ព្រៃលិចទឹកនៅតំបន់ស្ពានឆេះ កំពុងរងការទន្ទ្រានចាក់ដីបំផ្លាញចោល សមត្ថកិច្ចពាក់ព័ន្ធឆ្លើយមិនដឹង ហើយរុញដាក់គ្នា
ខេត្តព្រះសីហនុ៖ ព្រៃលិចទឹកប្រមាណជាង៥ហិចតា (ប្រភេទដើមក្រញឹប) កំពុងប្រឈមទៅ នឹងការបាត់បង់នៅក្នុងពេលដ៏ឆាប់ខាងមុខ ខណៈពេលឈ្មួញ និងអាជ្ញាធរ និងសមត្ថកិច្ចពាក់ព័ន្ធផ្សំគំនិតឃុបឃិតរួមដៃគ្នាបំផ្លាញព្រៃលិចទឹកធម្មជាតិដែលប្រព្រឹត្តផ្ទាល់ពីអនិកជនមកពីប្រទេសបារាំងដោយមិនខ្លាចក្រែងញញើតអ្វីទាំងអស់ ហើយកំពុងសំរុកចាក់ដីលប់បែបអនាធីបតេយ្យតាមទំនើងចិត្តដោយសារតែមានការបើកដៃពីមន្ត្រីខិលខូច។
តាមរយៈទង្វើបំផ្លាញព្រៃធម្មជាតិដែលជាជម្រកមច្ឆាសមុទ្រគ្រប់ប្រភេទយ៉ាងកម្រោងបួនជ្រុងនោះ ក៏បានទាក់ទាញអោយផ្ទុះការរិះគន់យ៉ាងខ្លាំងពីប្រជាពលរដ្ឋទៅលើអាជ្ញាធរដែនដី ដែលមើលទៅហាក់មានការឃុបឃិតជាប្រព័ន្ធដែលម្នាក់ៗអាចត្រូវឈ្មួញជះលុយដុល្លារដាក់គ្របបាំងមុខ និងសតិលែងដឹងខុសត្រូវអស់ទៅហើយ ទើបខណៈនេះធ្វើជាពុំដឹងពុំឮអ្វីទាំងអស់បានបណ្តោយអោយឈ្មួញបំផ្លាញព្រៃលិចទឹក ចាក់ដីលប់ដើមកោងកាង ដើមក្រញឹបរាប់រយពាន់ដើមអស់ទៅហើយ តែបែរជាពុំមានចំណាត់ការណាមួយទាល់តែសោះ។ ផ្ទុយទៅវិញបើប្រជាពលរដ្ឋទន់ខ្សោយមួយចំនួនគ្មានដុល្លារ កាប់កូនឈើតូចៗតែពីរទៅ៣ដើមត្រូវជាប់គុក រាប់ខែ រាប់ឆ្នាំ ឯអ្នកបំផ្លាញរាប់សឹបហិចតាឃើញនឹងភ្នែកស្តែងៗបែរជារួចខ្លួនទៅវិញ។ អស្ចារ្យហើយអស់លោក?។
ជុំវិញការបំផ្លាញព្រៃលិចទឹកក្នុងតំបន់ស្ពានឆេះ ក្បែរឆ្នេរត្រេះ ស្ថិតក្នុងភូមិ៦ សង្កាត់លេខ០៤នេះ ប្រជាពលរដ្ឋជាច្រើនក្នុងតំបន់នោះបានសំដែងការសោកស្តាយ យ៉ាងខ្លាំង ព្រោះ សំរាប់ក្រុងព្រះសីហនុទាំងមូល ប្រភេទព្រៃលិចទឹកនេះស្ទើរតែវិនាសអស់ទៅហើយនៅសល់ភាកច្រើនតែតំបន់ស្ពានឆេះនេះទេ ដែលព្រៃលិចទឹកទាំងមូលមានផ្ទៃក្រឡាប្រមាណជិតដប់ហិចតា ហើយជារៀងរាល់ថ្ងៃនៅពេលដែលពួកគាត់មានការខ្វះខាតម្ហូបអាហារគឺ ពួកគាត់តែងតែចូលក្នុងព្រៃនោះ រកក្តាម បង្ការ ត្រី យកមកធ្វើអាហារ និងពេលខ្លះអាចសល់យកទៅលក់លើទីផ្សារបានប្រាក់មកដោះស្រាយជីវភាពបានមួយគ្រា។ ប៉ុន្តែពេលនេះព្រៃលិចទឹកទាំងនោះកំពុងត្រូវបានគេចាក់ដីលប់បានប្រមាណ៣០%ទៅហើយតើពួកគាត់សង្ឃឹមអ្វីទៀត។
លោក នេន ចំរើន នាយខ័ណ្ឌរដ្ឋបាលជលផលបានអោយដឹងយ៉ាងខ្លីថា ព្រៃលិចទឹកទាំងនោះមិនស្ថិតក្នុងការគ្រប់គ្រងរបស់លោកទេ ព្រោះដីនោះមានប្លង់កម្មសិទ្ឋ។ សំរាប់លោក លី វណ្ណដា អភិបាលរងក្រុងព្រះ បានបញ្ជាក់ថា ចំពោះទីតាំងចាក់ដីលប់ព្រៃនោះ ពុំមានអ្វីទាំងអស់ ម្ចាស់ដីគេពុំបានស្នើសុំអ្វីមកក្រុងទេ មានតែថ្នាក់ខេត្តទេដែលអាចដឹងរឿងនេះ។ ដោយឡែកលោក អ៊ី ធារិន ប្រធានស្តីទី ការិយាល័យអន្តរវិស័យនៃសាលាខេត្តព្រះសីហនុ ក៏បានបញ្ជាក់ស្រដៀងគ្នាទៅនឹងលោក លី វណ្ណដា ដែរ ដោយលោកឆ្លើយបែបខ្លីថា ចំពោះការចាក់ដីនេះ លោកពុំទាន់ទទួលបានព័ត៌មានអ្វីនោះទេ លោកជាប់ប្រជុំមិនអាចឆ្លើយបានទេ៕ សមុទ្រខៀវ
http://ift.tt/1EZh1el
