លោកនគរស័ក្តិ៤ មហាជនព្រួតគ្នាវាយបែកក្បាល ដោយសារបើកឡានបុកអ្នកជិះម៉ូតូ ហើយបើករត់ទាំងម៉ូតូកៀបនៅក្រោមពោះឡាន
ខេត្តត្បូងឃ្មុំ ៖ មន្ដ្រីនគរបាលពាក់ស័ក្ដិ៤មាន តួនាទីជាអនុប្រធានការិយាល័យអត្ដសញ្ញាណប័ណ្ណ នៃស្នងការដ្ឋាននគរបាលខេត្ដត្បូងឃ្មុំ ត្រូវបានប្រជាពលរដ្ឋឡោមព័ទ្ធវាយ បណ្ដាលបែកក្បាលហូរឈាម បន្ទាប់ពីបើកឡានបុកអ្នកជិះម៉ូតូ និងកៀបម៉ូតូជាប់នៅក្រោមឡានរួចបើកអូសរត់ កាលពីវេលានាព្រឹកថ្ងៃទី៨ ខែឧសភា ឆ្នាំ២០១៥ នៅមុខ វត្ដពន្លា ស្រុកពញាក្រែក ខេត្តត្បូងឃ្មុំ។
មន្ដ្រីនគរបាលមូលដ្ឋានបានបញ្ជាក់ថា មន្ដ្រីនគរបាល ដែលពលរដ្ឋវាយដោយសារតែបើកឡានបុកគេហើយរត់ នោះមានឈ្មោះ មឿន លាងហេង បានបើករថយន្ដម៉ាកលុច្សស៊ីស ៤៧០ ពណ៌ខ្មៅ ពាក់ស្លាកលេខ ភ្នំពេញ 2A-0524 បានធ្វើ ដំណើរទៅធ្វើការនាព្រឹកថ្ងៃទី៨ ខែឧសភា ឆ្នាំ២០១៥ លុះដល់ចំណុចកើតហេតុនៅមុខ វត្ដពន្លា ស្រុកពញាក្រែក បានបុកអ្នកជិះម៉ូតូម្នាក់ តែ មិនបានឈប់រថយន្ដ ចុះដោះស្រាយជាមួយ ជនរងគ្រោះនោះឡើយ បានបើក រថយន្ដអូសម៉ូតូនៅពីក្រោមពោះឡាន រហូតដល់ក្រុងសួង ទើបកម្លាំងសមត្ថកិច្ច ឃាត់បាន ។
គ្រាន់តែឃាត់រថយន្តបានភ្លាមមហាជន ដែលខ្លះប្រដេញតាម និងខ្លះនៅក្បែរៗនោះបានស្វាគមន៍លោក ស័ក្ដិ៤ ដែលបានបើករថយន្តបុកគេហើយជិះរត់នោះបែកក្បាលហូរឈាមដោយពួកគេខឹងថាមិនអាណិតអាសូរអ្នកជិះម៉ូតូ ហើយម្យ៉ាងទៀតខ្លួនជាមន្ត្រីនគរបាលស្រាប់មានការយល់ដឹងអំពីច្បាប់ ហេតុអីមិនមានការទទួលខុសត្រូវ។ ភ្លាមនោះនគរបាលមូលដ្ឋានបានជួយអន្តរាគមន៍ និងបានហើយបានសន្យាដោះស្រាយរឿងនេះជាមួយជនរងគ្រោះដែលជាម្ចាស់ម៉ូតូ៕
http://ift.tt/1JyTpBM