អ្នកស្រី ឌីសាវ៉េត អួលដើមកពេលដឹងថាអង្គការតា ហ៊្វុយសូ ជិតដាច់ពោះ
សិល្បៈករជើងចាស់ អ្នកស្រី ឌីសាវ៉េត បានបង្ហាញអារម្មណ៍ក្ដុកក្ដួល និងអួលដើមកពេលឮថា អង្គការកុមារកំព្រារបស់លោកតា ហ៊្វុយសូ ហៀបតែនឹងដាច់ពោះ ព្រោះអស់ជំនួយសប្បុរសធម៌។
បានត្រឹមតែឮមិនធ្លាប់ឃើញ អ្នកស្រីបានឱ្យដឹងថា អង្គការ N.A.C.A របស់តារាកំប្លែងជើងចាស់ ហ៊្វុយសូ មានទីកន្លែងតូចចង្អៀត ពិបាកដល់ក្មេងៗក្នុងការរស់នៅ រៀនសូត្រ និងរត់លេង។ បន្ថែមលើនេះអ្វីធ្វើឱ្យអ្នកស្រីអួលដើមក គឺអង្គការដែលទ្រទ្រង់ក្មេងកំព្រា២០នេះ ជិតតែគ្មានអ្វីហូបទៅហើយ។
អ្នកស្រី ឌីសាវ៉េត ចូលរួមចែកអំណោយជាមួយក្រុមនិស្សិត ថ្ងៃទី២៣ ខែមិថុនា ឆ្នាំ២០១៥
អ្នកស្រីថ្លែងថា “ដូចប្អូន ផាន មានប្រសាសន៍មិញថា ប៊ិះដាច់ពោះ! ឃើញទេកន្លែងហ្នឹង ធ្វើឱ្យខ្ញុំអួលដើមក។ ប៊ិះដាច់ពោះ! ឥលូវហ្នឹងគាត់រស់ឡើងវិញ ដោយយករបស់របរ ដែលគេចូលរួមចំណែកជួយហ្នឹង ដើម្បីបន្តដំណើររស់ទៀត”។
នៅផ្ទះលេខ ១០៧ ផ្លូវលេខ ៨០ សង្កាត់ស្រះចក ខណ្ឌដូនពេញ រាជធានីភ្នំពេញ (នៅក្រោយស្ថានទូតបារាំង) អង្គការទទួលក្មេងចាប់ពីអាយុ២ឆ្នាំដល់១៦ឆ្នាំនេះ បង្កើតឡើងដោយលោក ស៊ូ សាវ៉ាង ហៅ ហ៊្វុយសូ សហការជាមួយសាលាវិចិត្រសិល្បៈ នៅឆ្នាំ២០០១។ ប៉ុន្តែក្រោយមក ដោយមើលឃើញថាលោក ហ៊្វុយសូ អាចឈរខ្លួនឯងបានហើយនោះ ខាងសាលាវិចិត្រសិល្បៈ ក៏ឈប់សហការដោយជួយតែម្ដងម្កាលប៉ុណ្ណោះ ពេលណាដែលអង្គការជួបការលំបាក។
ទោះបីមានដំណើរការមកដល់សព្វថ្ងៃក៏មែនពិត ប៉ុន្តែអង្គការមួយនេះតែងជួបប្រទះភាពខ្វះខាតជាញឹកញយ ដោយពុំមានជំនួយធំដុំពីក្រៅប្រទេស មានតែជំនួយតូចៗបានមកពីក្រុមសិស្សនិស្សិត តាមសាកលវិទ្យាល័យ និងសប្បុរសជននានា ក្នុងស្រុកតែប៉ុណ្ណោះ។
យ៉ាងណា ដោយមិនពឹងលើជំនួយសប្បុរសធម៌តែមួយមុខ ក្រុមលោកតាហ៊្វុយសូ បានប្រើជំនាញសិល្បៈដែលចេះ ទៅសម្ដែងក្នុងកម្មវិធីនានា ដើម្បីយកប្រាក់មកទ្រទ្រង់អង្គការ។
ពេលសួរថាតើលោកស្ដាយទេ ដែលកន្លងមកធ្លាប់តែបង្ហាញមុខ តាមកញ្ចក់ទូរទស្សន៍ តែបែរជាមកបង្កើតអង្គការ អត់មានប្រាក់ខែយ៉ាងដូច្នេះ?
