉ូតូ បានស្លាប់ភ្លាមៗនៅកន្លែងកើតហេតុ និង ម្នាក់ទៀតបានរងរបួសធ្ងន់ ហើយបានគេជួយដឹកបញ្ជូនទៅកាន់មន្ទីរពេទ្យភ្លាមដែរ។ ប៉ុន្តែទោះបីជាយ៉ាងណាក្តីលើករណីនេះសមត្ថកិច្ចប៉ូលិស ក៏មិនទាន់ដឹងពីអត្តសញ្ញាណជនរងគ្រោះទាំង២នាក់នេះនៅឡើយទេ។ ក្រោយពេលកើតហេតុសាកសពត្រូវបាន ប៉ូលិសដឹកបញ្ជូន ទៅកាន់វត្តសំបួរមាសដើម្បីរង់ចាំបងប្អូនទៅទទួល យកទៅធ្វើបុណ្យ ៕ ដោយ គិរី
http://ift.tt/1PflTSB