ស្ត្រីចំណាស់ម្នាក់ជិះកង់ដឹកផ្លែព្រីងយកទៅលក់ ត្រូវរថយន្តបុកពីក្រោយពេញទំហឹងប៉ើង១០ម៉ែត្ររបួសធ្ងន់
ខេត្តកំពង់ឆ្នាំង៖ ស្ត្រីវ័យចុំណាស់ម្នាក់បានរងរបួសធ្ងន់ ខណៈគាត់កំពុងជិះកង់ដឹកផ្លែព្រីងទៅលក់នៅពេលទៀបភ្លឺ ត្រូវបានរថយន្តមួយគ្រឿងបុកចំក្រោយពេញទំហឹងប៉ើងជាង១០ម៉ែត្រដួលត្រឡប់ត្រឡិនកាលពីវេលាម៉ោង៥ និង០៥នាទី ចន្លោះគីឡូម៉ែត្រលេខ៩៦ និង៩៧ លើបណ្តោយផ្លូវជាតិលេខ៥ ចំណុចភូមិត្រពាំងពោធិ ឃុំពង្រ ស្រុករលាប្អៀរ ខេត្តកំពង់ឆ្នាំង។
សមត្ថកិច្ចនគរបាលមូលដ្ឋាននៅកន្លែងកើតហេតុបានអោយដឹងថា៖ ស្ត្រីរងគ្រោះមានឈ្មោះ ប្រាក់ លឿន អាយុ៥២ឆ្នាំ ជាកសិករ រស់នៅភូមិស្រាំងខ្ពស់ ឃុំពង្រ ស្រុករលាប្អៀរ ខេត្តកំពង់ឆ្នាំង។ មុនពេលកើតហេតុ គាត់បានជិះកង់ដឹកផ្លែព្រីងមួយកញ្ជើរតូចយកមកលក់នៅផ្សារកំពង់ឆ្នាំង លុះមកដល់ចំណុចកើតហេតុ ស្រាប់តែមានរថយន្តមួយគ្រឿងមិនស្គាល់ម៉ាក បានបុកចំពីក្រោយពេញទំហឹង បណ្តាលអោយរូបគាត់ដួលត្រឡប់ត្រឡិនប៉ើងចម្ងាយប្រមាណជាង១០ម៉ែត្រសន្លប់ រងរបួសយ៉ាងធ្ងន់ធ្ងរ។
ក្រោយពេលកើតហេតុជិត១ម៉ោង ទើបឃើញរថយន្តសង្គ្រោះទៅដឹកជនរងគ្រោះ បញ្ជូនមកកាន់មន្ទីរពេទ្យខេត្តកំពង់ឆ្នាំង ដើម្បីសង្គ្រោះព្យាបាលល។ នៅក្នុងបន្ទប់លាងរបួសនៃមន្ទីរពេទ្យខេត្តកំពង់ឆ្នាំង គេឃើញលោកគ្រូ អ្នកគ្រូពេទ្យកំពុងលាង និងដេររបួសជាច្រើនថ្នេរចំនួន៤កន្លែងអោយជនរងគ្រោះដែលសន្លប់មិនដឹងខ្លួនរហូតមកគឺ៖ រងរបួសធ្ងន់នៅលើថ្ងាស លើចង្កា លើថ្ពាល់ស្តាំយ៉ាងជ្រៅ និងរបួសដើមដៃខាងស្តាំ។
ករណីគ្រោះថ្នាក់ខាងលើនេះ ត្រូវបានសមត្ថកិច្ចសន្និដ្ឋានថា៖ ទំនងរថយន្តបង្កបើកបរងោកងុយ ឬចាំងភ្លើងហ្វារថយន្តមកពីមុខ ទើបបង្ក គ្រោះ ថ្នាក់ដល់ស្ត្រីរងគ្រោះខាងលើ ក្រោយពេលកើតហេតុរថយន្តបង្កបាន បើកគេចខ្លួនបាត់។ ដើម្បីទប់ស្កាត់គ្រោះថ្នាក់ដូចខាងលើនេះ ប្រជាពលរដ្ឋដែលប្រើប្រាស់យាន្តយន្ត ឬកង់ម៉ូតូ គួរតែចាប់ចំណាំងផ្លាតនៅកន្ទុយខាងក្រោយ ដើម្បីអោយអ្នកបើកពីក្រោយអាចមើលឃើញ ទើបអាចជៀសវាងពីគ្រោះថ្នាក់ជាយថាហេតុបាន។ ម្យ៉ាងទៀតបើសិនមិនពាក់ចំណាំងផ្លាតនៅពេលយប់ ពេលមានគ្រោះថ្នាក់ គឺយើងដែលមានកង់ម៉ូតូឬយាន្តយន្តដែលគ្មានចំណាំងផ្លាតបំពាក់ពីក្រោយនោះគឺជាអ្នកទទួលខុសត្រូវចំពោះមុខច្បាប់៕ ដោយ រិទ្ធិ ជ័យ
http://ift.tt/1IrDtBU
