ស្ត្រីម្នាក់ស្រវឹងស្រា ស្រេកទឹកពេកទាញយកថ្នាំបាញ់ស្មៅយកមកផឹកច្រឡំស្មានតែទឹកបានស្លាប់លាចាកលោក
ខេត្តរតនគិរី៖ ស្ត្រីម្នាក់បន្ទាប់ពីស្រវឹងស្រា ស្រេកទឹកពេក បានទាញយកថ្នាំបាញ់ស្មៅយកមកផឹកច្រឡំស្មានតែទឹក ត្រូវបានក្រុមគ្រួសារម្នីម្នាបញ្ជូនទៅសង្គ្រោះនៅមន្ទីរពេទ្យខេត្ត ខណៈដល់ពាក់កណ្តាលផ្លូវក៏ដាច់ខ្យល់ស្លាប់តែម្តងគូរឲ្យសង្វេគ។ ករណីនេះកើតឡើងកាលពីវេលាម៉ោង៧ និង៣០នាទីយប់ ថ្ងៃទី១ ខែមិថុនា ឆ្នាំ២០១៥ ស្ថិតនៅភូមិ៣ ឃុំត្រពាំងក្រហម ស្រុកកូនមុំ ខេត្តរតនគិរី។
លោករេន ម៉ុត អធិការរងទទួលផ្នែកយុត្តិធម៌បានបញ្ជាក់ថា៖ ស្ត្រីរងគ្រោះនោះមានឈ្មោះ ជា រដ្ឋា អាយុ៤០ឆ្នាំ ជនជាតិខ្មែរ មុខរបរធ្វើចំការ មានទីលំនៅភូមិ៣ ឃុំត្រពាំងក្រហម ស្រុកកូនមុំ ខេត្តរតនគិរី បានផឹកស្រាស្រវឹងកាលពីថ្ងៃ។ លុះដល់យប់ក៏បានទៅយកដប់ថ្នាំបាញ់ស្មៅមកផឹកស្មានតែទឹកក៏ពុលបែបពពុះមាត់។ ក្រុមគ្រួសារក៏បានដឹកទៅសង្គ្រោះនៅមន្ទីរពេទ្យបង្អែកស្រុកកូនមុំ លុះស្ត្រីរងគ្រោះមានអាការៈធ្ងន់ធ្ងរពេក លោកគ្រូពេទ្យក៏អោយក្រុមគ្រួសារដឹកសង្គ្រោះនៅមន្ទីរពេទ្យបង្អែកខេត្ត តែអកុសលស្ត្រីរងគ្រោះក៏ដាច់ខ្យល់ស្លាប់នៅពាក់កណ្តាលផ្លូវបាត់ទៅហើយ។
បើតាមការបញ្ជាក់ពីក្រុមគ្រួសារស្ត្រីរងគ្រោះបានឲ្យដឹងថា៖ ស្ត្រីរងគ្រោះនេះគឺជាមនុស្សវិកលចរិកនៅពេលថ្ងៃសីលម្តងៗ។ បច្ចុប្បន្នសពស្ត្រីរងគ្រោះសមត្ថកិច្ចក៏ប្រគល់ឲ្យទៅក្រុមគ្រួសារធ្វើបុណ្យតាមប្រពៃណី៕ លី វណ្ណៈ
http://ift.tt/1dLS410
