លោកស្នងការរង២រូបផ្លាស់ប្តូរមុខដំណែង និងបំពាក់ឋានន្តរសក្តិមន្ត្រីនគរបាលខេត្តកំពង់ឆ្នាំង២២០រូប
ខេត្តកំពង់ឆ្នាំង៖ លោក សៀក គឹមលៀង អភិបាលរងខេត្តកំពង់ឆ្នាំង មានប្រសាសន៍ថា៖ «ការងារដែលខិតខំ ធ្វើបានល្អហើយ មិនមែនយើងបញ្ឈប់ត្រឹម ហ្នឹង ឬធ្វើតែប៉ុណ្ណឹងនោះទេ យើងត្រូវខិតខំបន្ថែមទៀត ទាំងការបង្ក្រាបបទល្មើស ព្រហ្មទ័ណ្ឌ សេដ្ឋកិច្ច គ្រឿងញៀននិងចរាចរណ៍ជាដើម » លោកលើឡើងបែបនេះនៅក្នុងពីធីប្រកាស ផ្ទេរភារកិច្ច និងបំពាក់ឋាន្តរសក្តិ ដល់មន្ត្រីនគរបាលជាតិចំនួន២២០ រូប នៅស្នងការដ្ឋានខេត្តកំពង់ឆ្នាំង កាលពីព្រឹកថ្ងៃទី ១១ ខែឧសភា ឆ្នាំ២០១៥ ដោយមានការអញ្ជើញចូលរូមពីលោកស្នងការ លោកស្នងការរងនិងមន្ត្រីនគរបាលជាច្រើនរូបទៀត ។
លោក សៀក គឹមលៀង អភិបាលរងខេត្តបានបន្តថា៖ កន្លងមកមន្ត្រីនគរបាលខេត្ត ស្រុក និងក្រុង បានខិតខំប្រឹងប្រែងបំពេញភារកិច្ចបានយ៉ាងល្អប្រសើរ រហូតខេត្តខ្លះយកធ្វើជាគំរូទៀតផង ពិសេសគឺការសម្រួលចរាចរណ៏អោយសិស្សចេញនិងចូលទៅតាមសាលារៀន ។ ការប្រឹងប្រែងទាំងនេះ បានធ្វើអោយបទល្មើសបានថយចុះ ជាបន្តបន្ទាប់ ប៉ុន្តែទោះយ៉ាងនេះក្តី លោកសុំអោយមន្ត្រីនគរបាលទាំងអស់ត្រូវខិតខំបន្ថែមទៀត ពិសេសមន្ត្រីដែលទើបបានតម្លើងសក្តិថ្មី ។ ត្រូវផ្សព្វផ្សាយច្បាប់ចរាចរណ៍ថ្មី ក្នុងនោះត្រូវកោះហៅម្ចាស់គោយន្ត មកបំពាក់ចំណាំងផ្លាត ដើម្បីជាសវាងគ្រោះថ្នាក់ចរាចរណ៍ នៅពេលយប់ ដែលកើតពីការមើលមិនឃើញ និងសុំមើលរថយន្តដឹកដីដែលមិនគ្របធ្លាក់ដីពេញថ្នល់កៅស៊ូ ដែលម្ចាស់ជំនួយមិនទាន់ធ្វើពិធីប្រគល់ជាផ្លូវការនៅឡើយ និងពិសេសសូមអោយមន្ត្រីនគរបាលបន្តអនុវត្តនូវគោនយោបាយភូមិឃុំមានសុវត្ថិភាពអោយបានកាន់តែល្អថែមទៀត ។
លោក ឧត្តមសេនីយត្រី ប្រាក់ វុឌ្ឍី ស្នងការនគរបាលខេត្តកំពង់ឆ្នាំង បានអានរបាយការសង្ខេប ថា៖ ក្នុងឆមាសទី១ ឆ្នាំ២០១៤ បទល្មើសព្រហ្មទ័ណ្ឌបានកើតឡើង ២៦ករណី គ្រោះថ្នាក់ចរចរណ៍បាន កើតឡើង៨១លើក បង្កអោយមនុស្សស្លាប់៥១នាក់ រងរបួស ១៤៣នាក់ (របួសធ្ងន់៧៤នាក់) ខូចខាត រថយន្ត៣៣គ្រឿង ម៉ូតូ៧៣គ្រឿង និងកាណូត១១គ្រឿង ។ ឆេះផ្ទះ១២ខ្នង និងតូប៨ , ឆក់ខ្យែភ្លើង ៣ លើក បណ្តាលអោយមនុស្សស្លាប់២នាក់របួសម្នាក់ ធ្វើអត្តឃាត១២លើកស្លាប់មនុស្ស១២នាក់ បាក់ដី សង្កត់១លើកស្លាប់មនុស្ស២នាក់ និងលង់ទឹក១២លើក ស្លាប់មនុស្ស១២នាក់ ។ បង្ក្រាបបទល្មើស ព្រហ្មទ័ណ្ឌ ២៣ ករណីឃាត់ខ្លួននុស្ស៣៩នាក់ បង្ក្រាបបទល្មើស សេដ្ឋកិច្ច ១៨ករណី បទល្មើជួញដូរមនុស្ស២ករណី និងបង្ក្រាបបទល្មើស ថ្នាំញៀន ២៦ករណី ឃាត់ខ្លួនមនុស្ស៥៦នាក់ ។
នៅក្នុងពីធីនេះដែរអគ្គស្នងការនគរបាលជាតិបានសម្រេចផ្លាស់ប្តូរលោកស្នងការរងពីររូប ទៅកាន់ការិយាល័យ កណ្តាលអគ្គីភ័យ អាវុធជាតិផ្ទុះ និងការិយាល័យកណ្តាលបង្ក្រាបបទល្មើស ចំណែកមន្ត្រីនគរបាល ដែលមានស្នាដៃត្រូវបានដំឡើងឋានៈមានចំនួន២២០រូប គឺ៖ ថ្នាក់អនុសេនីយឯក ៣៩រូបថ្នាក់ អនុសេនីយ៏ទោ ៤២រូប ថ្នាក់អនុសេនីយត្រី៣០រូប ថ្នាក់ព្រិន្ទបាលឯក ៥៦រូប និងថ្នាក់ព្រិន្ទបាលទោ ៥៣រូបផងដែរ៕ ដោយ រិទ្ធិ ជ័យ
http://ift.tt/1F2vjyi