គូស្នេហ៍១គូសម្ងំក្នុងបន្ទប់ផ្ទះសំណាក់វិមានជ័យ ក្រុងកំពង់ឆ្នាំងជួញដូរថ្នាំញៀនត្រូវប៉ូលិសចាប់ខ្លួន
ខេត្តកំពង់ឆ្នាំង៖ ថ្នាំញៀនម៉ាទឹកកកចំនួន១កញ្ចប់ធំ និង៦កញ្ចប់តូច ត្រូវបានសមត្ថកិច្ចនគរបាលក្រុង កំពង់ឆ្នាំង ចាប់បាន និងឆែកឆេររកឃើញលើខ្លួនបុរសម្នាក់និងស្រីស្នេហ៍ ជាភ្ញៀវមកដេកនៅក្នុងផ្ទះសំណាក់វិមានជ័យ ស្ថិតក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង។ ករណីបង្ក្រាបនេះបានធ្វើឡើងនៅម៉ោង១០និង៤៥នាទី ព្រឹកថ្ងៃទី២៩ ខែឧសភា ឆ្នាំ២០១៥ នៅពេលដែលសមត្ថកិច្ចចុះធ្វើកិច្ចការរដ្ឋបាល ត្រួតពិនិត្យ លើផ្ទះសំណាក់ ផ្ទះជួល និងសណ្ឋាគារទូទៅនៅក្នុងក្រុងកំពង់ឆ្នាំង។
លោក ម៉ា យន្ត នាយផ្នែកនគរបាលព្រហ្មទណ្ឌក្រុងកំពង់ឆ្នាំងបានអោយដឹងថា៖ ជនល្មើសទាំង២នាក់ដែលបានឃាត់ខ្លួនក្នុងរឿងនេះ ១.ឈ្មោះ ង៉ែត អាយុ២៨ឆ្នាំ ជាអ្នកជួញដូរ និងចែកចាយគ្រឿញៀន រស់នៅភូមិចក ឃុំរកាក្នុង ស្រុកតាកែវ ខេត្តតាកែវ ២.ឈ្មោះ សេង តុលា អាយុ២៦ឆ្នាំ រស់នៅខេត្តកំពង់ស្ពឺជាស្រីស្នេហ៍ និងជានារីខារ៉ាអូ ខេនៅហាង៩៨ ភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង។ វត្ថុតាងដែលសមត្ថកិច្ចដកហូត បានមានថ្នាំ ញៀនម៉ាទឹកកកចំនួន១កញ្ចប់ធំនិង៦កញ្ចប់តូច ទូរសព្ទ័ដៃ១គ្រឿង និងម៉ូតូម៉ាកស៊ីព្រុះ១គ្រឿង។
លោក ម៉ា យន្ត អោយទៀតដឹងថាពេលចូលដល់ក្នុងផ្ទះសំណាក់ដែលមានថៅកែឈ្មោះចន្ទ័ គឹមគា បានសហការ អោយសមត្ថកិច្ចត្រួតពិនិត្យ។ពេលនោះលោកបានសង្ស័យយុវជនខាងលើ ក៏បានលូកដៃចូលក្នុងហោប៉ៅ ខោ ជំហៀង របស់គេក៏យកបានថ្នាំញៀនទាំងអស់ខាងលើតែម្តង។ តាមការសាកសួរ និងស្រាវជ្រាវម្ចាស់ផ្ទះសំណាក់ អោយដឹងថា៖ គេបានមកចូលដេកក្នុងផ្ទះសំណាក់នេះតាំងពីថ្ងៃទី២៧ ខែឧសភា ឆ្នាំ២០១៥មក។
សមត្ថកិច្ចអោយដឹងថា៖ យុវជននេះគឺជាអ្នកជួញដូរថ្នាំញៀនដោយបានយកថ្នាំញៀនខាងលើ មកចែកចាយលក់ ដូរអោយម៉ូយគេរួម និងស្រីស្នេហ៍គេជានារីខារ៉ាអូខេផងដែរ។ ជនសង្ស័យទាំង២នាក់រួម និងវត្ថុតាង ត្រូវបានសមត្ថ កិច្ចនគរបាលក្រុងកំពង់ឆ្នាំង កសាងសំណុំរឿង បញ្ជូនខ្លួន និងវត្ថុតាងទៅកាន់ស្នងការដ្ឋាននគរបាលខេត្ត ដើម្បី អោយមន្ត្រី នៃការិយាល័យជំនាញកសាងសំណុំរឿងបន្ថែមតាមនិតិវិធី បញ្ជូនខ្លួនទៅតុលាកាខេត្តនៅរសៀល ថ្ងៃនេះហើយ៕ ដោយ រិទ្ធិ ជ័យ
http://ift.tt/1SGW42B
