អ្នកអាចនឹងហួសចិត្ត ពេលដឹងការងារដែល រ៉ាំបូធ្វើមុនល្បីជាអ្វី
តារាសម្ដែងហូលីវូដលំដាប់ A លោក Sylvester Stallone ដែលគ្រប់គ្នាស្គាល់ថា រ៉ាំបូ មានប្រវត្តិតស៊ូមិនធម្មតាទេ មុនល្បីឈ្មោះដល់ចំណុចកំពូលដូចសព្វថ្ងៃ។ តារាសម្ដែងឈុតវាយតប់ដ៏មានប្រជាប្រិយមានកុមារភាពដ៏ជូរចត់។ លោកត្រូវរស់នៅក្នុងគ្រួសារដែលឪពុកម្ដាយឧស្សាហ៍ទាស់ទែងគ្នា និងចុងក្រោយឈានដល់ការលែងលះ។
ក្រោយបញ្ចប់ថ្នាក់វិទ្យាល័យ តារាសាច់ដុំបានបន្តចូលមហាវិទ្យាល័យភ្លាមៗ។ ពេលនោះគាត់បានទៅសិក្សានៅមហាវិទ្យាល័យអាមេរិកក្នុងប្រទេសស្វីសដោយសិក្សាជំនាញភាពយន្ត។ បន្ទាប់មកទៀត តារាសម្បូរបទពិសោធន៍រូបនេះបន្តចូលសាកលវិទ្យាល័យ Miami សិក្សាជំនាញសិល្បៈភាពយន្ត។ តែ Stallone បានបោះបង់សញ្ញាប័ត្ររបស់ខ្លួនកណ្តាលទីផ្លាស់ទៅរស់នៅទីក្រុងញីវយ៉កដើម្បីស្វែងរកអាជីពជាតារាសម្ដែងតាមក្ដីស្រមៃរបស់ខ្លួន។ មុននឹងអាជីពសម្ដែងចេញជាផ្លែផ្កា គាត់ត្រូវធ្វើការងារគ្រប់ប្រភេទដើម្បីសម្រួលជីវភាពរស់នៅប្រចាំថ្ងៃ។ គាត់ធ្លាប់ធ្វើជាអ្នកលាងសម្អាតទ្រុងតោនៅសួនសត្វ Central Park អ្នកនាំភ្ញៀវចូលកន្លែងនៅរោងកុន និងធ្លាប់សម្ដែងកុនអាសអាភាសដែលមានចំណងជើងថា ”A Party at Kitty and Studs” ក្នុងឆ្នាំ ១៩៧០ ទៀតផង៕
អាន៖ អ្នកនិពន្ធចម្រៀងក្នុងរឿងកប៉ាល់ Titanic ស្លាប់ក្នុងហេតុការណ៍ធ្លាក់យន្តហោះ
ប្រែសម្រួល៖ សីហា
ប្រភព៖ wonderslist
