កូនឈើព្រៃលិចទឹកចំនួន២ពាន់ដើម ត្រូវបានប្រកូកប្រកាសធ្វើពិធីដាំដុះនៅក្នុងតំបន់អភិវឌ្ឍន៍សហគមន៍អន្លង់អក
ខេត្តកំពង់ឆ្នាំង៖ កូនឈើព្រៃលិចទឹក៥ប្រភេទ ចំនួន២ពាន់ដើមត្រូវបានប្រជាពលរដ្ឋនៅក្នុងសហគមន៍ អន្លង់អក និងមន្ត្រីរាជការនាំគ្នាដាំដុះនៅក្នុងតំបន់អភិវឌ្ឍន៍សហគមន៍អន្លង់អក ស្តិតក្នុងឃុំកំពង់អុស ស្រុកជលគីរី ខេត្តកំពង់ឆ្នាំង ដើម្បីបង្កើននូវជំរកត្រីពងកូន។ ពិធីនេះបានប្រព្រឹត្តិឡើងនៅព្រឹកថ្ងៃទី២២ ខែឧសភា ឆ្នាំ២០១៥ ដោយមានការចូលរួមពីលោកអភិបាលរងខេត្ត លោកអភិបាលស្រុកជលគីរីលោកនាយ លោកនាយរងខណ្ណ័រដ្ឋបាលជល និងប្រជាពលរដ្ឋចូលរួមប្រមាណជិត៣០០នាក់។
លោក សោម ភិរុណ នាយខ័ណ្ឌរដ្ឋបាលជលផលកំពង់ឆ្នាំងបានថ្លែងថា៖ ក្រោយពីមានការកំណែទម្រង់ វិស័យជលផល ខេត្តកំពង់ឆ្នាំងបានបង្កើតសហគមន៍នេសាទបានចំនួន៦១សហគមន៍ ដែលបច្ចុប្បន្នកន្លែង អភិរក្សត្រីមេពូជមានចំនួន៤០កន្លែង និងព្រៃឈើលិចទឹកគ្រប់គ្រងដោយសហគមន៍ មាន១០កន្លែង។ ពីឆ្នាំ២០១៤រហូតមកដល់បច្ចុប្បន្ន ខណ្ឌរដ្ឋបាលជលផលកំពង់ឆ្នាំងបានដាំកូនឈើព្រៃលិចទឹកបានចំនួន ៧លើក នៅតាមបណ្តាសហគមន៍នេសាទ លើផ្ទៃដីទំហំសរុប១២ហិកតា និងប្រើប្រាស់កូនឈើប្រភេទ ព្រៃលិចទឹក ចំនួន៣ម៉ឺនដើម។នៅក្នុងទិសដៅបន្តខណ្ឌរដ្ឋបាលជលផលកំពង់ឆ្នាំង មានគម្រោងដាំព្រៃលិច ទឹកនៅក្នុងសហគមន៍នេសាទសំរិទ្ធជ័យទំហំ២ហិកតាថែមទៀត។
នៅក្នុងពិធីនេះដែរលោក អ៊ឹង ទ្រី អនុប្រធានរដ្ឋបាលេជលផលបានមានប្រសាសន៍ថា៖ បច្ចុប្បន្នប្រភពធន ធានជលផលរបស់យើងកំពុងមាននិន្នាការប្រឈមទៅនឹងការបំផ្លិចបំផ្លាញពីមួយថ្ងៃទៅមួយថ្ងៃឥតឈប់ឈរ ដែលបង្កឡើងដោយជនល្មើសនេសាទអនាធិបតេយ្យមួយចំនួន ធ្វើនេសាទដោយខុសច្បាប់ដូចជា ការប្រើ ប្រាស់ឧបករណ៍ឆក់ របាំងលូស្បៃមុង របាំងលបលូសាច់អួន បូមបាចពង្រីកបឹងបួរ ដាក់សម្រាស់ កាប់ឆ្ការ ទន្ទ្រានយកដីព្រៃលិចទឹក