ប្រាក់ សុវណ្ណារ៉ា៖ បឹងកេត ត្រូវតែឈ្នះគ្រប់ការប្រកួតទាំងអស់នៅលីក២០១៥នេះ
លោក ប្រាក់ សុវណ្ណារ៉ា គ្រូបង្គោលក្លិបបឹងកេតអង្គរអះអាងថា ក្លិបបឹងកេតអង្គរដែលលោកដឹកនាំនៅរដូវកាលនេះត្រូវតែឈ្នះគ្រប់ការប្រកួតសម្រាប់ពានលីកបាល់ទាត់កម្ពុជាឆ្នាំ២០១៥ដែលនឹងចាប់ផ្តើមនៅដើមខែ កក្កដា ឆ្នាំ ២០១៥ ខាងមុខនេះ។
លោក ប្រាក់ សុវណ្ណារ៉ា (ពាក់អាវខៀវ) និង បែ មករា (ពាក់អាវស)
លោក ប្រាក់ សុវណ្ណារ៉ា និយាយបានឲ្យដឹងថា ក្លិបបឹងកេតអង្គរមានគោលការណ៍ធំមួយគឺក្លិបត្រូវតែឈ្នះគ្រប់ការប្រកួតទាំងអស់ក្នុងពានលីកបាល់ទាត់កម្ពុជាឆ្នាំ២០១៥នេះ និងឈ្នះពានរង្វាន់ធំលំដាប់ទី ១នេះឲ្យបាន ។ កូនក្រុមរបស់លោកនាពេលបច្ចុប្បន្នមានកម្រិតបច្ចេកទេស និងកម្លាំងល្អទាំងព្រម ហើយបើប្រៀបធៀបនឹងក្លិបខ្លាំងៗមួយចំនួននៅប្រទេសកម្ពុជា ក្លិបលោកកំពុងមានភាពលេចធ្លោជាងគេ។ សម្រាប់អ្នកមានបទពិសោធន៍ និងទម្រង់លេងល្អដូចជាកីឡាកររបស់លោកមិនមានអ្វីជាការពិបាកឡើយក្នុងការរៀបចំទម្រង់លេងឲ្យមានសក្ដានុពលនោះ ។
លោក ប្រាក់ សុវណ្ណារ៉ា បានបញ្ជាក់ថា ៖«កីឡាកររបស់ខ្ញុំល្អណាស់។ បើតាមខ្ញុំធ្លាប់ដឹងនាំក្លិបមួយចំនួននៅកម្ពុជា កីឡាកររបស់ក្លិបបឹងកេតល្អជាងក្លិបដែលខ្ញុំធ្លាប់ដឹកនាំនាពេលកន្លងមក»។
លោកបានបន្តថា ការត្រៀមខ្លួនរដូវកាលថ្មីដែលមកដល់នាពេលខាងមុខនេះ ក្លិបរបស់លោកគ្មានអ្វីដែលត្រូវបារម្ភឡើយ បើទោះបីជាកីឡាករទើបតែបានចាប់ផ្ដើមហាត់នៅដើមសប្ដាហ៍នេះក៏ដោយ។ ម្យ៉ាងទៀតកីឡាករអាជីពនិងល្អដូចជាពូកគេ ពិតជាអាចលេងបានតាមការគ្រោងទុករបស់លោកជាក់ជាមិនខាន។
ក្លិបបឹងកេតស្ថិតក្រោមការគ្រប់គ្រងរបស់លោកគ្រូ ប្រាក់ វុទ្ធី ដែលជាបងប្រុសរបស់លោកគ្រូ ប្រាក់ សុវណ្ណារ៉ា បានឈ្នះជើងឯកលីកកំពូលកម្ពុជាកាលពីឆ្នាំ២០១២ដែលជាឆ្នាំក្លិបមួយនេះឡើងមកលេងនៅក្នុងក្របខណ្ឌបាល់ទាត់កំពូលរបស់កម្ពុជាលើកដំបូង ប៉ុន្តែពីររដូវកាលចុងក្រោយនេះគឺ២០១៣ និង២០១៤ បឹងកេតបានតែចំណាត់ថ្នាក់លេខ២ប៉ុណ្ណោះ៕
អត្ថបទ៖ ស្រី សុវណ្ណដារ៉ា
http://ift.tt/1eI9R9N