លោកថ្លែងថា “ខ្ញុំដូចជាមិនស្ដាយទេ ព្រោះអីបានមិនស្ដាយ ខ្ញុំមើលឃើញនែ៎…បើខ្ញុំទៅបង្ហាញនៅកញ្ចក់ទូរទស្សន៍ ដើម្បីបុគ្គលខ្ញុំម្នាក់គត់ បានមក ខ្ញុំដាក់ហោប៉ៅរបស់ខ្ញុំ។ ពេលនេះខ្ញុំត្រូវរកជំនាញឱ្យក្មេង ដើម្បីជួយដល់ក្មេង។ អ្វីៗនេះសំខាន់ជាងខ្ញុំ បង្ហាញខ្លួន លើកញ្ចក់ទូរទស្សន៍ទៅទៀត”។
លោកតា ហ៊្វុយសូ អ្នកស្រី ប៉េន ផាន និងក្រុមកុមារកំព្រា
បង្ហាញពីអារម្មណ៍ពិត ជុំវិញការបង្កើតអង្គការកុមារកំព្រា របស់តាហ៊្វុយសូអ្នកស្រី ឌីសាវ៉េត បានកោតសរសើរអស់ពីបេះដូងថា “គាត់មិនមែនជាមហាសេដ្ឋី តែគាត់សុខចិត្តតស៊ូទាំងអត់ទាំងឃ្លាន សុខចិត្តទទួលកូនខ្មែរបណ្ដៅទូន្មាន បានតិចញ៉ាំតិចបានច្រើនញ៉ាំច្រើន។ អាហ្នឹងហើយ ខ្ញុំចង់ឱ្យមេដាយគាត់។ រកអត់មានទេ! រកអត់មានទេ! ដូច្នេះគាត់ជាគំរូមួយសម្រាប់កូនខ្មែរ”។
អ្នកស្រីបន្ថែមទៀតថា អ្នកស្រីមានការសោកស្ដាយដែរ ដែលគាត់ពុំមានវត្តមានច្រើនតាមកញ្ចក់ទូរទ្សន៍ដូចពីមុន ប៉ុន្តែអ្វីដែលអ្នកស្រីសប្បាយចិត្តនោះ គឺថាលោកតា ហ៊្វុយសូ បានប្ដូរផ្ដាច់ តស៊ូជួយកូនខ្មែរ និងលះបង់ដើម្បីប្រទេសជាតិ។ តាមរយៈលោកតា ហ៊្វុយសូ អ្នកស្រីនឹងគិតរកវិធីផ្សេងៗ ដើម្បីជួយក្មេងៗទាំងនេះ។
គួរបញ្ជាក់ដែរថា អង្គការ N.A.C.A បង្កើតឡើងដើម្បីជួយកុមារកំព្រាកម្ពុជា និងបណ្ដុះបណ្ដាលពួកគេឱ្យចេះនូវជំនាញសិល្បៈដូចជា របាំបុរាណ សម័យ កំប្លែង និងភាសាអង់គ្លេសជាដើម។
ចំពោះលោកអ្នកដែលចង់ជួយឧបត្ថម្ភជាថវិកា និងសម្ភារៈសិក្សាផ្សេងៗ អាចទាក់ទងលោកតា ហ៊្វុយសូ តាមរយៈទូរសព្ទលេខ ០១២ ៨៤០ ៤៤១ / ០១២ ៤២៥ ៦៦៥ / ០១៧ ៣១៣ ៤៣៨ / ០១០ ៣១១ ១៣៥៕
ចុចអាន៖ មាស សុខសោភា ជិះឃើញភ្លាម ចុះចូលចែកអំណោយភ្លែត
អត្ថបទ៖ អ៊ុំ សុភក្តិ
http://ift.tt/1Gy0oHN