រថយន្តតូរីសដឹកឈើប្រណីតលោតឆ័ត្រ ត្រូវនគរបាលស្រុកកូនមុំស្ទាក់ចាប់ចំណែកម្ចាស់លោតរត់ចោលឡាន
ខេត្តរតនគិរី៖ រថយន្តម៉ាកតូរីសមួយគ្រឿង ដឹកឈើប្រណីតប្រភេទនាងនួនលោតឆ័ត្រ ត្រូវបានកម្លាំងសមត្ថកិច្ចចម្រុះចុះឆែកឆេរអាវុធ ជាតិផ្ទុះប្រចាំស្រុកកូនមុំស្ទាក់ និងបង្ក្រាបបាន ហើយប្រគល់ឲ្យជំនាញខណ្ឌរដ្ឋបាលព្រៃឈើខេត្តរតនគិរី។ កិច្ចប្រតិបត្តិការបង្ក្រាបនេះបានប្រព្រឹត្តទៅ កាលពីវេលា ម៉ោង៧និង២០នាទីនាយប់ថ្ងៃទី០១ ខែមិថុនា ឆ្នាំ២០១៥ នៅត្រង់ចំណុចផ្លូវបំបែកជាបី (អូរចេង) ស្ថិតក្នុង ភូមិតាអងកាតែ ឃុំតាអង ស្រុកកូនមុំ ខេត្តរតនគិរី។
លោកអនុសេនីយ៍ឯក រ៉េន មុត អធិការរងទទួលបន្ទុកផ្នែកយុត្តិធម៌បានអោយដឹងថា រថយន្តម៉ាកតូរីស ពណ៌លឿង ពាក់ស្លាកលេខ ភ្នំពេញ 2J-9243 ផ្ទុកបទល្មើសឈើប្រណីត ប្រភេទឈើនាងនួន ដែលមានមុខកាត់១០x១០ ចំនួន០៩ដុំ ប្រវែង១ម៉ែត្រ ឈើសន្លឹកចំនួន៤សន្លឹក ស្មើ២០គីឡូក្រាម និងតុកំណាឈើមូលចំនួន១សន្លឹក ស្មើរនឹង២០គីឡូក្រាមដែរ ដែលឈ្មួញដឹកជញ្ជូនចេញពីកោះញ៉ែក ខេត្តមណ្ឌលគិរី ឆ្ពោះមកកាន់ខេត្តរតនគិរី តាមផ្លូវជាតិលេខ៧៦ ដោយគ្មានមន្ត្រីជំនាញពាក់ព័ន្ធណាម្នាក់បង្ក្រាបឡើយ។ លុះមកដល់ចំណុចផ្លូវបំបែកអូរចេង ត្រូវបានកម្លាំងចម្រុះធ្វើការស្ទាក់បានដោយជោគជ័យ។ ខណៈនោះឈ្មួញក៏បានចុះចេញពីរថយន្តរត់គេចខ្លួនបាត់ស្រមោលបន្សល់ទុករថយន្ត និងវត្ថុតាងនៅកន្លែងកើតហេតុ។
បច្ចុប្បន្នវត្ថុតាង និងរថយន្តត្រូវបានសមត្ថកិច្ចនគរបាលស្រុកកូនមុំធ្វើកំណត់ហេតុប្រគល់ទៅឲ្យខណ្ឌរដ្ឋបាលព្រៃឈើខេត្ត ដើម្បីចាត់ការបន្ត៕ លី វណ្ណៈ
http://ift.tt/1H2YMuK
