រថយន្តក្រុងបុករថយន្ត VIP បើកដល់ផ្លូវកោងឡើងជែងរថយន្តនៅពីមុខ ជ្រុលទៅបុករថយន្តហាឡេនឌ័រខ្ទាតធ្លាក់ផ្លូវ ស្រីជាម្តាយស្លាប់ធ្លាយខួរ កូនស្រីប្រុស៣នាក់រងរបួសធ្ងន់ធ្ងរ
ខេតត្តកំពង់ឆ្នាំង៖ ស្ត្រីម្នាក់បានស្លាប់ និងកូនចៅ៣នាក់ទៀតរងរបួសធ្ងន់ស្រាល នៅក្នុងហេតុការណ៍គ្រោះថ្នាក់ចរាចរណ៍មួយ ដោយរថយន្តក្រុង VIP បុករថយន្តហាយឡេនឌ័រ ពេញទំហឹងធ្លាក់ពីលើផ្លូវជាតិក្នុងទិសដៅបញ្ច្រាសគ្នា។ ហេតុការណ៍នេះបានកើតឡើងលើផ្លូវជាតិលេខ៥ នៅវេលាម៉ោង១១ និង៣០នាទី ថ្ងៃទី០៣ ខែឧសភា ឆ្នាំ២០១៥ នៅចំណុចផ្លូវបត់កោង ចន្លោះគីឡូម៉ែត្រលេខ១៣១ និង១៣២ ស្ថិតក្នុងភូមិត្រពាំងចាន់ ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង។
សមត្ថកិច្ចនគរបាលចរាចរណ៍ស្រុកបរិបូណ៌បានបញ្ជាក់អោយដឹងថា៖ ស្ត្រីរងគ្រោះ ដែលបានស្លាប់នៅក្នុងហេតុការណ៍នោះមានឈ្មោះ អោ សួង អាយុ៦៩ឆ្នាំ, ដោយឡែកអ្នក រងរបួសធ្ងន់មានឈ្មោះ ម៉ុម ណោ ភេទស្រី អាយុ៣២ឆ្នាំ បានរងរបួសធ្ងន់ធ្ងរគាត់ជាកូនស្ត្រីបានស្លាប់ និងជាអ្នកបើកបររថយន្តហាយឡេនឌ័រ, ឈ្មោះ ម៉ុម ស៊ីវ័ន ភេទស្រី អាយុ៤៧ឆ្នាំ រងរបួសធ្ងន់ និងកុមារា អ៊ឹង ជីហ៊ា អាយុ១១ឆ្នាំ រងរបួសស្រាល ពួកគេរស់នៅក្នុង ភូមិថ្មគោល ឃុំតាម៉ឺន ក្រុងបាត់ដំបង ខេត្តបាត់ដំបង។
សមត្ថកិច្ចបានអោយដឹងទៀតថា៖ មុនពេលកើតហេតុគេឃើញរថយន្តម៉ាកហាយឡេនឌ័រ ពណ៌ស្ករ ពាក់ផ្លាកលេខ ភ្នំពេញ2U-7974 បើកបរដោយស្ត្រី ម៉ុម ណោ ក្នុងទិសដៅពីជើងទៅត្បូង លុះមកដល់ចំណុចកើតហេតុក៏មានរថយន្តក្រុងVIP ពណ៌ស ពាក់ស្លាកលេខភ្នំពេញ3A-8038 មួយគ្រឿង បើកបរក្នុងទិសដៅច្រាស់គ្នាក្នុងល្បឿនដ៏លឿន ដល់ចំណុចផ្លូវបត់កោងក៍បានឡើងជែង រថយន្តមួយគ្រឿងទៀត ហើយក៍បានរេចង្កូតមកបុករថយន្តហាយឡេនឌ័រពេញទំហឹងធ្លាក់ពីលើផ្លូវជាតិ បណ្តាលអោយអ្នកជិះនៅក្នុងរថយន្តហាយឡេនឌ័រ ស្ត្រីម្នាក់បានស្លាប់ ដោយបែកលលាដ៍ក្បាលធ្លាយខួរពេញរថយន្ត និងកូនចៅ៣នាក់ទៀតរបួសដេកក្នុងរថយន្តរដូករណែលតែម្តង។
ក្រោយពេលកើតហេតុ ក្រុមគ្រួសារជនរងគ្រោះ បានដឹកបញ្ជូនជនរងគ្រោះទាំងអស់ទៅសង្គ្រោះព្យាបាលនៅមន្ទីរពេទ្យខេត្តបាត់ដំបង ចំណែកសពស្ត្រីរងគ្រោះស្លាប់បានដឹកទៅ ធ្វើបុណ្យតាមប្រពៃណីនៅឯលំនៅដ្ឋាន។ ដោយឡែកអ្នកបើកបររថយន្តក្រុង ក្រោយពេលបង្កហេតុបានរត់គេចខ្លួនបាត់ស្រមោល ទុករថយន្តចោលនីកន្លែងកើតហេតុ។ រថយន្តហាយឡេនឌ័របានខូចខាតធ្ងន់ និងបែក កង់អស់៣គ្រាប់ ឯរថយន្តក្រុងខូតខាតមធ្យម។ រថយន្តទាំង២គ្រឿង ត្រូវបានសមត្ថកិច្ច នគរបាលចរាចរណ៍ខេត្តកំពង់ឆ្នាំងអូស និងស្ទួចយកមករក្សាទុកនៅស្នងការដ្ឋាននគរ បាលខេត្តកំពង់ឆ្នាំង ដើម្បីកសាងសំណុំរឿងតាមនិតិវិធីបញ្ជូនទៅតុលាការខេត្ត ចាត់ការបន្តតាមផ្លូវច្បាប់៕ ដោយ រិទ្ធិ ជ័យ
http://ift.tt/1F1Jy9G