ឈូសឆាយដុតបំផ្លាញព្រៃលិចទឹកយកដីធ្វើជាកម្មសិទ្ធជាដើម។ ទង្វើបែបនេះ ធ្វើអោយធនធានជលផលបានថយចុះជាបន្តបន្ទាប់ស្ទើរតែ រៀងរាល់ឆ្នាំគួរអោយបារម្ភ។លោកបានសំណូមពរ ដល់ប្រជាពលរដ្ឋ អាជ្ញាធរ សមត្ថកិច្ចគ្រប់ជាន់ថ្នាក់ សហគមន៍នេសាទ រួមគ្នាបង្កា និងទប់ស្កាត់បង្ក្រាបបទល្មើសជលផលគ្រប់ប្រភេទ ដើម្បីរួមចំណែកជួយថែរក្សាការពារធនធានជលផលប្រកបដោយនិរន្តរភាព ដើម្បីធានានូវសន្តិសុខ និងសុវត្ថិភាពស្បៀង ពិសេសរួមគ្នាទប់ស្កាត់ការរំលោភបំពានយកព្រៃលិច ជួយការពារកន្លែងអភិរក្សធនធានជលផល។
ដោយឡែកលោក ចេង ញ៉ាន់ អភិបាលរងខេត្តកំពង់ឆ្នាំងក៍បានថ្លែងទៅកាន់អង្គពិធីថា៖ ក្នុងពេលនេះ យើងរួមគ្នាដាំកូនឈើព្រៃលិចទឹកនៅក្នុងដែនគ្រប់គ្រងដោយសហគមន៍នេសាទ ដែលបានបង្ហាញអោយ ឃើញ ពីសក្ខីភាពនៃកិច្ចការពារថែរក្សាគ្រប់គ្រងធនធានជលផលអោយបានស្ថិតស្ថេរគង់វង្ស និងប្រកបដោយនិរន្តរភាព រក្សាបាននូវសក្តានុពលធម្មជាតិបំពេញបន្ថែមនូវព្រៃដែលរិចរឹល ដាស់តឿនក្រើនរំលឹកដល់ស្មារតីប្រជាពលរដ្ឋ និងអ្នកនេសាទគ្រប់រូប ត្រូវបញ្ជៀសអោយបាននូវទង្វើនេសាទខុសច្បាប់ ជាពិសេសការកាប់ឆ្ការ គាស់រាន ឈូសឆាយដុតព្រៃលិចទឹកយកដីជាកម្មសិទ្ធិ និងការដាក់សម្រាស់ដែលជាប្រការខុសឆ្គងយ៉ាងធ្ងន់ធ្ងរផ្ទុយនឹងច្បាប់ស្តីពីជលផល។
លោកអភិបាលរងខេត្តបាន សំណូមពរដល់អាជ្ញាធរឃុំស្រុក និងអ្នកពាក់ព័ន្ធទាំងអស់មេត្តាចូលរួមជួយគាំទ្រ និងសុំចាត់បញ្ចូលផែនការអភិវឌ្ឍន៍៥ឆ្នាំរំកិល និងកម្មវីធីវិនិយោគ៣ឆ្នាំរំកិល ដែលផ្តល់មូលនិធិរបស់ឃុំស្រុក និងជួយគ្នាសហការណ៍ល្អជាមួយសហគមន៍នេសាទ ដើម្បីរួមចំណែកអនុវត្តយុទ្ធសាស្ត្រចតុកោណរបស់ រាជរដ្ឋាភិបាលកម្ពុជា ពិសេសការកំណែទម្រង់វិស័យជលផលអោយមានការរីកចំរើន និងគង់វង្សជានិរន្ត លើកស្ទួយជីវភាពរបស់ប្រជាពលរដ្ឋ៕ ដោយ រិទ្ធិ ជ័យ
http://ift.tt/1GwpPOF
