ក្មេងប្រុស២នាក់បងប្អូនកំពុងអង្គុយជ្រកភ្លៀងក្នុងខ្ទមត្រូវរន្ទះបាញ់ស្លាប់ម្នាក់ និងរបួសធ្ងន់ម្នាក់នៅស្រុកលំផាត់
ខេត្តរតនគិរី៖ ខណៈមេឃកំពុងតែភ្លៀងធ្លាក់ខ្លាំងលាយឡំនឹងខ្យល់ កុមារា២នាក់កំពុងអង្គុយហូបចេកអាំងក្បែរគ្នាក្នុងខ្ទមចំការរបស់ខ្លួនមើលទឹកភ្លៀងស្រក់ពីលើមេឃ ស្រាប់តែត្រូវរន្ទះបាញ់ផ្តាច់យកជីវិតស្លាប់ភ្លាមៗ១នាក់ និង របួសធ្ងន់១នាក់ទាំងកណ្តាលថ្ងៃ កាលពីវេលាម៉ោង៣និង៣០នាទីនៅថ្ងៃទី២២ ខែឧសភា ឆ្នាំ២០១៥ នៅភូមិកាទឹង ឃុំឡាបាំង១ ស្រុកលំផាត់ ខេត្តរតនគិរី ឧប្បត្តិហេតុ ដ៏រន្ធត់នេះបានធ្វើឲ្យសាច់ញាតិ និងអ្នកភូមិភ័យឆោឡោឡើង។ បន្ទាប់មកក្រុមគ្រួសារក្មេងរងគ្រោះ បានរាយការណ៍ជូនដល់សមត្ថកិច្ច ។
លោក ជុំ ទូច មេប៉ុស្តិ៍នគរបាលឡាបាំង១ បានប្រាប់ឲ្យដឹងថា៖ កុមារាស្លាប់ដោយសាររន្ទះបាញ់នោះមានឈ្មោះ កក កំប្រុក ភេទប្រុស អាយុ១១ឆ្នាំ ជនជាតិគ្រឹង ជាកូនទី៤ក្នុងគ្រូសារ ត្រូវរន្ទះបាញ់ចំឆ្អឹង ជនីខាងធ្វេង(ស្លាប់) និងកុមារាម្នាក់ទៀតមានឈ្មោះ កក គា ភេទប្រុស អាយុ១៥ឆ្នាំ ជនជាតិគ្រឹង ជាបងប្រុស ត្រូវរងរបួសធ្ងន់ អ្នកទាំងពីរមានទីលំនៅភូមិឃុំខាងលើដោយក្នុងគ្រួសាររបស់គេមានជិកចំនួន៧នាក់។
លោកជុំ ទូច បន្តថា កុមារាទាំងពីរបើតាមការពិនិត្យទៅពិតជាស្លាប់ និងរងរបួសដោយសារបាតុភូតធម្មជាតិរន្ទះបាញ់ពិតប្រាកដមែន។ តាមការលើកឡើងពីប្រជាពលរដ្ឋនៅក្នុងខេត្តរតនគិរី តៗគ្នាថារន្ទះបាញ់ឆ្នាំនេះបានឆក់យកជីវិតមនុស្សអស់ជាច្រើនមកហើយក្នុងដើមឆ្នាំនេះ។ បច្ចុប្បន្នសពកុមារារងគ្រោះ សមត្ថកិច្ចបានប្រគល់ជូនក្រុមគ្រួសារដើម្បីធ្វើបុណ្យទៅតាមប្រពៃណីជនជាតិផងដែរ។ រីឯក្មេងប្រុសរងរបួសធ្ងន់កំពុងព្យាបាលនៅគេហដ្ឋានរបស់ខ្លួន៕ ដោយ លី វណ្ណៈ
http://ift.tt/1LoS3do
