យុវជន២នាក់ លាក់ទុកថ្នាំញៀនប្រភេទម៉ាទឹកកក ៣កញ្ចប់ក្នុងហោប៉ៅខោ ត្រូវប៉ូលិសចាប់ខ្លួន
ខេត្តកំពង់ឆ្នាំង៖ ជនសង្ស័យ២នាក់ និងថ្នាំញៀនចំនួន៣កញ្ចប់ ត្រូវបានកម្លាំងសមត្ថកិច្ច នគរបាល ស្រុកកំ ពង់ត្រឡាច ធ្វើការចាប់ខ្លួនបាននៅម៉ោង ៣និង៣០នាទីរសៀលថ្ងៃទី៣១ ខែឧសភា ឆ្នាំ២០១៥ នៅលើផ្លូវជាតិលេខ៥ ស្ថិតក្នុងភូមិព្រៃពីស ឃុំឈូកស ស្រុកកំពង់ត្រឡាច ខណៈដែលកម្លាំងសមត្ថកិច្ច កំពុងដើរល្បាត ជួបនិងជនសង្ស័យ និងបានធ្វើការឆែកឆេររកឃើញ ។
លោក ហ៊ុល វាសនា អធិការនគរបាលស្រុកកំពង់ត្រឡាចបានអោយដឹងថា៖ មុនពេលឃាត់ខ្លួន សមត្ថកិច្ច នគរបាលលោកបានចេញល្បាតតាមថ្នល់ជាតិ តាមការកំណត់ទិសដៅដោយឡែកៗពីគ្នា ក្នុងនោះដែរសមត្ថកិច្ចមួយក្រុមដែលកំពុងល្បាតដល់ចំណុចភូមិព្រៃពីស ក៏បានជួបមុខសញ្ញាគួរសង្ស័យចំនួន២នាក់ ហើយក៏បានធ្វើការឆែកឆេរ និងបានរកឃើញថ្នាំញៀនប្រភេទម៉ាទឹកកកចំនួន៣កញ្ចប់ ដែលជនសង្ស័យខាងលើបានលាក់ទុកក្នុងការបូបនៅក្នុងហោប៉ៅខោ ទើបឈានដល់ការឃាត់ខ្លួនជនសង្ស័យទាំង២នាក់តែម្តង។ ជនសង្ស័យទី១ឈ្មោះ គ្រីម ម៉ាត់ អាយុ២៤ ឆ្នាំ មានទីលំនៅ ភូមិទួល និងទី២ឈ្មោះ សេន ការីម អាយុ២៥ ឆ្នាំ មានទីលំនៅភូមិព្រៃពីស ទាំង២នាក់នៅក្នុង ឃុំឈូក សស្រុកកំពង់ត្រឡាចជាមួយគ្នា ។
លោក អធិការបានអោយដឹងទៀតថា៖ ចំពោះមុខសមត្ថកិច្ច ជនសង្ស័យខាងលើឆ្លើយសារភាពថា៖ បានទិញពីអ្នកលក់ម្នាក់ នៅឃុំសែប ស្រុកកំពង់ត្រឡាច ដែលពេលនេះលោកកំពុងស្រាវជ្រាវរកអ្នកលក់ ថ្នាំញៀនទាំងនោះយកមកផ្តន្ទា ទោសតាមច្បាប់។ ចំណែកជនសង្ស័យទាំង២នាក់រួមជាមួយទូរស័ព្ទ ដៃ២គ្រឿង ម៉ូតូ១គ្រឿង និងថ្នាំញៀន៣កញ្ចប់ ដែលជាវត្ថុតាងត្រូវបានសមត្ថកិច្ច កសាងសំណុំរឿង បញ្ជូនខ្លួនមកស្នងការដ្ឋាននគរបាលខេត្តដើម្បីចាត់ការបន្ត និងបញ្ជូនទៅតុលាការខេត្ត ធ្វើការផ្តន្ទា ទោស តាមបញ្ញត្តិច្បាប់៕ ដោយ រិទ្ធិ ជ័យ
http://ift.tt/1KDyTjY
