ទីតាំងស្តុកឈើដុះស្លែរាប់ឆ្នាំមួយកន្លែងនៅក្រុងបានលុង របស់ជនជាតិវៀតណាមម្នាក់ត្រូវ សមត្ថកិច្ចចម្រុះបង្ក្រាបបានយ៉ាងជោគជ័យ
ខេត្តរតនគិរី៖ ទីតាំងស្តុកឈើដុះស្លែរបស់ជនជាតិវៀតណាមមួយកន្លែង ស្ថិតក្នុងភូមិថ្មដា សង្កាត់បឹងកន្សែង ក្រុងបានលុង ខេត្តរតនគិរីត្រូវបានកម្លាំងរដ្ឋបាលព្រៃឈើផ្នែកលំផាត់ សហការជាមួយកម្លាំងនគរបាលប្រឆាំងបទល្មើសសេដ្ឋកិច្ចខេត្ត ដែលដឹកនាំដោយលោក លាវ ស្រេង ព្រះរាជអាជ្ញាផ្ទាល់សាលាដំបូងខេត្ត ចុះបង្ក្រាប និងបានរឹបអូសឈើប្រភេទធ្នង់ចំនួន១១០ដុំស្មើនឹង១ម៉ែត្រគូប,៣២១ផ្លាន កាលពីវេលាម៉ោង៨ និង០០នាទីព្រឹក ថ្ងៃទី១០ ខែឧសភា ឆ្នាំ២០១៥ ហើយប្រតិបត្តិការនេះពលរដ្ឋក្នុងក្រុង បានលុងបានលាន់មាត់ថាមានប្រសិទ្ធភាព និងជោគជ័យសម្បើមណាស់។
មន្ត្រីរដ្ឋបាលព្រៃឈើចុះបង្ក្រាបបានថ្លែងថា ផ្ទះមួយកន្លែងដែលស្តុកឈើលួចលាក់ស្ថិតនៅភូមិឃុំខាងលើត្រូវបានកម្លាំងជំនាញចុះបង្ក្រាបនេះម្ចាស់ឈ្មោះ ង្វៀន វាំងបិញ ភេទប្រុស អាយុ៣៥ឆ្នាំ (ជនជាតិវៀតណាម)។ មន្ត្រីដដែលពោលដោយញញឹមញញែមបន្តទៀតថា ឈ្មួញម្នាក់នេះកន្លងមកសកម្មក្នុងការប្រម៉ែប្រមូលទិញឈើមកស្តុកទុកទាំងយប់ទាំងថ្ងៃពីឈ្មួញផ្សេងៗដែលដឹកតាមម៉ូតូ ហើយរូបគេបានដឹកជញ្ជូនចេញតាមរឺម៉ក់ពេញៗទៅលក់ និងចែកចាយតាម រោងសិប្បកម្មកែច្នៃគ្រឿងសង្ហារិមក្នុងក្រុងបានលុង រាប់ឆ្នាំមកហើយ។
ក្រោយពីកម្លាំងជំនាញបង្ក្រាបបាន ម្ចាស់ឈើ(ជនជាតិវៀតណាម) ដែលជាឈ្មួញដុះស្លែនោះ សមត្ថកិច្ចបាននាំខ្លួនទៅធ្វើការផាក់ពិន័យ និងធ្វើកិច្ចសន្យាតាមនិតិវិធីច្បាប់។ ចំណែកឈើដែលរឹបអូសបានកម្លាំងសមត្ថកិច្ចដឹកជញ្ជូនទៅរក្សាទុកនៅខណ្ឌរដ្ឋបាលព្រៃឈើនៅក្នុងថ្ងៃខែឆ្នាំដដែលនេះ។ ពាក់ព័ន្ធនឹងករណីនោះមានក្រុមអ្នកមាត់ដាចបាននិយាយតាមតៀមកាហ្វេក្នុងក្រុងបានលុងថា ឈ្មួញឈើជនជាតិវៀតណាម ឈ្មោះ ង្វៀន វាំងបិញ នេះរកប្រកបមុខរបរខុសច្បាប់នេះយូរមកហើយ ហើយក៏ជាប្រភពចំណូលប្រចាំខែរបស់មន្ត្រីខិលខូចមួយចំនួនផងដែរ តែពេលនេះគេមិនដឹង មកពីមូលហេតុអីទេទើបឆ្នាំងបាយនេះត្រូវគេវាយបំបែកចោល៕ យក្សតូច
http://ift.tt/1E29fQl
